Sereńko 18 - সান্তালী বাইবেল

Dạudakʼ jitạukʼ sereń

¹ E Probhu Isor, am kangeam ińakʼ daṛe, ar iń do amgeń dulạṛetʼmea.

² Probhu Isorge ińren usul buru, unige ińakʼ aotan gaṛ ar ińren babańcaoicʼ; ar ińren Isorge ińren usul buru, unirege iń do asrayiń hataoeda. Uni do ińren dhal kanae, rurukhiyạicʼ dereńge, ar ińakʼ asray gaṛge.

³ Probhu Isor do sarhao ńam lek kanae, iń do uniń hohowae kana; onate ińren bạirikoakʼ ti khone rukhiyạyińạ.

⁴ Gujukʼ reakʼ baberteń tol akan tahẽkana. ar banbạsiteń toraslena.

⁵ Ar patal puri reakʼ barahikoteń tolakana, gujukʼ reakʼ pạsi do iń lạgitʼ oḍao tahẽkana.

⁶ Iń do muhinre ińren Probhu Isoriń hohowadea ar goṛo ńam lạgitʼ uni ṭheniń rakʼkeda. Acʼakʼ tahen ṭhạ̃i khon uni do ińakʼ aṛaṅe ańjomketʼtińạ; ińakʼ rakʼjoṅ do uniyakʼ luturre seṭerena.

⁷ Unre dhạrti do daldalaoena ar ḍikạ ḍakekʼ ehopʼena, ar buru reakʼ rehetʼko do dalmalaoena; uniyakʼ edrete onako do dal dalaoena.

⁸ Uniyakʼ mũ khon dhũạ do coṭte rakapʼena, ar moca khon ḍahao maraoakʼ seṅgelge oḍokena. Uniyakʼ moca reakʼ seṅgelte koelako jolena.

⁹ Uni do sermae liwetʼketʼteye pheḍ hecʼena; ar uniyakʼ jaṅga latarre do hende rimil tahẽkana.

¹⁰ Uni do Kerubre decʼkateye uḍạu hecʼena, ar hoe reakʼ phạ̃kṛạ̃kʼteye ạphir hecʼena.

¹¹ Uni do ńutteye esetʼ ạcurena; uni beṛhaete dakʼ reakʼ dạriạ hende rimilge tahẽkana.

¹² Uni samaṅ reakʼ rãt khon ona dạriạ rimil do ocokʼena; arel ar seṅgel aṅgrakoge oḍok hecʼena.

¹³ Probhu Isor do serma khone huḍurkeda; ar maraṅ daṛeyicʼ do arel ar seṅgel aṅgrakore acʼakʼ aṛaṅe ańjom ocokeda.

¹⁴ Uni do sarkoe aṛakʼketʼte bạirikoe chirchạturketʼkoa, ar bijlikoteye andmandaoketʼkoa.

¹⁵ E Probhu Isor, amakʼ dhomkaote ar mũ reakʼ sãhetʼte, ot latarre do dakʼ ńelena, ar dhạrti reakʼ rehetʼko hõ oṭakʼena.

¹⁶ Uni do coṭ khon tiye tiyạrketʼteye sapʼkedińa, ar khạndri dakʼ khone owar rakapʼkedińa.

¹⁷ Ińren daṛean bạirikoakʼ ti khon ar iń kurudạńko reakʼ ti khon uni doe bańcaokedińa; onkoakʼ daṛe do iń khon hõ ḍhergetakoa.

¹⁸ Muhinre onko do ińko esetʼ ạcur ledeńạ, menkhan Probhu Isorgeye sapʼ sãohakedińa.

¹⁹ Uni do mitʼṭecʼ phaelao jaegateye oḍok ạgukedińa; ar ińre kusiye tahẽkante uni doe bańcaokedińa.

²⁰ Ińakʼ dhorom kạmi lekatege Probhu Isor doe dan akawạdińa, ar ińakʼ kạmi reakʼ napaetetʼ iạtege kuṛạiye emadińạ;

²¹ Ente Probhu Isorakʼ horrege iń doń dãṛãn kana; bạṛicʼakʼ kạmikate ińren Isor khon bạń ocokʼ akana.

²² Uniyakʼ joto ạn-ạriko do iń samaṅre menakʼa; ar uniyakʼ ạn ạri khon do bạń ocokʼ akana.

²³ Uni samaṅre bin dusạngeń tahẽkana; iń do kại khon hõ pharakreń tahẽlena.

²⁴ Onate Probhu Isor do kuṛạiye emakawạdińa uniyakʼ mẽtʼãhã samaṅrege ińakʼ dhorom kạmi lekate ińakʼ mońjakʼ kạmiko iạtege.

²⁵ E Probhu Isor, biswạsiko tulucʼ do biswạstegem beohareda ar dhoromko tulucʼ do dhoromem beohareda,

²⁶ Ar khạṭiko tulucʼ do khạṭigem beohareda, ar phẽpṛakʼko do amakʼ bud reakʼ phundim udukʼako kana.

