Sereńko 138 - সান্তালী বাইবেল

Gun manao reakʼ koejoṅ

¹ E Probhu Isor, ińakʼ goṭa ontorte iń do amiń sarhaomea; ar debotako samaṅre hõ amiń oṛhẽ sereńama.

² Amakʼ sonot oṛakʼ secʼ samaṅkateń ḍoboga, ar amakʼ asambheṛ dulạṛ ar pạtiạrtetʼ iạte amiń gun manao joharama; ente amakʼ gokʼakʼ purạu lạgitʼ oka lekam sodorakan ona do amakʼ namḍak khon hõ maraṅgea.

³ Iń do tinreń hohowatʼmea unre am dom roṛ ruạṛạdińa; ińakʼ ontor reakʼ daṛete am do dilanicʼem hoyocokedińa.

⁴ E Probhu Isor, amakʼ moca reakʼ katha ańjomkate dhạrtiren sanam rapajko do amko sarhaomea.

⁵ Onko do Probhu Isorakʼ kạmi iạteko sereńa, ente Probhu Isorakʼ ṭhonok do maraṅgea.

⁶ Probhu Isor do jotowakʼko cetanre menaere hõ enhõ uni do nindhạnkoe beṅgetʼakoa, menkhan bạḍạiko doe sạṅgiń khongeye baḍaekoa.

⁷ Tinre iń do gạr talateń calakʼa unre ińakʼ jiwi do rukhiyại tińme; amakʼ ti tiạrte ińren bạirikoakʼ edre cabaetakome, ar amakʼ jojomtite rukhiyạyińme.

⁸ Probhu Isor do iń lạgitʼ okaṭakʼe ṭhik dohoakatʼ onae purạua. E Probhu Isor, amakʼ khạndri dulạṛ do jaejug hạbicʼ tahenma; ar okaṭakʼ apnar titem kạmikan ona do alom aṛakʼ giḍiya.