Sereńko 119 - সান্তালী বাইবেল

Probhu Isorakʼ ạn

¹ Bhạgangeako onko do, okoe sạbitko colonetʼkan ar Probhu Isorakʼ hukum lekako calakʼkan.

² Bhạgangeako onko do, okoe uniyakʼ kathako ańjometʼkan ar goṭa ontorte uniyakʼ sana lekako calakʼkan.

³ Onko do jãhãnakʼ bako behoka; onko do Probhu Isorakʼ horregeko taṛama.

⁴ Am do ạn ạrikom ṭhik dohoakada jemon joton salakʼ onale manao.

⁵ Ohae! Amakʼ ạn leka calakʼ lạgitʼ ińakʼ monre diṛho akae jemoniń tahen.

⁶ Enḍekhan amakʼ sanam hukumkoń manao iạte iń do bạń lajao ocokʼa.

⁷ Amakʼ dhoromte perecʼ ạn ạri reakʼ sikhạunate khạṭi ontorte amiń sarhaomea.

⁸ Iń do amakʼ ạn lekageń calakʼa; ar bạń bạgi giḍimea.

Probhu Isorakʼ ạn batao

⁹ Juạn do cekate acʼakʼ jion khạṭiye doho daṛeketaea? Uni do eken amakʼ kathako leka senakʼ iạtegeye daṛeakʼa.

¹⁰ Ińakʼ goṭa ontorte iń do am baḍaeme lạgitʼ iń ahkaokʼ kana; amakʼ hukum bahre do alom dãṛã ocoyińạ.

¹¹ Amakʼ katha do ińakʼ ontorreń dohoakada, jemon am upạrte aloń kại.

¹² E Probhu Isor, am dom bhạgangea. Amakʼ ạnko cetʼạńme baṛe.

¹³ Amakʼ moca khon okako ạn oḍokokʼkan ona do ińakʼ mocageye sodortama.

¹⁴ Manwa damanakʼ dhone ńam lekhan cetʼlekae rạskạkʼ, onkage amakʼ katha manaote iń doń rạskạkʼ kana.

¹⁵ Iń do amakʼ ạn ạriko reaṅiń ganḍonokʼ kana, ar amakʼ hor reakʼkoń moneyakʼ kana.

¹⁶ Amakʼ ạnrege rạskạ doń ńameda; ar amakʼ katha do bạń hiṛiń daṛeakʼ kana.

Probhu Isorakʼ ạnrege bhạlại do

¹⁷ Amren nui golam baṛe bhạlạiyeme jemon jiwetʼiń tahen ar amakʼ katha lekań sen daṛeakʼ.

¹⁸ Ińakʼ mẽtʼ baṛe jhicʼkạtińme jemon amakʼ cecetʼakʼ talare hahaṛawakʼko reaṅ jemoniń ńel daṛeakʼ.

¹⁹ Iń do dhạrtire girobas akan mitʼṭen porjạt hoṛ kạnạń; amakʼ hukum do iń khon alom danaṅ dohokakʼa.

²⁰ Amakʼ ạn ạriko baḍae lạgitʼ jao okte ińakʼ jiwi do talga tạwạgokʼ akantińạ.

²¹ Am do bạḍại hoṛkom dhomkaoetʼkoa; onko do sarapan hoṛ kanako, onko do amakʼ hukum khonko chingạu akana.

²² Opoman ar landa dhutʼ do iń khon sạṅgińkakʼme, ente iń do amakʼ katha lekań senokʼkana.

²³ Disạm cakʼlaoko do duṛupʼkate iń birudreko roṛetʼkanre hõ enhõ amren golam do amakʼ ạnregeye ganḍonokʼ kana.

²⁴ Amakʼ kathage ińakʼ rạskạ do; onako do solhae imạń kana.

Probhu Isoakʼ ạn dohoy lạgitʼ mone muruk

²⁵ Iń do dhuṛireń guṛdạu akana; ar amakʼ katha leka nãwã daṛe baṛe danạńme.

