Sereńko 144 - সান্তালী বাইবেল

Raj doe jitạuente Isore sarhaoedea

¹ Probhu Isorakʼ sarhao hoyokʼtae ma, uni do ińren aotan gaṛge; uni do lạṛhại lạgitʼ ińakʼ tikine cetʼakawạdińa, ar ińakʼ kạṭupʼko do tapam lạgitʼge.

² Unige ińren pạtiạran gokʼṛoyicʼ, ar ińakʼ gaṛ, ińakʼ usul aotan gaṛ ar babańcaoicʼ; unige ińren ḍhal, iń do uniregeń hirlạkʼ kana; unige ińren hoṛko iń gobolreye ạgukoa.

³ E Probhu Isor, manwa doe celekante, uni secʼem ạwilokʼkana? Ar manwa hopon baṅe okoekan, one uni secʼem moneyakʼkan?

⁴ Manwa ma eken sahẽtʼ leka ar uniyakʼ dinko do umul leka parom calakʼkana.

⁵ E Probhu Isor, amakʼ serma khon pheḍ hijukʼme; ar buru boṭkocʼko joṭedme jemon onako khon dhũạ oḍokokʼ.

⁶ Am do bijli kolme ar bạiriko chir chạturkom; ar amakʼ sar aṛagte onko chaka chunkom.

⁷ Am do cetan khon amakʼ ti tiạrtam; ar iń rukhiyạyińme, ḍubạ dakʼ khon, hẽ, eṭakʼ jạtrenkoakʼ ti khon bańcaoińme.

⁸ Onkoakʼ moca do phạsiạrate perecʼgea; onko do jojom ti tulkate ạuṛiyakʼko kiriạkʼa.

⁹ E Isor, am ńutumte nãwãnakʼ iń sereńa; ar gel taranakʼ banamte amiń oṛhẽ sereńama.

¹⁰ Am do rapajkom jitạu ocoyetʼkoa; amren golam Dạud hõ tarwaṛe reakʼ ti khonem rukhiyạedekana.

¹¹ Rukhiyạyińme, ar eṭakʼ jạtrenkoakʼ ti khon bańcaoińme; onkoakʼ moca do phạsiạrate perecʼgea; onko do jojom ti tulkate ạuṛiyakʼko kiriạkʼa.

¹² Aleren hoponko do juạn jokhecʼre dare lekako harakʼma, ar aleren hoponerako do raj dolanre rokʼ kundạo akatʼ tham khunṭi lekako hoyokʼma.

¹³ Aleakʼ murạiko do joto lekan jomakʼte perecʼ tahenma; ar aleren bhiḍiko do gupi ṭạnḍire hajar hajar ar lakh lakh hoponko janamko ma.

¹⁴ Aleren ḍaṅgrako do hamal hamal bojhako or daṛeakʼma; ar aleakʼ bhitko jemon alo paṛagokʼtale, okoe hõ jemon aloko bondi ocokʼ, ar horkore jemon dukokʼko reakʼ rakʼ alo ańjomokʼ.

¹⁵ Bhạgangeako onko jạtrenko, okoe do nonkako hoyokʼkan. Bhạgangeako onko jạtrenko, one okoeren Probhu doe Isorkan.