Sereńko 135 - সান্তালী বাইবেল

Sarhao sereń

^1-2 Probhu Isorakʼ sarhao hoyokʼtae ma. Probhu Isor gun manao joharaepe; E Probhu Isorren golamko, ar okoe do Probhu Isorakʼ oṛakʼrepe kạmikan, ar okoe do Isorakʼ bakher racarepe kạmikan ape do Probhu Isor sarhao sereńaepe.

³ Probhu Isor sarhaoepe, ente uni doe bhagegea; uniyakʼ ńutum õṛhẽtaepe, ente ona do ạḍi bhagegea.

⁴ Probhu Isor do Jakob acʼ lạgitʼe bachaowana, ar Israel do acʼakʼ ạidạri lekage.

⁵ Ińiń baḍaea Probhu Isor doe maraṅgea; aboren Probhu Isor do joto debotako khon hõe maraṅgea.

⁶ Ot ar sermare, jalapuri ar khạndriyakʼkore Probhu Isor do acʼakʼ kusi sana lekae kạmikana.

⁷ Unige pirthimi reakʼ mucạtʼ khon rimile rakapʼ ocoyeda; unige dakʼ lạgitʼ bijliye tear ocoyeda.

⁸ Uni do Misorren pạhil janamkoe ńẽtʼletʼkoa, hoṛren ar janwarren sanamkoge.

⁹ E Misor, uni do am talare Pharao ar uniren kạmiyạko birudre acʼakʼ cinhạ ar hahaṛa kạmikoe kạmileda.

¹⁰ Uni do aema jạtrenkoe ńẽtʼletʼkoa ar daṛean rapajkoe gocʼletʼkoa.

¹¹ Uni do Amorikoren Sihon raj, ar Bashanren Og raj, ar Kananren sanam rapajkoe gocʼletʼkoa.

¹² Uni do onkoakʼ disạm acʼren hoṛ Israelko ạidạri lekateye danatʼkoa.

¹³ E Probhu Isor, amakʼ ńutum do jaejug hạbicʼ tahenkana. E Probhu Isor, piṛhi cetan piṛhige amakʼ ńutum disạkʼtama;

¹⁴ ente Probhu Isor do acʼren hoṛko dhorom reakʼe bicạrtakoa, ar acʼren golam doe mãyã akoa.

¹⁵ Eṭakʼ jạtkoren sona ar rupạte benao murhutʼko do; manwa tite benaoko kanako.

¹⁶ Onkoakʼ do moca menakʼgea menkhan katha bako roṛ daṛeakʼa, mẽtʼ menakʼtakoa, bako ńeńela;

¹⁷ lutur menakʼgetakoa menkhan bako ańjom ńama, onkoakʼ mocare do cetʼ sãhetʼge bạnukʼtakoa.

¹⁸ Okoe nokoko benao akatʼko ar okoe onko cetanreye pạtiạukʼ are bhorsakʼ onko hõ murhutʼ lekako hoyokʼa.

¹⁹ E Israel bõsrenko, Probhu Isor sarhaoepe; E Aron bõsrenko, ape do Probhu Isor sarhaoepe.

²⁰ E Lewi bõsrenko, Probhu sarhao sereńaepe; E Probhu Isor botoraekanko, ape do uni sarhaoepe.

²¹ E Probhu Isor, okoe do Jerusalemreye tahenkan, uniyakʼ sarhao do Sion khon hoyokʼma. Probhu Isorakʼge sarhao hoyokʼtae ma.