²⁶ Ińakʼ jion reakʼ sanamakʼ doń baḍae ocoakatʼmea, ar am do ińem roṛ ruạṛ akadińạ; amakʼ ạnre sikhạuna emạńme;

²⁷ Amakʼ ạn ạri reakʼ hukumko bhujhạu reakʼ daṛe baṛe imạńme; enḍekhan iń do amakʼ hahaṛa kạmiko reaṅiń ganḍon daṛeakʼa.

²⁸ Dukte ińakʼ jiwi do loraokʼkan tińạ; amakʼ katha lekage daṛe danạńme.

²⁹ Iń khon eṛeakʼ baṛe sạṅgiń ocoyme; ar dayakate amakʼ cecetʼakʼ danạńme.

³⁰ Iń do pạtiạr reakʼ horiń bachao akawana; amakʼ ạn ạriko iń samaṅreń dohoakada.

³¹ E Probhu Isor, amakʼ katha doń sapʼkajak akada; am do alom lajao ocoyińạ.

³² Amakʼ hukumko reakʼ horteń ńir calakʼa, ente am do ińakʼ ontorem jhicʼakatʼ tińạ.

Buj lạgitʼ koejoṅ

³³ E Probhu Isor, amakʼ ạnko reaṅ cetʼạńme; Jion reakʼ mucạtʼ hạbicʼ iń do ona lekań senokʼa.

³⁴ Iń bujhạu lạgitʼ daṛe emạńme, jemon amakʼ hukum lekań senokʼ ar ińakʼ sanam ontorte onań palon daṛeakʼ.

³⁵ Amakʼ hukum reakʼ horre ạyurińme, ente iń do onategeń rạskạkʼa.

³⁶ Behok lab secʼ ińakʼ ontor alo ạcurokʼma, bickom amakʼ katha secʼgeń ạcurokʼ.

³⁷ Eṛeakʼ jinis secʼ khon ińakʼ mẽtʼ do ạcur ruạṛtiń me; ar amakʼ horte calakʼ lạgitʼ nãwã daṛe baṛe danạńme.

³⁸ Amren nui golam ṭhen okaṭakʼem gokʼakatʼ ona baṛe purạume, jemon amiń botoram.

³⁹ Ińakʼ opoman sạṅgińkakʼme one oka reaṅiń botorokʼkan; amakʼ ạn ạri do sạrige bhagegea

⁴⁰ Amakʼ ạn ạriko doń uihạretʼkana; am dom dhoromgete nãwã daṛe baṛe danạńme.

Probhu Isorakʼ ạnre bhorsakʼ

⁴¹ E Probhu Isor amakʼ asambheṛ dulạṛ udukʼạńme; amakʼ gokʼakʼ lekage bańcaoińme.

⁴² Enḍekhan okoeko landa dhutʼạńkan onkoń roṛ ruạṛ daṛeakoa, ente iń do amakʼ kathareń bhorsakʼ kana.

⁴³ Amakʼ sạriyakʼ reakʼ katha ińakʼ moca khon alogem rejeńa, ente amakʼ ạn ạriko cetanrege iń doń as akana.

⁴⁴ Iń do jao ghuṛi amakʼ hukumiń senakʼkana, ar jaejug hạbicʼgeń manao idiya.

⁴⁵ Iń do begor tạkicʼtege jioniń khemaoa, ente amakʼ ạn ạrikoń uihạreda.

⁴⁶ Am okakom menetʼkan ona do ińren raj samaṅreń roṛa; iń do bạń lajaokʼa.

⁴⁷ Amakʼ sanam hukumkoń pańjaere iń doń rạskạkʼ kana, ente onakoń dulạṛeda.

⁴⁸ Amakʼ sanam hukumko cetanre ińakʼ khạndri ahkaokʼ mon do menakʼa, ente onako doń dulạṛeda; ar amakʼ ạnkoń ganḍonjoṅ kana.

