Sereńko 115 - সান্তালী বাইবেল

Sạriyakʼren Probhu Isor

¹ Aleakʼ do baṅ, E Probhu Isor, aleakʼ do baṅ, menkhan amakʼ sarhaoge baṛe hoyokʼma; amakʼ asambheṛ dulạṛ ar pạtiạr lạgitʼge hoyokʼma.

² Eṭakʼ jạtrenko do cedakʼko mena, “Okare menaea onkoren Isor do?”

³ Aboren Isor do sermare menaea; uni do acʼakʼ sana lekageye kạmikana.

⁴ Onkoren boṅga murhutʼko do sona ar rupạte manwa tite benaoko kanako.

⁵ Onkoakʼ moca do menakʼtakogea menkhan katha do bako roṛ daṛeakʼa, mẽtʼ hõ menakʼtakoa menkhan bako ńeńela;

⁶ lutur hõ menakʼtakoa menkhan bako ańjom ńama, mũ menakʼgea menkhan so hõ baṅ so koa.

⁷ Ti menakʼ takogea menkhan bako joṭetʼ daṛeakʼa, jaṅga menakʼtakogea menkhan bako taṛam daṛeakʼa. Alaṅ menakʼgea menkhan roṛ hõ baṅ oḍokokʼtakoa.

⁸ Okoe onkoko benao akatʼko ar okoe onko cetanreye pạtiạukʼ are bhorsakʼ onko hõ murhutʼ lekako hoyokʼa.

⁹ E Israelko, Probhu Isore ṭehãḍokʼpe uni kangea onkoren gokʼṛoyicʼ ar ḍhal do.

¹⁰ E Aron bõsrenko, Probhu Isorre ṭehãḍokʼpe uni kangeae onkoren gokʼṛoyicʼ ar ḍhal do.

¹¹ E Probhu Isor botoraeko, Probhu Isorrege ṭehãḍokʼpe uni kangeae onkoren gokʼṛoyicʼ ar ḍhal do.

¹² Probhu Isor do aboakʼ kathae disạ akada, onate uni doe bhor abona; hẽ, uni do Israel bõsrenkoe bhorakoa, uni do Aron bõsrenkoe bhorakoa,

¹³ Uni do acʼ botoraekan kạṭicʼ lạṭu sanamkoe bhorakoa.

¹⁴ Probhu Isorge ape ar aperen hoponkoakʼ bõskoe saṅge ocoya.

¹⁵ Probhu Isor, okoe do ot ar sermae sirjạu akatʼ, unige ape doe bhorapema.

¹⁶ Serma do Probhu Isorakʼ serma kana, menkhan dhạrti do manwakoe em akatʼkoa.

¹⁷ Gocʼko do Probhu Isor bako gun manao joharaea; ar okoe patal puriteko pheḍokʼ onko hõ bako gun manao joharaea;

¹⁸ menkhan abo do Probhu Isor bon gun manao joharaea, uni gun man johar bon emaea ńit khon jaejug hạbicʼ. Probhu Isorakʼge sarhao hoyokʼtae ma.