Sereńko 20 - সান্তালী বাইবেল

Jitạukʼ lạgitʼ koejoṅ

¹ Amakʼ dukokʼ dinre Probhu Isor do amakʼ hohoe ańjomtama; Jakobren Isor do nirạiteye dohome ma.

² Acʼakʼ sonot ṭhạ̃i khon uni do ame goṛowam ma ar Sion buru khon daṛeye emam ma.

³ Amakʼ sanam dãṛẽ reakʼ katha uniyakʼ monre disạ tahentae ma, amakʼ jeredokʼakʼ dãṛẽko uni doe ataṅtam ma.

⁴ Amakʼ monsubạge baṛeye puruntam ma, ar amakʼ sanam niṭ joṅakʼkoe purạu ma. (Sela)

⁵ Amem jitạukʼre jemonle rạskạ daṛeakʼ ar aleren Isor ńutumte jhạnḍi jemonle rakabtale. Probhu Isor do amakʼ sanam koejoṅe luturakʼtam ma.

⁶ Ńitokʼ doń baḍaegea je, Probhu Isor do acʼe ojokʼ akade hoṛe bańcao edeya, ar acʼakʼ jojomti teakʼ bańcaokʼ reakʼ maraṅ daṛete uni do sonot serma khon acʼe ojokʼ akade hoṛakʼ hohoe ańjomtaea.

⁷ Ḍher hoṛge akoakʼ rãt gạḍi iạteko bạḍạiyokʼa ar adomko do akoren sadomko iạte, menkhan abo do aboren Probhu Isor iạtege.

⁸ Onko doko copotʼ akana, arko sombotʼ bhindạṛ akana menkhan abo do bohokʼ sojhekate bon teṅgo ṭak akana.

⁹ E Probhu Isor, bańcaoleme baṛe; E raj, alele hohowamre roṛ ruạṛaleme.