Sereńko 12 - সান্তালী বাইবেল

Goṛo ńam lạgitʼ koejoṅ

¹ E Probhu Isor, bańcaoińme, am botoramko do ar bạnukʼkoa; ar pạtiạran hoṛko do manwa tala khonko ocokʼ akana.

² Manwa do manwa ṭhen eṛeko roṛetʼkana; onko do luṭite kathako roṛa ar ontor do eṛete perecʼgetakoa.

^3-4 Okoeko men, “Alaṅ reakʼ jortege bon jitạukʼa; ar aboakʼ luṭi do abo secʼge menakʼa, aboren mạlik do okoeye hoekokʼa?” Onkoakʼ luṭi ar bạḍạite perecʼ alaṅ do Probhu Isorge jemone getʼ giḍikatako.

⁵ Probhu Isore meneda, “Nacarkoakʼ ujạṛokʼ ar reṅgecʼ orecʼkoakʼ rakʼjoṅte iń do ńitgeń beredokʼa, ar bańcao tahen lạgitʼ okoeyakʼ ontorre monejoṅakʼ menakʼ onko doń bańcao dohokoa.”

⁶ Probhu Isorakʼ katha do nirạ kathako kana; ona do seṅgelte rapakʼ sapha akatʼ rupạ leka, ar eae dhao galao akatʼ rupạ lekage.

⁷ E Probhu Isor, amgem bańcao dohokoa; ar noa piṛhiren hoṛkoakʼ ti khon jaejug hạbicʼ amge onko mimitʼkom rukhiyạkoa.

⁸ Hoṛko bạṛicʼakʼ tinre manotko emakʼa unre bedhoromko do sạdhinte beṛhaeteko dãṛãbaṛaea.