Sereńko 21 - সান্তালী বাইবেল

Jitạukʼ reakʼ sarhao

¹ E Probhu Isor, amakʼ daṛe ńelte raj doe rạskạkʼ kana; arem jitạu ocolere uni do ạḍiye kusikʼkana.

² Am do uniyakʼ monsubạm purạu akatʼtaea, ar moca reakʼ katha hõ bam dea giḍi akada. (Sela)

³ Bhạlạiyicʼ reakʼ ạḍi utạr bhorte uni dom koyokʼ daramede kana, ar uniyakʼ bohokʼre nirạ sona reakʼ mukuṭem horokʼae kana.

⁴ Uni do am ṭhen jione koeleda, ar am do onam emadea; ar ḍher din bahaokʼ lạgitʼem danadea.

⁵ Amem jitạu ocokedete uniyakʼ manot do ḍheretaea; am do man ar ṭhonokem emakawadea.

⁶ Am do jaejug hạbicʼem bhor akawadea; ar hạjirge menamte uni dom rạskạ ocoyede kana.

⁷ Probhu Isor cetanrege raj doe bhorsakʼ kana; ar maraṅ Isorakʼ khạndri dulạṛ do uniye ṭarhao ocoyea.

⁸ Amakʼ titege amren sanam bạirikom sapʼetʼkoa; ar amko hirkhạwamko do jojom titem sapʼpaṭetʼkoa.

⁹ Amem sodorokʼre onko do culhạ reakʼ jolokʼkan koela lekam hoyocokoa. Probhu Isor do edreteye utʼgotʼkakoa, ar uniyakʼ seṅgelte onko doe atar giḍikoa.

¹⁰ Dhạrti khon onkoren bõsko do amgem marao cabakoa; ar manwako tala khonem meṭao utạrko.

¹¹ Onko do am upạrte bạṛicʼ sopolha ar bạṛicʼakʼ reakʼko goṭayetʼre hõ, onko do onare ohoko jitạu daṛelena.

¹² Ente am do onkoakʼ mẽtʼãhã ńelkae tinre amakʼ sarkom aṛaga, unre onko doko dạṛ pạnḍuja.

¹³ E Probhu Isor, amakʼ daṛetege sodorokʼme; ale do amakʼ daṛe reakʼle sarhaotama arle sereńa.