Sereńko 143 - সান্তালী বাইবেল

Goṛo ńam lạgitʼ koejoṅ

¹ E Probhu Isor, ińakʼ koejoṅ ańjomtińme, ińakʼ nehõrjoṅ reakʼ rakʼ luturakʼtińme; amakʼ pạtiạrtetʼ ar amakʼ dhoromte roṛ ruạṛạńme.

² Iń amren golam do alom bicạrińạ, ente amakʼ mẽtʼãhã samaṅre sanam jiwiyankoge dhorom doko baṅkana.

³ Bạiri do ińe khudạuedeń kana, uni do otreye tawakʼ bhindạṛ akadińạ; ar ḍher din laharen gocʼ hoṛ leka uni do ńutreye berel ocoakadińạ.

⁴ Onate iń doń lorao akana; ińre ińakʼ ontor do keklesetʼ akantińạ.

⁵ Iń do sedae reakʼ kathań disạyeda, ar amakʼ sanam kạmiko reaṅiń ganḍonjoṅ kana; amakʼ ti okaṭakʼe cekayetʼ ona reakʼgeń hudiseda.

⁶ Iń do am secʼ tiyiń tiyạretʼtińạ; khaṅgoṭ ot leka ińakʼ jiwi do amre tetaṅokʼ kana.

⁷ E Probhu Isor, usạra roṛ ruạṛ imạńme, ente ińakʼ jiwi do oḍokokʼ kantińạ; iń khon amakʼ mẽtʼãhã alom bedtama, patal purite okoeko pheḍakan onko leka khạndṛuṅre do alom paṛao ocoyińạ.

⁸ Setakʼre amakʼ asambheṛ dulạṛ reakʼ katha ańjomạńme, ente iń do am cetanregeń ṭehãḍ akana; ar okaṭakʼ horte calakʼ hoyokʼ ona hõ udukʼạńme, ente ińakʼ ontor do am secʼgeń rakapʼ akatʼtińạ.

⁹ E Probhu Isor, ińren bạirikoakʼ ti khon bańcaoińme baṛe, ente iń do amregeń hirlạ akana.

¹⁰ Amakʼ sana leka kạmi lạgitʼ cetʼạńme, ente am dom ińren Isor kana; amren bhạlạiyicʼ Jiu hotete mitʼ são horre ạyurińme.

¹¹ E Probhu Isor, amakʼ ńutum iạte nãwã daṛe baṛe danạńme; ar amakʼ dhorom iạte gạr khon bańcaoińme.

¹² Amakʼ asambheṛ daya iạte ińren bạiriko mohor meṭaokom; ar sanam lekan gạr khon nosṭo giḍikom ente iń do amren golam kạnạń.