Sereńko 139 - সান্তালী বাইবেল

Isor do purạ puriye baḍaea are dandokʼkana

¹ E Probhu Isor, am dom biḍạu aṭkar akadińạ arem baḍae akadińạ.

² Jãhãnakʼgeń cekayetʼ am do jotogem baḍaekana; am do sạṅgiń khonge ińakʼ mon reakʼ hudis bundiskom baḍae daṛeakʼkana.

³ Am do ińakʼ kạmi ar jirạujoṅ reakʼ bhagetege khojem hataoeda; am do ińakʼ jion hor reakʼ hõ bhagetegem baḍaea.

⁴ E Probhu Isor, jãhãnakʼ kathage ạuri roṛre am do ona reakʼem baḍaekana.

⁵ Am do joto secʼtegem esetʼ ạcur akadińạ, ar am gobolrem dohoakadińạ.

⁶ Amakʼ noa akel do iń lạgitʼ bujhạujoṅ do muskilgea; ona do ạḍitetʼ usula, ohogeń tiokʼ daṛelea.

⁷ Amren sonot Jiu ṭhen khon iń do okateń calakʼa? Ar am samaṅ khon do cetʼ jãhãteń dạṛ daṛekea?

⁸ Sermateń dejokʼ khan, onḍe hõ amge; patal purireń aṭetʼle khan, onḍe hõ menama;

⁹ Piyạṅ payaṅ reakʼ phạ̃kṛạ̃kʼ iń hatao lekhan, ar jalapuri reakʼ mucạtʼ iń calaolen khan,

¹⁰ onḍe hõ amakʼ ti do ińe ạyurińa, ar amakʼ jojomti do kajakteye sapʼ ṭarhao akadińạ.

¹¹ Ariń men lekhan, “Ńut doe esetʼ ạcurińạ, ar iń beṛhaete okaṭakʼ marsal menakʼ ona do ńut utạrokʼa,” Enhõ onate jãhãn lab do baṅ hoyokʼa;

¹² ente ona ńut am ṭhen do baṅ ńuta. Ńindạ do siń lekage marsalgea; am ṭhen do ńut ar marsal banarge somangea.

¹³ Am do ińakʼ ontorem sirjạuakada; ar eṅgat kukhirege ińakʼ hoṛmo hạṭińko mitʼ dhaotem benao akada.

¹⁴ Iń doń gun manao joharam kana, ente iń do hahaṛa lekateń benao akana; hahaṛagea amakʼ kạmiko do, ar ona do bhagetegeń baḍaea.

¹⁵ Tinre iń do danaṅreń benao ocolena, ar eṅgat kukhire tinre ińakʼ hoṛmoko benaokʼkan tahẽkana, unre ińakʼ saj am khon oko do baṅ tahẽkana.

¹⁶ Amakʼ mẽtʼ do ińakʼ baṅ benao akan hoṛmoe ńelakada. Iń lạgitʼ niṭ dohoakan dinko ạuri ehobokʼre, amakʼ puthire onako reaṅ jotoge ol akan tahẽkana.

¹⁷ E Isor, amakʼ noa hudisakʼko iń ṭhen do damangea! Ar onako do lekhare ḍhergea.

¹⁸ Onakoń lekhale khan ona reakʼ lekha do gitilko khon hõ ḍherge hoyokʼa. Iń do tinreń ebhenokʼa unre am ṭhengeń tahenkana.

¹⁹ E Isor, ińakʼ khojogokʼ do bạṛicʼ hoṛko marao giḍikakome. E mãyãm joro ocoyetʼkan hoṛko, iń khon pharakokʼpe.

²⁰ Bạṛicʼ hudiste onko do am reaṅ aema kathako roṛa; ar amren bạiriko do ạuṛi pạthạuṛi amakʼ ńutumko ńumeda.

²¹ E Probhu Isor, okoe do amko kurudam kan onko do cetʼ bạń kurudako kana? Ar okoe am upạrteko teṅgonkan onko do cetʼ bạń hirkhạwako kana?

²² Onko do purạteń kurudako kana; ar ińren bạiriko mentegeń hudisetʼkoa.

²³ E Isor, bhagete biḍạu aṭkarińme, ar ińakʼ ontor reakʼ dosa baḍaeme; ar biḍạu aṭkarińme, ińakʼ bạṛicʼ hudis reakʼ katha baḍaeme.

²⁴ Ar ńelme amiń duk ocome nonkan ińakʼ monre menakʼa se baṅa; am do jaejug reakʼ horre ạyurińme.