Sereńko 112 - সান্তালী বাইবেল

Bhage hoṛ doe bhạgangea

¹ Probhu Isorakʼ sarhao hoyokʼtae ma. Okoe Probhu Isore botoraekan ar uniyakʼ hukum iạteye rạskạkʼkan uni doe bhạgangea.

² Uniren bõsko do dhạrtire daṛeanko hoyokʼa; ontorre okoeye khạṭige uniren bõsko do bhorko ńama.

³ Uniyakʼ oṛakʼre do dhon duribko tahena; uniyakʼ dhorom do jaejug hạbicʼ tahena.

⁴ Okoakʼ ontor khạṭige uni lạgitʼ do ńutre hõ marsalge tahena, ente uni do daya ar mãyãteye perecʼgea are dhoromgea.

⁵ Okoe dayate pańcae emokʼkan ar dhoromte jotowakʼe kạmikan uniyakʼ bhạlại do hoyokʼgea.

⁶ Uni do sanam ghạṛicʼ teṅgo ṭak akane tahena; ar Isor bhokti hoṛ do jaejug hạbicʼe disạ dohoyea.

⁷ Jãhãn bạṛicʼ khobor ańjomkate bae botorokʼa; uniyakʼ mon do khạtirgea ar Probhu Isorreye bhorsa akana.

⁸ Uniyakʼ mon do diṛhogete bae botorokʼ kana; sesre uni do acʼren bạirikoakʼ bhagaoe ńela.

⁹ Uni do chiṭiạukedae, reṅgecʼ orecʼkoe ematʼkoa; uniyakʼ dhorom do jaejug hạbicʼ tahenkana, uniyakʼ daṛe ar man do ḍher idikʼtaea.

¹⁰ Bedhorom hoṛ do ona ńelteye ạṛisokʼa; uni do ḍaṭae togoja are cabakʼa. Bedhoromkoakʼ as do nasaokʼtakoa.