Probhu Isorakʼ ạnre kajak biswạs

⁴⁹ Amren golam ṭhen okaṭakʼem gokʼakatʼ ona baṛe disạime; ona hotetege am do ińem as akadińạ.

⁵⁰ Amakʼ katha okaṭakʼ nãwã daṛeye danạń, kosṭokʼ oktere onage ińakʼ jiwi raṛecʼ do hoyokʼtińạ.

⁵¹ Bạḍạiko do ińko landa dhutʼạń kana, menkhan amakʼ hukum khon thoṛa hõ iń do bạń ocokʼakana.

⁵² E Probhu Isor, ḍher din lahare emakʼ amakʼ ạn ạriko reakʼ kathań disạite iń do apnarte jiwi raṛecʼiń ńameda.

⁵³ Bạṛicʼ hoṛkoakʼ bạṛicʼtetʼ ńelte ạḍitetʼ iń raṅgaokʼ kana, onko do amakʼ hukumko bạgi akada.

⁵⁴ Iń do tinạkʼ din noa dhạrtiren hoṛiń hoyakan unạkʼ din amakʼ ạnkoge ińakʼ sereń do hoyokʼa.

⁵⁵ E Probhu Isor, iń do amakʼ hukumiń manaoeda, ar ńindạ do amakʼ kathań disạyeda. Ińakʼ heowa do noage je,

⁵⁶ iń do amakʼ ạn ạriko lekań senokʼa.

Probhu Isorakʼ ạn dohoy

⁵⁷ E Probhu Isor, am kangeam ińakʼ dhon do; iń do amakʼ katha leka calakʼ reakʼ iń kiriạkʼ kana.

⁵⁸ Iń do mon murukkate amakʼ dayań khojokʼ kana; amakʼ katha leka ińre baṛe dayakʼme.

⁵⁹ Ińakʼ dãṛãn reaṅ hudiskateń ńelakada, ar onate amakʼ katha secʼ ińakʼ jaṅgań ạcur akatʼtińạ.

⁶⁰ Okakom hukum akawạdiń ona do ạḍi usạrageń manao akada, ar baṅgeń bilomleda.

⁶¹ Bạṛicʼ hoṛkoakʼ baberte iń doń tol akana menkhan amakʼ hukum do bạń hiṛińakada.

⁶² Amakʼ dhoromte perecʼ ạn iạte sarhaome lạgitʼ iń do tala ńindạ hõń beredokʼkana.

⁶³ Okoe amko botoram ar amakʼ ạn ạriko manaoetʼ iń doń onko sãotenko kana.

⁶⁴ E Probhu Isor, dhạrti do amakʼ asambheṛ dulạṛte perecʼgea; ar amakʼ ạnko baṛe cetʼạńme.

Probhu Isorakʼ damanakʼ ạn

⁶⁵ E Probhu Isor, amakʼ katha lekage amren nui golam dom bhạlạiyede kana.

⁶⁶ Ińakʼ jemon bhage bud bicạr ar akel hoyokʼ onate iń baṛe cetʼạń me; iń do amakʼ sanam hukumkoreń bhorsa akana.

⁶⁷ Kosṭo ńam lahare iń do eṭakʼ horreń tahẽkan, menkhan ńitokʼ do amakʼ kathareń gobol akana.

⁶⁸ Am dom bhagegea arem bhạlạiyetʼa; amakʼ ạnko baṛe cetʼạńme.

⁶⁹ Bạḍạiko do eṛeakʼte ińko esetʼ ạcur akadińạ menkhan iń do mon muruk kate amakʼ ạn ạrikoń senakʼkana.

⁷⁰ Onkoakʼ ontor do itil leka ạuṛiyakʼgetakoa, menkhan iń do amakʼ sanam hukumre rạskạń ńameda.