²⁷ Am do nacar jạtrenkom rukhiyạyetʼkoa ar bạḍạiko dom tumbutʼ ocoyetʼkoa.

²⁸ Amge ińakʼ jion reakʼ diuhe dom jol dohoyetʼ kana; ińren Probhu Isor do ińakʼ ńute marsalketʼtińạ.

²⁹ Amakʼ goṛote lạṛhại phạdko cetanre iń do jhãpiń em daṛeakʼa, ińren Isorakʼ goṛote iń do pạcrikoń don parom daṛeakʼa.

³⁰ Isorakʼ horre jãhãn bin sạbitanakʼ do bạnukʼanaṅ, Probhu Isorakʼ katha do khạṭi mente sạbud akana. Uni do acʼre hirlạjoṅ kan sanam hoṛren ḍhal kanae.

³¹ Probhu eskar chaḍa ar okoe Isor menaea? Aboren Isor chaḍa cetʼ jãhãn aotan buru menakʼa?

³² Isorge ińakʼ ḍanḍare daṛeye imạńkana unige ińakʼ horkoe sạbit ocoyetʼtińạ.

³³ Uni do posta-jel leka jaṅga reakʼ daṛeye emakawạdińa; ar sanam usul jaegakoreye teṅgo ocoakadińa.

³⁴ Uni khonge ińakʼ ti do lạṛhạiye cetʼakada, onate ińakʼ ti do pitạl reakʼ akʼe gakʼ daṛeakʼa.

³⁵ E Probhu Isor amakʼ rurukhiyạ ḍhal do ińem emakawạdińa, ar amakʼ jojom ti doe sapʼ akadińạ; amakʼ joton iạte iń do maraṅiń hoyakana.

³⁶ Am do ińakʼ taṛam horem phaelao akada, onate jaṅga do baṅ tohotʼlentińa.

³⁷ Ińren bạirikoń khudạuketʼkoa ar onko doń sapʼtiyokʼketʼkoa; ar ạuriko gocʼ cabakʼ hạbicʼ bạń ruạṛlena.

³⁸ Onko doń marao giḍi akatʼkoa, ariń gejer caba akatʼkoa, ar alo jemonko beretʼ daṛeakʼ; ente ińakʼ jaṅga latarreko ńur akana.

³⁹ Amge ińakʼ ḍanḍare lạṛhại lạgitʼ daṛeyem emakawạdińạ, ar iń upạrtenko do ińakʼ jaṅga latarrem dohoakatʼkoa.

⁴⁰ Ińren bạiriko do iń ṭhen khonem laga ńirketʼkoa; okoe ińko kurudạńkan onko doń marao caba akatʼkoa.

⁴¹ Onko do goṛo ńam lạgitʼko hohoyetʼkana, menkhan onko rukhiyạko lạgitʼ do celege bako hecʼlena. Onko do Probhu Isor ṭhenko dohaekeda, menkhan uni do bae roṛ ruạṛatʼkoa.

⁴² Hoete oṭaṅokʼkan dhuṛi leka onko doń holoṅ ḍigirketʼkoa, ar ḍahar reakʼ losotʼ lekań giḍikatʼkoa.

⁴³ E Probhu Isor, ińren huhulkan hoṛko khon am dom bańcao akadińạ, ar eṭakʼ jạtrenko cetanre am do matha mentem dohoakadińạ; okoe bạń orom akatʼko onko hõ iń ṭhen golamko khaṭao akana.

⁴⁴ Onko do ińakʼ katha ańjom torageko bataotińạ; ar bidisiạ hoṛ doko luhum suhumań kana.

⁴⁵ Onko doko tolmojokʼa; ar thar tharaoakʼte gaṛ khonko oḍok hijukʼa.

⁴⁶ Probhu Isor doe jiwetʼgea. Ińakʼ asray cạṭạini do sarhao hoyokʼtae ma, ar ińakʼ bańcaokʼren Isor doe usulokʼma.

⁴⁷ Uni do eṭakʼ jạtrenko iń tabereye ạguyetʼkoa ar iń huyạte unige sạjạiye emako kana.

⁴⁸ Uni do bạirikoakʼ ti khone rukhiyạ edeńkana. E Isor, am do bạiriko khonem usul akadińạ. Ar jor julumkan hoṛko khon amgem rukhiyạ akadińạ.

⁴⁹ E Probhu Isor, ona iạtege eṭakʼ jạtrenko talare amakʼ ṭhonokiń sodortama ar amakʼ ńutumiń maraṅtama.

⁵⁰ Probhu Isor do acʼren raj ḍher dhaoe jitạu ocoyea; acʼren bachao bahal akatʼko hoṛ lạgitʼ, Dạud do uniren bõsko lạgitʼ, uni do jaejug hạbicʼ acʼakʼ dulạṛe udugtaea.