Sereńko 22 - সান্তালী বাইবেল

Duk reakʼ guher ar Sarhao reakʼ sereń

¹ E ińren, Isor E ińren Isor, cedakʼem bạgi giḍiwạdińa? Iń rukhiyạyiń baṅkate, ińakʼ rakʼ koejoṅ ańjom baṅkate, cedakʼem pharak akana?

² E ińren Isor, siń bhoriń hohowam kana, menkhan am do bam roṛ ruạṛạń kana; ar ńindạ hõ iń do thir akan bạń tahẽnkana.

³ Menkhan am dom sonotgea; ar Israelkoakʼ sarhaoakʼ reakʼ siṅghạson rem duṛupʼ akana.

⁴ Am cetanrege aleren hapṛam doko bhorsalena; onko doko bhorsalena, arem rukhiyạletʼkoa.

⁵ Onko do am ṭhenko rakʼleda arem rukhiyạketʼkoa; amre bhorsakate onko do lajaore bako paṛaolena.

⁶ Menkhan iń do mitʼṭen tejo kạnạń, manwa do baṅa; hoṛ do ińko siṛogạń kana ar manwa doko nihạ̃t edeńkana.

⁷ Jãhãegeko ńeleń kan onkogeko landa dhutʼạń kana. Onko do luṭiko binḍucʼeda ar bohokʼ ruku rukuteko meneda,

⁸ “Uni ma Probhu Isorreye bhorsakʼkan, enḍekhan unigeye rukhiyạyema; ar unigeye bańcaoema, ente uniregeye kusi akana.”

⁹ Eṅgạńakʼ kukhi khon amgem oḍok ạgukedińa; iń do tinre eṅgạńakʼ towań ńũiyetʼ tahẽkana unre amge amre bhorsakʼ reakʼem udgạu ledeńa.

¹⁰ Janam tayomge amakʼ tireń em ocoakana; ar janam khonge am do ińren Isorrem hoyakana.

¹¹ Am do iń khon pharakre alom tahena, ente ińakʼ muhin do sor hijukʼ kana, iń goṛowạń lạgitʼ do celege bạnukʼkoa.

¹² Iń beṛhaete sanḍ ḍaṅgra menakʼkoa; onko do Bashan disạmren daṛean bayarko lekako esetʼ ạcur akadińạ.

¹³ Dhạcri kul cetʼ leka gocʼ jomko lạgitʼe hạnḍrạukʼ, onkage onko do iń upạrte mocako cahapʼ akatʼtakoa.

¹⁴ Iń do dakʼ lekań dul giḍi ocoakana, ińakʼ sanam jaṅ reakʼ joṛaoko do chaḍao akantińạ, ińakʼ ontor do mom leka hoyakante iń bhitrirege cher lambao idikʼkana.

¹⁵ Hasa bhajan reakʼ rạputʼ kelhatʼ leka ińakʼ daṛe do rohoṛ hijukʼ kana, ar ińakʼ alaṅ hõ jambere jaladokʼkana; am do gujukʼ reakʼ dhuṛirem gạḍiạu kedińa.

¹⁶ Iń beṛhaete bạṛicʼakʼko kạmikan phạdko do seta lekako esetʼ ạcur akadińạ; onko do ińakʼ ti jaṅgako pạṭi tapʼ akatʼtińạ.

¹⁷ Ińakʼ jaṅkoń lekha daṛeakʼ kana; onko hoṛ do cahapʼkateko ńeleń kana arko ńel mojayediń kana.

¹⁸ Onko do ako talare ińakʼ kicricʼko hạṭiń joṅana ar ińakʼ aṅrop doko gulibãṭetʼtińạ.

¹⁹ Menkhan E Probhu Isor, am do alom pharakokʼa; E ińakʼ daṛe, iń goṛowạń lạgitʼ ma usạrate hijukʼme.

²⁰ Tarwaṛe khon ińakʼ jiwi baṛe rukhiyại tińme, onko setakoakʼ capoṭ khon ińakʼ jiwi rukhiyại tińme.

²¹ Onko dhạcri kulkoakʼ moca khon de bańcaoińme. Onko bir sanḍ ḍaṅgrawakʼ dereń khon hõ amgem rukhiyạ kedeńạ.

²² Ińren boehako ṭhen do am reaṅgeń lại jạhira, ar kạlisiạ talare amiń gun manao joharama.

²³ Ape okoe do Probhu Isorpe botorae kan ape do uni sarhaoepe. Jakobren bõsrenko, ape do uni manotepe. Israelren sanam bõsko, ape hõ uni botoraepe.

²⁴ Nacaricʼ reakʼ nacartetʼ do bae nihạ̃t giḍiya; Uni secʼ acʼakʼ mẽtʼãhã do bae betʼ dohokakʼa, bickom uniyakʼ rakʼjoṅakʼe ańjomketʼtaea.

²⁵ Maraṅ sabhare ińakʼ oka sarhaoteakʼ menakʼ ona do am ṭhen khonge hijukʼkana ar amre okoekoakʼ botor menakʼ onko samaṅre iń do ińakʼ manotakʼ koń purạutińạ.

²⁶ Mạ̃hir hoṛ doko jom bikʼa arko tirpitokʼa; okoe Probhu Isorakʼ sana lekako calakʼ onko do uniko sarhaoea. Onko do jaejug hạbicʼ jiwetʼko tahen ma.

²⁷ Dhạrti reakʼ ses simạren hoṛko hõ monko ạcurtakote Probhu Isor ṭhenko ruạṛ hijukʼa; ar eṭakʼ jạtren sanam gusṭirenko do uniko sewawaea.

²⁸ Hẽ, rajosṭi do Probhu Isorakʼge hoyokʼma; ar sanam jạtrenko cetanren raj doe uni kangea.

²⁹ Dhạrtiren kisạ̃ṛ hoṛko hõ unre uni samaṅreko jom ńũiya, ar uniko sewawaea; apnarakʼ jiwi bańcao reakʼ dhej bạnukʼtakote okoeyakʼ mitʼ jaṅga do topare menakʼtako, onko hõ uni samaṅreko ikhṛumokʼa.

³⁰ Darakan bõsrenko do uni ṭhenko khaṭaokʼa, ar ona jugren hoṛko ṭhen Probhu reaṅko lại akoa.

³¹ Okoeko ńit hõ bako janam akan, onko ṭhen senkate Hoṛko do uniyakʼ dhorom reakʼ kathako lại jạhira; arko mena, unige noako doe kạmi akada.