Sereńko 118 - সান্তালী বাইবেল

Jitạukʼ reakʼ sarhao sereń

¹ Probhu Isor sarhaoepe, ente uni doe bhagegea; uniyakʼ daya do jaejug hạbicʼ tahẽnkana.

² Israelko doko menma, “Uniyakʼ dulạṛ do jaejug hạbicʼ tahẽnkana.”

³ Aron bõsrenko doko menma, “Uniyakʼ dulạṛ do jaejug hạbicʼ tahẽnkana.”

⁴ Probhu Isor botoraeko doko menma, “Uniyakʼ dulạṛ do jaejug hạbicʼ tahẽnkana.”

⁵ Iń do muhinreń paṛaoente Probhu Isoriń hohoadea; ar uni doe ańjomketʼtińạ ar mitʼṭecʼ ṭhạ̃ireye oḍok ạgukedińa.

⁶ Probhu Isor do iń sãore menaea, iń do bạń botorokʼa; manwa do cetʼe cekayiń baṅ?

⁷ Ińren gokʼṛoyicʼ lekate Probhu Isor do iń secʼre menaea, onate ińren bạirikoakʼ bhagaokʼ iń ńela.

⁸ Manwako cetanre bhorsa baṅkate Probhu Isorre bhorsakʼ do bhagea.

⁹ Cetan hudạren hoṛko cetanre bhorsa baṅkate Probhu Isorre bhorsakʼge bhagea.

¹⁰ Sanam jạtrenko do ińko gherao ạcur akadińạ, menkhan Probhu Isor ńutumte onko doń marao cabakoa.

¹¹ Onko do ińko gherao ạcur akadińạ, sạrige onko do beṛhaeteko esetʼakadińạ, menkhan Probhu Isor ńutumte onko doń marao cabakoa.

¹² Dumur lekageko tudrạu esetʼ akadińạ; ar jạnum jhạuạ reakʼ seṅgel leka onko do usạrateko ĩṛicʼgotʼena. Probhu Isor ńutumte iń do khạṭigeń marao cabakoa.

¹³ Iń do jemoniń sombotʼ hapekokʼ onateko ṭhelaoledeńa, menkhan Probhu Isor do ińe goṛo akawạdińạ.

¹⁴ Probhu Isorge ińren daṛe do, ar ińren sereń hõ unige; ar unirege ińakʼ bańcaokʼ do menakʼa.

¹⁵ Dhorom hoṛkoakʼ oṛakʼre bańcaokʼ reakʼ rạskạ ańjomokʼkana; Probhu Isorakʼ daṛeanakʼ ti do bhageakʼe kạmiakada.

¹⁶ Probhu Isorakʼ daṛeanakʼ ti do jitạue dan akawạdińạ; Probhu Isorakʼ daṛeanakʼ ti do bhageakʼe kạmiakada.

¹⁷ Iń do bạń gujukʼa, jiwetʼgeń tahena, ar Probhu Isor okae kạmi akatʼ onań lại jạhira.

¹⁸ Probhu Isor do kajakteye ḍanṭao edeńkana, menkhan gujukʼ reakʼ tire do bae alae akadińạ.

¹⁹ Dhorom reakʼ duạrko jhicʼạńpe, jemon onḍe bolokate uniń sarhao daṛeae.

²⁰ Nokʼõe coṅ Probhu Isorakʼ duạr ma; noa talatege dhorom hoṛ doko bolokʼa.

²¹ Iń do amiń sarhaomea, ente am do ińakʼem ańjom akada; ińakʼ bańcao do amrege menakʼa.

²² Rajmistriko okaṭakʼ dhiriko nihạ̃t giḍiletʼ onage konac reakʼ asolakʼ dhiri do hoyena;

²³ Probhu Isorge noa doe nonka akada, ar ona do aboakʼ mẽtʼre hahaṛawakʼge hoyena.

²⁴ Noa kangea ona din do okaṭakʼ Probhu Isor doe ṭhik dohoakatʼ; Dela bon, noa dinre bon rạskạ joṅma.

²⁵ E Probhu Isor, nehõrokʼ kạnạń bańcaoleme baṛe; E Probhu Isor, nehõrokʼ kạnạń jo bahaokʼ baṛe danạńme.

²⁶ Okoe Probhu Isor ńutumteye hijukʼkan uniyakʼge sarhao hoyokʼtae ma. Probhu Isorakʼ oṛakʼ khon ale do apele bhorape kana.

²⁷ Probhugeye Isor kana, uni doe marsal akawatʼlea. Ar porobren dãṛẽko do baberte tol idikope pinḍ reakʼ dereń hạbicʼ.

²⁸ Amge ińren Isor do, iń do amgeń sarhaomea; amge ińren Isor do, amgeń gun manao joharama.

²⁹ Probhu Isor gun manao joharaepe, ente uni doe bhagegea; uniyakʼ daya do jaejug hạbicʼ tahẽnkana.