⁷¹ Okaṭakʼ kosṭoń ńamakatʼ ona do iń lạgitʼ bhagege hoyakana; onate iń do amakʼ ạnkoń cetʼ daṛe akawada.

⁷² Amakʼ moca reakʼ hukum iń ṭhen do hajar hajar sona rupạ khon hõ damangea.

Probhu Isorakʼ ạn reakʼ hok bicạr

⁷³ Amakʼ titege ińem tear akadińạ, arem benao rakapʼ akadińạ; iń bujhạu lạgitʼ daṛe imạńme jemon amakʼ sanam hukumkoń baḍae daṛeakʼ.

⁷⁴ Okoe amko botoram onko do iń ńelteko rạskạkʼa, ente amakʼ gokʼakʼreń bhorsa akana.

⁷⁵ E Probhu Isor, ińiń baḍaea amakʼ ạn ạriko do dhoromte perecʼgea; ar amem pạtiạrge iạte ińem duk ocoakadińạ.

⁷⁶ Amren golam ṭhen am dom gokʼakada ar ona lekage amakʼ dulạṛ do ińakʼ jiwiye raṛecʼeda.

⁷⁷ Ińre amakʼ mãyã hijukʼma jemon jiwetʼiń tahen, ente amakʼ hukum doe rạskạ ocoyedeń kana.

⁷⁸ Eṛe katha roṛte ińakʼ lokshan lạgitʼ bạḍạiko doko lajaokʼma; menkhan iń do amakʼ ạn ạriko reaṅgeń ganḍonjoṅa.

⁷⁹ Okoe amko botoram ar amakʼ kathako bujhạu daṛeakʼkan onko do iń ṭhenko ruạṛ hijukʼma.

⁸⁰ Amakʼ ạn ạriko senakʼ jokhecʼ ińakʼ ontor do jemon khạṭi tahen, jemon lajaore aloń paṛaokʼ.

Rukhiyạ ńam lạgitʼ koejoṅ

⁸¹ Am dom rukhiyạyińạ ar ona ńel horte daṛe do komao hijukʼkantińạ; iń do amakʼ katharege asiń dohoakada.

⁸² Amakʼ gokʼakʼ purạukʼ reakʼ ńelhor iạte ińakʼ mẽtʼ do nijor idikʼ kantińạ; iń doń meneda, “Tisokʼ ińakʼ jiwi dom raṛejtińạ.”

⁸³ Darkha rasa dohoakatʼ kum cetʼleka dhũạte nosṭokʼ ińhõ onkageń hoyakana; enhõ amakʼ ạn do bạń hiṛińeda.

⁸⁴ Amren golamakʼ bahaokʼ do ar tinạkʼ din? Okoe ińko santaoedeń kan onko do tisem bicạrkoa?

⁸⁵ Bạḍạiko do iń lạgitʼ ghaḍlakʼko layeda; ar amakʼ hukum do bako manaoeda.

⁸⁶ Amakʼ sanam hukumko do pạtiạrgea. Ar hoṛko do eṛe roṛte ińko santaoedeń kana; am do goṛowạńme baṛe.

⁸⁷ Dhạrti khon onko do ińko mohor meṭaoedeń kan tahẽkana, menkhan amakʼ ạn ạri do bạń bạgi akada.

⁸⁸ Amakʼ khạndri dulạṛte am do nãwã daṛe baṛe emạńme, jemon amakʼ moca reakʼ katha lekań sen daṛeakʼ.

Probhu Isorakʼ ạnre biswạs tahen

⁸⁹ E Probhu Isor, amakʼ goha do sermare jaejug hạbicʼ diṛho akae menakʼa.

⁹⁰ Ar amakʼ pạtiạr do piṛhike piṛhi parom calakʼ kana; am do dhạrtim benaokʼ akada, ar ṭarhao menakʼa.

⁹¹ Amakʼ ạn ạriko leka teheńhõ jotowakʼ do ṭarhao menakʼa, ente onako do amakʼ gobolrege menakʼa.

