Sereńko 145 - সান্তালী বাইবেল

Sarhao sereń

¹ E ińren Isor, E raj, iń do amiń sereńama; iń do jaejugiń sarhaomea.

² Din hilokʼ iń do amiń sarhaomea; ar jaejug amiń gun manao joharama.

³ Probhu Isor doe maraṅgea ar joto khon sarhaoanicʼ lek kanae; okoe hõ uniyakʼ maraṅtetʼ do bako bhujhạu daṛeakʼa.

⁴ Mitʼ piṛhiren do eṭakʼ piṛhiren hoṛko ṭhen amakʼ kạmi reakʼko sarhao sereńa; onko do amakʼ daṛeanakʼ kạmi reakʼ kathako lại jạhira.

⁵ Amakʼ man reakʼ mạhimawanakʼ ṭhonok kạnạń iń do amakʼ hahaṛawakʼko reaṅiń ganḍon joṅa.

⁶ Hoṛko do amakʼ botoranakʼ hahaṛa daṛe kạmi reakʼ kathako roṛa, ar iń do amakʼ maraṅtetʼ iń lại sodora.

⁷ Ar am tinạkʼem bhạlại akatʼko onko do onako lại baṛaea, ar amakʼ dhorom reakʼ kathakote rạskạteko sereńa.

⁸ Probhu Isor do daya are mãyãwạnicʼ kana; uni do usạrate bae edre hodokʼa ar uniyakʼ dulạṛ do asambheṛgetaea.

⁹ Probhu Isor do sanamko lạgitʼe bhạlạiyạnicʼ kana; uniyakʼ sirjạu reakʼ jotowakʼ cetanre mãyã menakʼtaea.

¹⁰ E Probhu Isor, am okam sirjạu akatʼ onako do amgeye sarhaomea; ar am botoram kanko do amko gun manao joharama.

¹¹ Onko do amakʼ rajosṭi reakʼ ṭhonokanakʼ katha ar amakʼ daṛe reakʼ kathako roṛa;

¹² Jemon sanam manwa do amakʼ daṛete perecʼ kạmi reakʼ kathako baḍae daṛeakʼ, ar amakʼ rajosṭi reakʼ ṭhonokte perecʼ mạhima hõ.

¹³ Amakʼ rajosṭi do jaejug reakʼ rajosṭi kana; amakʼ ḍanṭao do piṛhi cetan piṛhige.

¹⁴ Okoeko ńurokʼkan Probhu Isor do onkoe sapʼ sambṛaoetʼkoa; ar okoeko laḍe akan onko doe sojheyetʼkoa.

¹⁵ As kate sanamkoge am secʼko beṅgetʼakada; am do ṭhik okterege jomakʼem emako kana.

¹⁶ Sanam jiwiyankoakʼ mon reakʼ sana am do ti tiạr katem purạuetʼtakoa.

¹⁷ Probhu Isor do acʼakʼ sanam horreye dhoromgea, ar sanam kạmireye pạtiạrgea.

¹⁸ Okoe Probhu Isorko hohowae, ar ontorteko hohowae kan, uni do onko ṭhengeye tahenkana.

¹⁹ Okoe uniko botoraekan onkoakʼ monejoṅakʼ doe purạuetʼtakoa; ar goṛowako lạgitʼ onkoakʼ rakʼ ańjomte onkoe rukhiyạyetʼkoa.

²⁰ Okoe Probhu Isorko dulạṛe uni do onko sanamkoe rukhiyạkoa, menkhan sanam bạṛicʼko uni doe ḍahao maraokoa.

²¹ Ińakʼ moca do Probhu Isorakʼgeye sarhao sereńa; ar sanam jiwiyanko do piṛhike piṛhi uniyakʼ sonottetʼko sarhaotaea.