Sereńko 116 - সান্তালী বাইবেল

Gujukʼ khon bańcao akan hoṛ Isore sarhaoede kan

¹ Iń do Probhu Isorgeń dulạṛ edekana, ente uni do ińakʼ nehõre ańjom akatʼtińạ.

² Uni do ińakʼ kathae lutur akawada, onate tinạkʼ din jiwetʼiń tahen unạkʼ din iń hohowaea.

³ Gujukʼ reakʼ baberte iń do toliń tahẽkana, ar patal puri reakʼ jaljalaokʼreń paṛaolena; iń do duk ar kosṭoreń tahẽkana.

⁴ Unre Probhu Isor do hohoadeteń metadea, “E Probhu Isor, am ṭheniń nehõrokʼ kana, am do ińakʼ jiwi bańcaotińme.”

⁵ Probhu Isor do daya are dhoromicʼkana; aboren Isor do mãyãteye perecʼgea.

⁶ Probhu Isor do sojhe monan hoṛkoe rukhiyạyetʼkoa; iń do asokʼ ṭayokʼreń paṛaolena menkhan unigeye bańcaokedińa.

⁷ E ińakʼ jiwi, arhõ khạtirokʼme, ente Probhu Isor do ḍhergeye bhạlại akatʼmea.

⁸ E Probhu Isor, amge gocʼko khon ińakʼ jiwi, ar mẽtʼ dakʼ khon ińakʼ mẽtʼ, ar bhindạṛokʼ khon ińakʼ jaṅgakinem rukhiyạ akatʼtińạ.

⁹ Iń do jiwetʼko talare Probhu Isor samaṅreń dãṛãbaṛaea.

¹⁰ Tinreń menleda, “Laṅgaṭreń paṛaolena,” unrehõ ińakʼ biswạs do tahẽkangea.

¹¹ Iń doń botorlena, “Ente sanam manwageko eṛegea.”

¹² Ar Probhu Isor okaṭakʼe bhạlại akadiń ona bodolte cetʼ iń emaea?

¹³ Uni do muhin khone bańcaokedińa, onate bańcaokʼ reakʼ bạṭi doń tul rakaba ar ona reakʼ ṭhonokiń lại sodora.

¹⁴ Probhu Isor ṭhen okaṭakʼ manotakʼ iń dohoakatʼ ona do uniren sanam hoṛko samaṅreń purạuaea.

¹⁵ Probhu Isor ṭhen acʼ botoraekoakʼ gujukʼ reakʼ dam do ḍhergea.

¹⁶ E Probhu Isor, sạrige iń do amren golam kạnạń, amren golamge, ar amren kạ̃ṛmĩren gidrạge; amge ińakʼ tonolem raṛa akatʼtińạ.

¹⁷ Iń do am lạgitʼge gun manaoren dãṛẽń samaṅama ar amakʼ sarhao iń lại sodora.

¹⁸ Probhu Isor ṭhen okań manot akatʼ ona do uniren hoṛko samaṅreń purạutińạ;

¹⁹ E Jerusalem, amrege Probhu Isorakʼ bakher racare onań purạua. Probhu Isorakʼge sarhao hoyokʼtae ma.