⁹² Amakʼ jotowakʼ hukumre rạskạ bạń ńamle khan, iń do dukteń marao cabakokʼa.

⁹³ Amakʼ ạn ạriko do tishõ bạń hiṛińa, ente ona hotetege am do nãwã daṛem dan akawạdińa.

⁹⁴ Rukhiyạyińme baṛe, ente iń doń amren kangea; ar amakʼ ạn ạriko secʼ iń mone akawada.

⁹⁵ Bạṛicʼ hoṛko do maraoiń lạgitʼ koyokʼ horre menakʼkoa, menkhan amakʼ kathako iạte iń do khạndriyakʼkoń hudisjoṅ kana.

⁹⁶ Ińiń ńelakada jãhãnakʼ reakʼge puruntetʼ do bạnukʼa, menkhan amakʼ hukumko do joto secʼ khonge purungea.

Probhu Isorakʼ ạn-ạriko dulạṛ

⁹⁷ Iń do amakʼ hukum ạḍiń dulạṛeda! Ar goṭa dinge onań ganḍonjoṅ kana.

⁹⁸ Amakʼ sanam hukumkoge ińren bạiriko khon akelanicʼe hoyocoyediń kana, ente onako do sanam ghạṛicʼ iń soṅgete tahẽnkana.

⁹⁹ Ińren sanam cecetʼko khon iń doń akelanicʼ kana, ente amakʼ sanam kathako iń doń ganḍonjoṅ kana.

¹⁰⁰ Umeran hoṛko khon hõ iń do bạ̃ṛtiń bujhạueda, ente iń do amakʼ ạn ạrikoń senakʼ kana.

¹⁰¹ Joto lekan kại reakʼ hor khon ińakʼ jaṅga doń ocokʼakada, jemon amakʼ katha lekań sen daṛeakʼ.

¹⁰² Amakʼ ạn ạri reakʼ hor khon iń do bạń ocokʼakana, ente am do apnarte ińem cetʼakawạdińa.

¹⁰³ Amakʼ sanam gokʼakʼ do ińakʼ alaṅre heṛemgea! Ona do ińakʼ mocare dumur rasa khon hõ heṛemgea.

¹⁰⁴ Amakʼ ạn ạri khon iń do bicạr reakʼ budiń ńameda, onate iń do sanam eṛeakʼ reakʼ horkoń hirkhạwakʼ kana.

¹⁰⁵ Amakʼ katha do hor udukʼạń reakʼ diuhe kana, ona do ińakʼ calakʼ hor reakʼ marsalge.

Probhu Isorakʼ marsal

¹⁰⁶ Iń do amakʼ dhoromte perecʼ ạn ạri manaokate calakʼ reakʼ iń kiriạ akana, ar ona do kajaktegeń kiriạ akana.

¹⁰⁷ Iń do aema kosṭoń sahao akada; E Probhu Isor, amakʼ katha leka nãwã daṛe baṛe emạńme.

¹⁰⁸ E Probhu Isor, iń do ińakʼ kusileka okaṭakʼ sarhao reakʼ dãṛẽń samaṅam ona baṛe ataṅtińme, ar amakʼ ạn ạriko cetʼạńme.

¹⁰⁹ Ińakʼ jiwi do jao ghuṛi cuputʼkateń calakʼkanre hõ, enhõ amakʼ hukum do bạń hiṛińa.

¹¹⁰ Bạṛicʼ hoṛ do iń lạgitʼ pạsiko oḍao akada, menkhan iń do amakʼ ạn ạriko khon bạń ocokʼ akana.

¹¹¹ Amakʼ gohawakʼko jaejug hạbicʼ iń ạidạri akawana; onate ińakʼ ontor do rạskạkʼ kana.

¹¹² Jao ghuṛi, hẽ mucạtʼ hạbicʼge iń do amakʼ ạnko pańjae lạgitʼ ińakʼ ontoriń lawer akatʼtińa.

