Sereńko 2 - সান্তালী বাইবেল

Isorren bachaoicʼ raj

¹ Cedakʼ sanam jạtren hoṛ doko gulmaleda? Hoṛko do ạuṛiyakʼ cedakʼko soṛojontro kana?

² Dhạrtiren rapajko do Probhu Isor ar uniren ojokʼicʼ upạrteko teṅgonkana, Ar mukhiyạko do mitʼteko milimisi joṅkana.

³ Onkoko meneda, “Dela, unkinakʼ sikṛi bon topagma, Ar unkinakʼ tonol bon raṛakatakin ma.”

⁴ Probhu Isor do serma reakʼ siṅghạson khone landa kana; Uni do onkoe siṛogakokana.

⁵ Uni do edreteye dhomkaokoa, ar acʼakʼ jaljalaokʼkan raṅgaoteye alatʼolotʼ cabakoa.

⁶ Probhu Isore meneda, “Okoe rajiń ojokʼ akade uni do ińakʼ sonot buru Sionreń duṛupʼ akadea.”

⁷ Raj doe mena, Probhu Isor okae gathao akatʼ Iń do onań lại jạhira; Uni doe metadińạ, am dom ińren hopon kana, teheńge iń do amren apatiń hoyena.

⁸ Am do iń ṭhen khojogokʼme, ado porjạtrenko amakʼ sompotti menteń emama ar goṭa dhạrtige amakʼ ạidạrire hijukʼa.

⁹ Mẽṛhẽtʼ ṭheṅgate am do onkom rạputʼkoa ar hasa reakʼ bhajan lekam tawakʼ gejer cabakoa.”

¹⁰ Onate E rapajko, ńitokʼ do bujsuj salakʼ calakʼpe; Dhạrtiren disạm cakʼlaoko, ape do sontorokʼpe.

¹¹ Bhokti salakʼ Probhu Isor dewa sewawaepe, ar ontorre botor salakʼ rạskạkʼpe.

¹² Ape do uni hopon manot emaete cokʼaepe, jemon ape cetanre bekusi aloe tahen ar calakʼ horre alope maraokʼ; ente mitʼ ripitʼrege uniyakʼ edre do jolokʼtaea. Bhạgangeako, one okoe do unireko hilrạjoṅ kan.