Sereńko 147 - সান্তালী বাইবেল

Sanam daṛean Isor sarhaoe

¹ Probhuakʼge sarhao hoyokʼtae ma. Aboren Isor oṛhẽ sereńae do bhagegea! Ona do samani mońj! Uni gun manao joharae do lek kangea!

² Probhu Isorge Jerusalem doe benao rakaba; ar unige chirchạtur akan Israelkoe jarwakoa.

³ Rạputʼ monanko doe bogeyetʼkoa; ar onkoakʼ sanam ghaokoe tolkatako kana.

⁴ Uni do ipilkoe lekhayetʼkoa ar mimitʼko ńutum ńumkateye hohowako kana.

⁵ Aboren Probhu Isor doe maraṅgea, ar uniyakʼ daṛe do ḍhergea; uniyakʼ bud ar akel reakʼ mucạtʼtetʼ do bạnukʼanaṅ.

⁶ Probhu Isor do mạ̃hirkoe diṛhoyetʼkoa, menkhan bạṛicʼ hoṛko do otreye giḍikako kana.

⁷ Ape do Probhu gunmanao joharaete sereńaepe; ar banamate aboren Isorakʼ ńutumte sarhao sereńpe.

⁸ Uni do rimilte sermae esetʼeda; ar dhạrti lạgitʼ dakʼe koleda ar burure ghãse janam ocoyeda.

⁹ Uni do janwarko jomakʼe danako kana; bhonḍa kạhu hoponkoko ragre onkohõ jomakʼe emako kana.

¹⁰ Uni do sadom reakʼ daṛe hõ bae hạ̃sakʼa, ar lạṛhạyicʼ reakʼ jaṅga hõ bae bạsutakʼ kana;

¹¹ menkhan okoe uniko botorae ar uniyakʼ dulạṛre asko dohoyetʼ, onko iạtege Probhu Isor doe rạskạkʼa.

¹² E Jerusalem, Probhu Isor sarhao sereńaeme; E Sion, amren Isor gun manao joharaeme.

¹³ Uni do amakʼ phaṭok duạrkoe horhoyetʼtama, ar amre girobasokʼkan hoṛkoe bhorako kana.

¹⁴ Amakʼ simạnakore unige sạjạiye dohoyeda, ar joto khon bhage guhumteye tirpitetʼme kana.

¹⁵ Uni do dhạrtire acʼakʼ hukume koleda; ar ona do ạḍi usạrage manaokʼ kana.

¹⁶ Uni do bhiḍi upʼ leka hime koleda ar torocʼ leka sisir dakʼe chiṭiạueda.

¹⁷ Uni do piṭhạ kecakʼ leka arele ńur ocoyeda; uni emakʼ rabaṅ do okoeye sahao daṛekea?

¹⁸ Acʼakʼ kathae koletʼte uni do arele leyeda; ar acʼakʼ hoeye hoe ocoyre dakʼe ạtu ocoyeda.

¹⁹ Uni do Jakob ṭhen acʼakʼ kathae sodor akada, ar Israelko ṭhen hõ acʼakʼ ạn ạrikoe doho akada.

²⁰ Eṭakʼ jạtrenko lạgitʼ do bae onka akada; onko do uniyakʼ ạn ạriko bako baḍaea. Probhu Isorakʼge sarhao hoyokʼtae ma.