Probhu Isorakʼ ạnre nirại

¹¹³ Bar monan hoṛko do bạń kusiyakoa, menkhan amakʼ hukum doń dulạṛeda.

¹¹⁴ Amge ińren asray ar ińakʼ ḍhal do; amakʼ katharege iń do asiń dohoakada.

¹¹⁵ Ape okoe do bạṛicʼakʼpe kạmikan, ape do iń khon men pharakokʼpe, jemon ińren Isorakʼ hukumkoń doho daṛeakʼ.

¹¹⁶ Amakʼ gokʼakʼ leka am do sapʼ dohoyińme, onate iń do jiwetʼiń tahena; amre ińakʼ oka as menakʼtiń ona reaṅ am do alom lajao ocoyińạ.

¹¹⁷ Sabeńme, enḍekhan iń do rukhiyạń ńama, ar amakʼ ạn ạriko jaogeń manao idiya.

¹¹⁸ Amakʼ ạn khon okoe do sạṅgińteko calakʼkan onko dom nihạ̃t akatʼkoa, ente onkoakʼ phorphundi do ạuṛiyakʼgetakoa.

¹¹⁹ Dhạrtiren sanam bạṛicʼ hoṛko do mạilạ lekam pharaketʼkoa, ar onatege iń do amakʼ sanam kathakoń dulạṛeda.

¹²⁰ Am botorte hoṛmo do caṭokʼkantińạ; ar amakʼ ạn ạriko iạte iń doń botorokʼ kana.

Probhu Isorakʼ ạn batao

¹²¹ Iń do hok reakʼ iń bicạr akada ar dhoromiń kạmi akada; ar okoe ińko santaoedeń kan onkoakʼ tire do alogem aṛakʼ giḍikạńạ.

¹²² Am do amren golamakʼ bhạlại reakʼ bhar hataome; ar bạḍạiko ṭhen do alom santao ocoyińạ.

¹²³ Amakʼ dhorom khạtirte okaṭakʼem gokʼakatʼ ona purạu lạgitʼ ar amakʼ bańcao ńam reakʼ koyokʼ horte ińakʼ mẽtʼkin do nijor akantińạ.

¹²⁴ Amren golam sãote amakʼ asambheṛ dulạṛ lekate beoharińme baṛe, ar amakʼ ạnko hõ cetʼạńme.

¹²⁵ Iń do amren golam kạnạń; bujhạu lạgitʼ daṛe imạńme jemon iń do amakʼ kathań bujhạu daṛeakʼ.

¹²⁶ E Probhu Isor, ńitokʼ do kạmire lagaokʼ reakʼ somoe hoyakana; hoṛko do amakʼ hukumko bebatao akada.

¹²⁷ Onate iń do amakʼ sanam hukumko sona khon, khạṭi sona khon hõ bạ̃ṛtiń dulạṛeda.

¹²⁸ Amakʼ sanam ạn ạriko iń do mońjiń metakʼkana, ar sanam eṛeakʼ horkoń hirkhạwakʼ kana.

Probhu Isorakʼ ạn purạu reakʼ sana

¹²⁹ Amakʼ sanam kathako do mońjgea, onatege iń do onań pańjayeda.

¹³⁰ Amakʼ kathako sodorlenre marsale emeda; ona do sojhe monan hoṛkoakʼ buj reakʼ daṛeye emakoa.

¹³¹ Amakʼ hukumko ńam lạgitʼ iń doń uihạretʼ tahẽkana, ar cahapʼkateń ahkaokʼkan tahẽkana.

¹³² Okoe amko dulạṛme onkore cetʼlekam tahenkan, onkage iń secʼ ạcurokʼme ar iń dayawạńme.

¹³³ Amakʼ katha leka ṭhik horte calakʼ lạgitʼ am do ińakʼ jaṅgam kajaketʼtińạ; jãhãn behokakʼ jemon ińre aloe raj daṛeakʼ.

