Sereńko 14 - সান্তালী বাইবেল

Manwakoakʼ bạṛicʼtetʼ

¹ Bebuj hoṛ doko mena Isor do bạnugicʼan. Onkoakʼ sobhab do bạṛicʼgea ar kạmiko hõ hirkhạgetakoa. Bhageye kạmikan hoṛ do okoe hõ bạnukʼkoa.

² Probhu Isor do serma khon latarte manwa secʼe beṅgetʼkeda, ar ńeljoṅe menana sạriyakʼ reakʼ ạkilte jãhãeko taṛameda se baṅa, ar Isorakʼ sana leka jãhãeko kạmikana se baṅa.

³ Uni doe ńelkeda, sanamkoge sạri hor khonko ocokʼ akana, ar jotoge mitʼ domteko bạṛicʼ akana; bhageakʼ kạmi lạgitʼ do okoe hõ bạnukʼkoa, mitʼ hoṛ hõ baṅa.

⁴ Bạṛicʼakʼko kạmikanko do cetʼ nunạkʼgeko bebujgea? Hoṛko cetʼleka jomakʼko jometʼkan onkage onko do ińren hoṛko jometʼkoa; onko do Probhu Isor hõ bako hohoae kana.

⁵ Isor do acʼren dhorom hoṛko sãote menaea, onate onko hoṛ do ạḍi botor paṛao akoa.

⁶ Ape okoe do bạṛicʼakʼpe kạmikan, ape do nacar hoṛkoakʼ kạmipe bạṛicʼetʼtakote lajaorepe paṛaoetʼkoa, menkhan Probhu Isorge onkoren hirlạ do.

⁷ Israelkoakʼ babańcao do Sion khonge hijukʼa; Probhu Isor do tinre acʼren hoṛkoakʼ dosae ruạṛkatakoa unre Jakob bõskoren doko rạskạkʼa, ar Israelko hõko kusikʼa.