Sereńko 132 - সান্তালী বাইবেল

Mundil reakʼ sarhao

¹ E Probhu Isor, am do Dạudakʼ sanam kosṭo reakʼ katha disạime.

² Uni do Probhu Isor ṭhene kiriạlena, Jakobren uni daṛeanicʼ Isor ṭhen noae gokʼletʼ tahẽkana,

³ “Iń do ińakʼ oṛakʼte bạń bolokʼa, se aṭetʼre hõ bạń giticʼa;

⁴ ińakʼ mẽtʼre jạpitʼ bạń hecʼ ocowakʼa, ar pipnire dudṛum hõ bạń hecʼ ocowakʼa;

⁵ ar tin hạbicʼ Probhu Isor lạgitʼ mitʼṭecʼ ṭhạ̃i bạń sendra ńam, Jakobren uni daṛeanicʼ Isor lạgitʼ mitʼṭecʼ tahen ṭhạ̃i bạń sendra ńam.”

⁶ Abo do Ephrata khon gokʼakʼ sinduk reakʼ bon ańjomleda, ar Jayerakʼ ṭạnḍirege ona bon ńamleda;

⁷ Delabon, abo do uniyakʼ tahen ṭhạ̃ite bon calakʼa, ar uniyakʼ lebedokʼ ganḍore ikhṛumkate bon sewawaea.

⁸ E Probhu Isor, ma beretʼme, amakʼ jirạukʼ ṭhạ̃ite hijukʼme; dela hijukʼme, ar amakʼ daṛeanakʼ sinduk hijukʼma.

⁹ Amren naekeko do dhorom reakʼ kicricʼko horogma, ar am botoram kanko do rạskạteko sereńma.

¹⁰ Amren guti Dạud iạte amem ojokʼ bahal akatʼko hoṛkoakʼ koejoṅ do alom dea giḍikakʼa.

¹¹ Probhu Isor do Dạud ṭhen noageye kiriạlena one okaṭakʼ do tisge bae rạpud, “Amren mitʼṭen hopon do amakʼ siṅghạsonreń duṛubea.

¹² Amren hoponko ińiń bandhao akatʼ bondobosko manao lekhan ar ińakʼ katha lekako senlen khan one okaṭakʼ iń cetʼako, enḍekhan onkoren hoponko do piṛhike piṛhi amakʼ siṅghạsonreń duṛupʼkoa.”

¹³ Probhu Isor do Sione bachao akawana; uni do tahen lạgitʼ noageye khojleda.

¹⁴ Uniye menleda, “Noa do ińakʼ jaejug reakʼ jirạukʼ ṭhạ̃i kana; iń do nonḍegeń tahena, ente iń do noageń khojleda.

¹⁵ Sion do aema jomakʼkoteń bhorakʼa; ar jomakʼkote onḍenko reṅgecʼ orecʼkoń bi ocokoa.

¹⁶ Iń do Sionren naekeko bańcaokʼ reakʼ kicricʼ iń horokʼakoa; onḍe ińko botorạńkan hoṛ do ãṭ aṛaṅteko sereńa.

¹⁷ Onḍe iń do Dạud lạgitʼ mitʼṭen daṛean bõskoń benao rakapʼkoa; ar ińren ojokʼicʼ lạgitʼ iń do mitʼṭecʼ diuheń tear dohoya.

¹⁸ Ar uniren bạiriko do lajao reakʼ kicricʼ iń horokʼ ocokoa, menkhan uniyakʼ bohokʼre do jhak jhakaokʼ kan mukuṭ tahena.”