Sereńko 113 - সান্তালী বাইবেল

Isorakʼ bhage iạte sarhao

¹ Probhu Isorakʼ sarhao hoyokʼtae ma. E Probhu Isorren golamko, sarhao sereńpe; Probhu Isor sarhao sereńaepe.

² Probhu Isorakʼ ńutum sarhao hoyokʼtae ma, ńit ar jaejug hạbicʼ.

³ Siń cando rakabokʼ nakha khon ehopʼkate hạsurokʼ nakha hạbicʼ Probhu Isorakʼ sarhao baṛe hoyokʼtae ma.

⁴ Sanam jạtrenko do Probhu Isor gobolre menakʼkoa; serma cetanre hõ uniyakʼ ṭhonok do menakʼa.

⁵ Aboren Probhu Isor leka do okoe menaea? Uni do serma khon hõ coṭreye tahẽnkana

⁶ uni do eṅgotʼkate dhạrti ar sermae beṅgetʼatʼ kana.

⁷ Uni do nandanko dhuṛi khone beretʼetʼkoa, ar reṅgecʼ orecʼko do mande khone rakapʼetʼkoa;

⁸ jemon uni do cakʼlaoko sãote onkoe duṛupʼ daṛeako, ar okoe do acʼren hoṛko modre cetan hudạre menakʼko onko tulucʼe duṛupʼ soṅge daṛeako.

⁹ Bạńjhi do gidrạkoren rạskạwạnicʼ gogoye hoyocoyedea ar soṅsar reakʼ purạ ạidạri hõe emaekana. Probhu Isorakʼge sarhao hoyokʼtae ma.