Sereńko 17 - সান্তালী বাইবেল

Miridos hoṛakʼ koejoṅ

¹ E Probhu Isor, dhorom reakʼ katha ańjomme, ar ińakʼ rakʼjoṅ luturakʼme; ińakʼ bin phạsiara moca reakʼ koejoṅ baṛe ańjomtińme;

² ińre amakʼ bicạr do dhoromanakʼ baṛe hoyokʼma; ar oka sạriyakʼ kan onage amakʼ mẽtʼre sabokʼma.

³ Am do ińakʼ ontorrem bolo akana ar ńindạ dom biḍạu akadińạ; arem biḍạu aṭkar edeńkana menkhan cetʼge bam ńam akada. Ińiń ṭhik akada jãhãn kại reakʼ kathare ińakʼ moca do ar bạń beohara.

⁴ Manwa okakoe kạmi onako baṅkate amakʼ moca reakʼ katha hotete julum reakʼ hor khon iń doń ocokʼ akana.

⁵ Amakʼ horrege ińakʼ jaṅgań teṅgo keṭecʼ akatʼtińạ; onḍe khon ińakʼ jaṅga do baṅ ḍikạ ḍake akana.

⁶ E Isor, amiń hohowamre ańjomtińme, ar onategeń hohoam kana; ińakʼ katha luturakʼtińme, ar ińakʼ koejoṅ ańjomtińme.

⁷ Amakʼ khạndri dulạṛ do hahaṛa salakʼ sodorme; ar bạirikoakʼ ti khon rukhiyạ ńam lạgitʼ okoe do amre asrayko ńam bakʼṛakan, onko do amakʼ jojom titem rukhiyạyetʼkoa.

^8-9 Mẽtʼ reakʼ moni leka am do rukhiyạyińme; ar okoe ińko hạneńkan onko bạṛicʼ hoṛko khon, ar okoe do gojeń lạgitʼko esetʼ ạcur akadiń onko bạiriko khon, amakʼ phạ̃kṛạ̃kʼ latarre goṅgotʼ dohokańme.

¹⁰ Onko do goṛdho ontor reakʼ duạrko siń akada; ar onkoakʼ moca khon bạḍại reakʼ katha hõ oḍokokʼ kana.

¹¹ Onko do ńitokʼ aleko esetʼ ạcur akatʼlea, jãhã secʼ calakʼ reakʼ horge bạnukʼtalea. Onko do ale cetanre nońjorko dohoakada jemon otreko tawakʼ bhindạṛ daṛeale.

¹² Onko do dhạcri kul leka cirạ gocʼle lạgitʼko pagla akana, onko do dhạcri kul leka danaṅreko tãṛãkʼ akana.

¹³ E Probhu Isor, ma beretʼme, ar teṅgo daramkote, otre baṛe tawakʼ bhindạṛkom. Amakʼ tarwaṛete bedhoromkoakʼ ti khon rukhiyạyińme.

¹⁴ E Probhu Isor, onko hoṛkoakʼ ti khon, ar dhạrtiren manwako khon, amakʼ tite ińakʼ jiwi bańcao tińme. Onkoakʼ kuṛại do noa dhạrtirege menakʼa amakʼ dhon duribte onkoakʼ lacʼ do bikʼtakoa, ar onkoren gidrạkoakʼ lekha do ḍherge hoyokʼa, ar gidrạko lạgitʼ akoakʼ dhon doko doho oṭokakʼa.

¹⁵ Menkhan iń do am samaṅ jemon bin dusạniń tahẽ daṛeakʼ, gocʼko khoniń ebhen daṛeakʼ ar am ńelte jemoniń rạskạ daṛeakʼ.