Sereńko 16 - সান্তালী বাইবেল

As bhorsakʼ reakʼ koejoṅ

¹ E Isor, rukhiyạyińme, ente iń do amreń hirlạ akana.

² Iń do Probhu Isoriń menakawadea, “Am kangeam ińren kisạ̃ṛ do; am begor bhageakʼ do cetʼte hõ baṅ hoyokʼtińạ.”

³ Dhạrtire okoe doko Isorren hoṛkan, onko doko maraṅgea; ar onko iạtege iń doń rạskạkʼ kana.

⁴ Okoe do debotakoko sewawako kan onkoakʼ duk do ḍherokʼtakoa. Ar onko oka mãyãmko coḍor ona do bạń onkaea; ar debotakoakʼ ńutum do luṭite hõ bạń ńuma.

⁵ E Probhu Isor, am kangeam ińakʼ dhon do; ar am kangeam tetaṅedeń kan dakʼ do. Ar amge ińakʼ gulibãṭteakʼ bakhram jogaoetʼtińạ,

⁶ ińakʼ simạnare paṛao akan ṭhạ̃iko do hạ̃sgea; ar ińakʼ sompotti ńelkate sạrigem mạluṅ utạrokʼa.

⁷ Iń do Probhu Isoriń sarhaoea uni do bhage solhae imạńkana; ar ńindạ jokhecʼ ińakʼ ontor hõe sikhạuedeń kana.

⁸ Probhu Isor do jaoge iń samaṅreń ńelekana; uni do ińakʼ jojomsa aṛere menaete iń doń ṭarhao akana.

⁹ Ona iạte ińakʼ mon do rạskạte perejokʼ kana, ar ińakʼ ontor doe hulạsokʼ kana ar ińakʼ hoṛmo do khạtirjoma tahentińạ;

¹⁰ Ente patal purire do bam giḍiyińạ, ar amren sonoticʼakʼ hoṛmo hõ bam nosṭo ocoya.

¹¹ Amge jion reakʼ horkom baḍae ocoakadińạ; cepel cepel rạskạ do am mẽtʼãhã samaṅrege menakʼa, ar amakʼ jojomti secʼ do jaejug reakʼ sukge menakʼa.