Sereńko 141 - সান্তালী বাইবেল

Ạyupʼ reakʼ koejoṅ

¹ E Probhu Isor, amiń hohowam kana, am do usạrate iń ṭhen hijukʼme; ar amiń hohowamre ańjomtińme baṛe.

² Ińakʼ koejoṅ do am samaṅre dhup leka bujhạukʼma, ińakʼ ti kin reakʼ ataṅ do ạyupʼ reakʼ samaṅokʼakʼ leka ente iń do am samaṅre hạjirgeń tahen kana.

³ E Probhu Isor, ińakʼ mẽtʼãhãre pharadarko dohokom, ar ińakʼ luṭi silpiń do horhoytińme.

⁴ Ińakʼ mon do jãhãn bạṛicʼ jinis secʼ alom sen ocowakʼa, jemon bedhoromko sãote bạṛicʼ kạmire aloń seledokʼ; ar onkoakʼ bhage bhage jomakʼ jemon aloń jom.

⁵ Mitʼṭen Isor botorae hoṛ do ińe daleńma, onage ińakʼ pạtiạrtetʼ do hoyokʼa. Uni do ińe egerińma, ar ona do ińakʼ bohokʼre sunum ojokʼ akatʼ leka hoyokʼa; ińakʼ bohokʼ do ona aloe baṅakʼma. Menkhan ińakʼ koejoṅ do jaoge bedhoromkoakʼ kạmi upạrte tahena.

⁶ Onkoren bikʼcạrko do buru khonko ḍheka ńur ocokʼma; onko do ińakʼ kathako luturakʼma, ente ona do dumur rasa lekana.

⁷ Manwa do cetʼleka hasako cas paṛakʼetʼkan onkage aleakʼ jaṅko do patal puri reakʼ duạr ṭhen chirchạtur akana.

⁸ Menkhan E Probhu Isor, ińakʼ mẽtʼ do am secʼge menakʼa; iń do amrege asrayiń hatao akada, iń do gujukʼ reakʼ tire alom alae giḍikạńạ.

⁹ Onko do iń lạgitʼ okaṭakʼ jhạliko oḍao akatʼ ona khon rukhiyạyińme; ar bedhoromkoko oḍao akatʼ pạsi khon hõ bańcaoińme.

¹⁰ Bạṛicʼ hoṛko do akoakʼ jhạlirgeko khańjokʼma, ar unre iń do napaetegeń parom calakʼa.