Sereńko 148 - সান্তালী বাইবেল

Goṭa pirthimiren Isor sarhaoe reakʼ dela katha

¹ Probhu Isorakʼ sarhao hoyokʼtae ma. Serma khon ape do Probhu Isor sarhaoepe; Coṭakʼkore uni sarhaoepe.

² E uniren sanam serma goḍetko, uniyakʼ sarhao sereńpe; E uniren sanam daṛeanko, uni sarhaoepe.

³ E siń cando ar ńindạ cando, uni sarhaoepe; E jhak jhakaokʼkan ipilko, uni sarhaoepe.

⁴ E serma, uni sarhaoeme; E serma cetan reakʼ dakʼ, uni sarhaoeme.

⁵ Onko sanamkoge Probhu Isorko sarhaoema, ente uniye hukumkeda arko sirjạuena.

⁶ Onko do jaejug lạgitʼ niṭ akatʼ jaegareko ṭarhao akana; uni do mitʼṭecʼe niạm akada, ona do okoe hõ bako rạputʼ daṛeakʼa.

⁷ E dhạrtiren hoṛko ape do Probhu Isor sarhaoepe. E jalapuriren napṛakʼ napṛakʼ jiwiyanko ar jalapuri reakʼ khạndriyakʼko uni sarhaoepe.

⁸ E bijli ar arel, him ar kuṛhạ ar uniyakʼ hukum senakʼ birbão uni sarhaoepe.

⁹ E sanam buru boṭkocʼ ar joanakʼ dareko ar sanam debdạru dareko, uni sarhaoepe.

¹⁰ E bir janwar ar sanam ạsul janwarko ar lacʼte taṛamko ar phạ̃kṛãkʼan jiwiyanko, uni sarhaoepe.

¹¹ E dhạrtiren rajko ar sanam jạtrenko ar rapajko ar disạm cakʼlao banaoko, uni sarhaoepe.

¹² E Juạn koṛa kuṛiko ar haṛam buḍhiko ar gidrạko, uni sarhaoepe.

¹³ Onko jotoge Probhu Isorko sarhaoema, ente eken unigeye maraṅa; Ot ar serma cetanre uniyakʼ mạhima menakʼa.

¹⁴ Uni do acʼren hoṛko lạgitʼ mitʼṭecʼ dereńe rakapʼ akada; mitʼṭecʼ sarhaokʼage acʼren bhoktoko lạgitʼ, Israelko lạgitʼ acʼ sorre menakʼko hoṛko lạgitʼ. Probhu Isorakʼge sarhao hoyokʼtae ma.