Sereńko 136 - সান্তালী বাইবেল

Gunmanao reakʼ sereń

¹ Probhu Isor gun manao joharaepe, ente uni doe bhagegea; uniyakʼ dulạṛ do jaejuggetaea.

² Isorkoren Isor sarhaoepe; ente uniyakʼ dulạṛ do jaejuggetaea.

³ Probhukoren Probhu gun manao joharaepe; ente uniyakʼ dulạṛ do jaejuggetaea.

⁴ Okoe do eskarge maraṅ ar hahaṛawakʼkoe kạmikan uni gun manao joharaepe; ente uniyakʼ dulạṛ do jaejuggetaea.

⁵ Okoe do acʼakʼ bujte sermae benao akatʼ uni gun manao joharaepe; ente uniyakʼ dulạṛ do jaejuggetaea.

⁶ Okoe do dakʼ cetanre ote bạisạu akatʼ uni gun manao joharaepe; ente uniyakʼ dulạṛ do jaejuggetaea.

⁷ Okoe do maraṅ maraṅ marsalkoe sirjạu akatʼ uni gunmanao joharaepe; ente uniyakʼ dulạṛ do jaejuggetaea.

⁸ Uni do siń lạgitʼ siń candoe sirjạu akadea; ente uniyakʼ dulạṛ do jaejuggetaea.

⁹ Uni do ńindạ lạgitʼ ńindạ cando ar ipilkoe sirjạu akatʼkoa; ente uniyakʼ dulạṛ do jaejuggetaea.

¹⁰ Okoe do Misorren pạhil janam hoponkoe ńẽtʼletʼko uni gun manao joharaepe; ente uniyakʼ dulạṛ do jaejuggetaea.

¹¹ Okoe do onko tala khon Israelkoe oḍok ạguletʼko uni gun manao joharaepe; ente uniyakʼ dulạṛ do jaejuggetaea.

¹² Uni do kuṭhin ar daṛeanakʼ tite onkoe oḍok ạguletʼkoa; uniyakʼ dulạṛ do jaejuggetaea.

¹³ Okoe do Arakʼ doreãoe bar hạṭińletʼ tahẽkan uni gun manao joharaepe; ente uniyakʼ dulạṛ do jaejuggetaea.

¹⁴ Uni do Israelko jalapuri talateye paromletʼkoa; ente uniyakʼ dulạṛ do jaejuggetaea.

¹⁵ Menkhan Pharao ar uniren lạṛhại phạdko do arakʼ jalapurireye koṭa giḍikatʼkoa; ente uniyakʼ dulạṛ do jaejuggetaea.

¹⁶ Okoe do acʼren hoṛko hahaṅkar talateye idiletʼko uni gun manao joharaepe; ente uniyakʼ dulạṛ do jaejuggetaea.

¹⁷ Okoe do maraṅ maraṅ rapajkoe ńẽtʼletʼko uni gun manao joharaepe; ente uniyakʼ dulạṛ do jaejuggetaea.

¹⁸ Uni do daṛean rapajkoe gocʼletʼkoa; ente uniyakʼ dulạṛ do jaejuggetaea.

¹⁹ Uni do Amorikoren raj Sihone gocʼledea; ente uniyakʼ dulạṛ do jaejuggetaea.

²⁰ Uni do Basonren raj Oge gocʼledea; ente uniyakʼ dulạṛ do jaejuggetaea.

²¹ Uni do onkoakʼ disạm ạidạri lekateye ematʼkoa; ente uniyakʼ dulạṛ do jaejuggetaea.

²² Uni do onkoakʼ disạm ạidạri lekate acʼ botoraekan Israelkoe ematʼkoa; ente uniyakʼ dulạṛ do jaejuggetaea.

²³ Uni do aboakʼ bạpuṛicʼ dosaye disạketʼtabona; ente uniyakʼ dulạṛ do jaejuggetaea.

²⁴ Okoe do bạirikoakʼ ti khon aboe bańcaoketʼbon uni gun manao joharaepe; ente uniyakʼ dulạṛ do jaejuggetaea.

²⁵ Okoe do sanam jiwiyanko jomakʼe emako kan uni gun manao joharaepe; ente uniyakʼ dulạṛ do jaejuggetaea.

²⁶ Ape do sermaren Isor gun manao joharaepe; ente uniyakʼ dulạṛ do jaejuggetaea.