¹³⁴ Santaokan hoṛkoakʼ ti khon chaḍaoińme. Jemon iń do amakʼ ạn ạrikoń manao daṛeakʼ.

¹³⁵ Amakʼ daya reakʼ marsal leka amren nui golamre baṛe paṛaokʼma; amakʼ sanam ạnko cetʼạń me.

¹³⁶ Ińakʼ mẽtʼdakʼ do ạtukʼkantińạ ente hoṛko do amakʼ hukum bako manaoeda.

Probhu Isorakʼ ạn reakʼ bhage bicạr

¹³⁷ E Probhu Isor, am dom dhoromgea; amakʼ bicạr do hok reakʼ kana.

¹³⁸ Amakʼ dhoromte ar maraṅ pạtiạrte am do amakʼ ạn ạrikom emakana.

¹³⁹ Ińren bạiriko do amakʼ kathako hiṛiń akatʼte amakʼ manot rukhiyại lạgitʼ khạndri udgạu iń doe ńam akadińạ.

¹⁴⁰ Amakʼ katha do khạṭigea mente sạbud akana, onatege amren golam do onae dulạṛeda.

¹⁴¹ Iń doń huḍińgea ariń nihạ̃tgea, enhõ iń do amakʼ ạn ạriko bạń hiṛińeda.

¹⁴² Amakʼ dhorom do jaejug hạbicʼkana, ar amakʼ sanam hukumko do sạrigea.

¹⁴³ Gạr ar kosṭo ińre hecʼ paṛao akana, menkhan iń do joto hukumkogeń kusiyakʼ kana.

¹⁴⁴ Amakʼ sanam kathako do jaejug dhoromte perecʼgea; ona bujhạu lạgitʼ daṛe emạńme jemon jiwetʼ iń tahẽ daṛeakʼ.

Bańcaokʼ lạgitʼ koejoṅ

¹⁴⁵ Ińakʼ goṭa ontorteń hohowam kana; E Probhu Isor, roṛ ruạṛạńme. Amakʼ sanam ạnkoń manaoa.

¹⁴⁶ Amiń hohowam kana, bańcaoińme baṛe; iń do amakʼ joto kathań senakʼa.

¹⁴⁷ Ạuri aṅga marsalokʼrege iń do beretʼkate goṛo ńam lạgitʼ iń rakʼeda; amakʼ gokʼakʼ cetanreń bhorsakʼ kana.

¹⁴⁸ Ńindạ ạuri cabakʼrege ińakʼ mẽtʼ do beṅgedokʼ kana, jemon amakʼ sanam gokʼakʼkoń ganḍon daṛeakʼa.

¹⁴⁹ Amakʼ khạndri dulạṛ lekate ińakʼ katha ańjomme; E Probhu Isor, amakʼ ạn ạri lekate nãwã daṛe baṛe danạńme.

¹⁵⁰ Okoe bạṛicʼakʼko kạmikan onko doko hecʼ sorakana; onko do amakʼ hukum khon sạṅgińreko tahenkana.

¹⁵¹ Menkhan E Probhu Isor, am do sorre menama, ar amakʼ sanam hukumko do sạrigea.

¹⁵² Amakʼ goha khon laharegeń baḍae akada je, am do jaejug lạgitʼ onam dohoakada.

Goṛo ńam lạgitʼ nehõr koejoṅ

¹⁵³ Ińakʼ duk beṅgetʼakʼme ar rukhiyạyińme, ente iń do amakʼ hukumko bạń hiṛińakada,

¹⁵⁴ Iń secʼ katha baṛe roṛme ar ińiń miridosge ona sạbudme; amakʼ gokʼakʼ lekage nãwã daṛe danạńme.

¹⁵⁵ Bạṛicʼ hoṛko khon bańcao do ḍher sạṅgińgea, ente onko do amakʼ ạn ạri secʼ bako moneyakʼ kana.

