Sereńko 146 - সান্তালী বাইবেল

Babańcaoicʼ Isor sarhaoe

¹ Probhu Isorakʼge sarhao hoyokʼtae ma. E ińakʼ jiwi, Probhu Isorge gun manao joharaeme.

² Iń do goṭa jionge Probhu Isoriń sarhaoea; tinạkʼ din jiwetʼ iń tahena unạkʼ din Isorgeń sarhao sereńaea.

³ Jãhãn cetan hudạren hoṛ se jãhãe manwa cetanre ape do alope ṭehãḍokʼa; onko do bako bańcao daṛeapea.

⁴ Onkoakʼ jiwi oḍoklen tako khan onko do hasareko mesaokʼa, ar enhilokʼge onkoakʼ joto lekan goṭawakʼ do cabakʼtakoa.

⁵ Bhạgangeae uni hoṛ, okoe do Jakobren Isore goṛowae kan, okoeyakʼ as do uniren Probhu Isorre.

⁶ Probhu Isor do serma ar ot ar jalapuri ar onare menakʼ jotowakʼe sirjạu akada; uni do jaejug hạbicʼe pạtiạrgea.

⁷ Uni do santao ocokʼkanko hok reakʼe bicạrtakoa ar reṅgecʼko do jomakʼe emakokana; Probhu Isorge bondi akankoe chaḍaoetʼkoa.

⁸ Probhu Isor do kãṛãko ńeńel reakʼ daṛeye emako kana; ar kuḍbur akanko doe sojheyetʼkoa; Probhu Isor do dhorom hoṛkoe dulạṛetʼkoa.

⁹ Probhu Isor do upriạ hoṛko hõe beṅgetʼako kana uni do ṭuạ̃r amar ar rạndikoe ńel todarotetʼkoa, menkhan bạṛicʼkoakʼ hor doe konḍeayetʼtakoa.

¹⁰ Probhu Isor do jaejug hạbicʼe rajokʼa; E Sion, piṛhike piṛhi amren Isor doe rajokʼa. Probhu Isorakgeʼ sarhao hoyokʼtae ma.