Sereńko 140 - সান্তালী বাইবেল

Rukhiyạkʼ lạgitʼ koejoṅ

¹ E Probhu Isor, bạṛicʼ hoṛkoakʼ ti khon bańcaoińme; sasantaokoakʼ ti khon rukhiyạyińme.

² Onko do mon monte bạṛicʼ phundiko aṭaoa ar din hilokʼko jhogṛakʼa.

³ Onko do biń leka akoakʼ alaṅko laser akada; onkoakʼ luṭire do bińakʼ bisge menakʼa.

⁴ E Probhu Isor, bạṛicʼkoakʼ ti khon bańcaoińme. Ar santaokan hoṛkoakʼ ti khon rukhiyạyińme; ińakʼ jaṅga jemon leńjedokʼ tiń onate onko do phundiko aṭaoeda.

⁵ Bạḍại hoṛko do iń lạgitʼ pạsi baberko oḍao akada; onko do hor aṛere jhạliko aṭetʼ akada ar iń lạgitʼ jhampako dohoakada.

⁶ E Probhu Isor, amiń metam kana, “Am kangeam ińren Isor do.” E Probhu Isor, ińakʼ nehõrjoṅ baṛe luturakʼme.

⁷ E Probhu Isor, ińakʼ bańcao reakʼ daṛe, lạṛhạire amge ińakʼ bohokʼ aḍtińme.

⁸ E Probhu Isor, bạṛicʼkoakʼ monsubạ do alom purạu ocoytakoa; onkoakʼ soṛojontro hõ alom jo baha ocoytakoa, jemon bạḍạite aloko phulạukʼ. (Sela)

⁹ Okoe ińko esetʼ ạcur akadiń ar onkoakʼ moca okako behok akatʼ ona do onkoakʼ bohokʼrege paṛaokʼma.

¹⁰ Onko cetanre jolokʼkan aṅgrage baṛe ńurakoma; ar seṅgelre, khạndri ghaḍlakʼre onko doko khadle giḍi ocokʼma; jemon tishõ onḍe khon aloko rakapʼ daṛeakʼ.

¹¹ Oktako do disạmre ạidạri aloko ńam ma; ar santaokan hoṛ do muhin jemon jao ghuṛiye khudạu baṛako.

¹² Ińiń baḍaea Probhu Isor do dukokʼko secʼ menaea ar nacarkoakʼ do hok reakʼe bicạra.

¹³ Dhorom hoṛ do khạṭige amko sarhaomea, ar ontorre khạṭi hoṛ do am samaṅreko girobasokʼa.