¹⁵⁶ E Probhu Isor, amakʼ mãyã do bạ̃ṛtigea; amakʼ ạn ạriko leka nãwã daṛe baṛe danạńme.

¹⁵⁷ Ińren bạiri ar santaokan hoṛkoakʼ lekha do ḍhergea, menkhan amakʼ katha khon iń do bạń ocokʼakana.

¹⁵⁸ Bepạtiạrko ńelte iń doń hirkhạkʼ kana, ente onko do amakʼ katha leka bako calakʼ kana.

¹⁵⁹ Ńelme, amakʼ ạn ạriko do tinạkʼ iń dulạṛeda! E Probhu Isor, amakʼ asambheṛ dulạṛte nãwã daṛe baṛe danạńme.

¹⁶⁰ Amakʼ sanam kathako do sạrigea; amakʼ mitʼke mitʼ dhoromte perecʼ ạn do jaejug hạbicʼ tahena.

Probhu Isorakʼ ạnre tahẽakae tahena

¹⁶¹ Disạm calaoko do ạuṛiyakʼte ińko santaoedeń kana, menkhan ińakʼ ontorre amakʼ katha lạgitʼ botor menakʼa.

¹⁶² Lạṛhạire ńamakʼ jiniskote hoṛko cetʼlekako rạskạkʼ, onkage amakʼ gokʼakʼ lạgitʼ iń doń rạskạkʼ kana.

¹⁶³ Eṛeakʼ do kurud ariń hirkhạwakʼ kana, menkhan amakʼ hukumiń dulạṛetʼ kana.

¹⁶⁴ Amakʼ dhoromte perecʼ ạn ạri lạgitʼ iń do dinre eae dhaoiń gun manao joharam kana.

¹⁶⁵ Okoe amakʼ hukumko dulạṛetʼ onko do ạḍi sulukko ńama; ar cetʼte hõ onko do bako tohodokʼa.

¹⁶⁶ E Probhu Isor, amem bańcaoińạ ona asre minạńa, ar iń do amakʼ hukumkoń senakʼ kana.

¹⁶⁷ Iń do amakʼ sanam kathakoń senakʼkana ariń dulạṛeda.

¹⁶⁸ Amakʼ ạn ạriko ar sanam kathań senakʼkana, ente ińakʼ jion reakʼ jotowakʼgem baḍaea.

Goṛo ńam lạgitʼ koejoṅ

¹⁶⁹ E Probhu Isor, ińakʼ rakʼjoṅ do am samaṅre seṭerokʼma; amakʼ katha lekate bujhạu lạgitʼ daṛe danạńme.

¹⁷⁰ Ińakʼ nehõr do am samaṅre tahenma; ar amakʼ gokʼakʼ lekate bańcaoińme.

¹⁷¹ Ińakʼ luṭi khon amakʼ sarhao do heḍecʼ oḍokokʼma, ente amge amakʼ ạn reakʼem cetʼạń kana.

¹⁷² Ińakʼ jiwi do amakʼ katha iạteye sereńma, ente amakʼ sanam hukumko do dhoromte perecʼgea.

¹⁷³ Amakʼ ti do goṛowạń lạgitʼ sapṛao akan tahenma, ente amakʼ ạn ạriko leka senokʼ reakʼ iń goṭa akada.

¹⁷⁴ E Probhu Isor, amem bańcaoiń iạte iń doń koyokʼ horakada; amakʼ sanam hukumkoge iń ṭhen do rạskạ reakʼ kana.

¹⁷⁵ Iń bańcao dohoyińme jemoniń gun manao joharam; ar amakʼ ạn ạriko do ińe goṛowạńma.

¹⁷⁶ Atʼ akan bhiḍi leka iń doń chingạu akana; amren golam baṛe sendra ńameń me, ente amakʼ hukumko do bạń hiṛiń akada.