Sereńko 109 - সান্তালী বাইবেল

Dukre paṛao akan hoṛakʼ lạlis

¹ E Isor amiń sarhaoetʼmea; am do alom thir hapekokʼa.

² Bedhorom ar phạsiạra hoṛko do iń upạrteko cahapʼ akada; onkoakʼ phạsiạra alaṅte iń upạrteko roṛeda.

³ Onko do kurud kathateko esetʼ ạcur akadińạ, ar khamakhate iń tulucʼko lạṛhại kana.

⁴ Ińakʼ dulạṛ bodolte iń upạrteko lạṛhại kana, menkhan iń do koejoṅtegeń tahen kana.

⁵ Onko do bhạlại bodolte bạṛicʼakʼko ladewạń kana, ar dulạṛ bodolteko kurudạń kana.

⁶ Onko upạrte am do bedhorom bikʼcạrko bahalkom; ar okoe onkoko dusiko onko do onkoakʼ jojomsa aṛereko teṅgokʼma.

⁷ Bicạrre onko do dusi menteko sạbudokʼma; ar onkoakʼ koejoṅ do kại mente sabokʼma.

⁸ Onkoakʼ bahaokʼ din do khaṭoge hoyokʼma; ar onkoakʼ cetan hudạ hõ eṭakʼ hoṛkoakʼ hoyokʼma.

⁹ Onkoren gidrạko doko ṭũạrokʼma; onkoren bạhuko doko rạnḍikʼtakoma.

¹⁰ Onkoren gidrạko do hor horteko koe baṛaema ar akoakʼ rạputʼ oṛakʼ khon sạṅgińte senkate jomakʼko ńam baṛaema.

¹¹ Mahajon do onkoakʼ sanamakʼe idiytakoma; ar eṭakʼ hoṛko do onkoakʼ khaṭaoakʼ reakʼ joko idijoṅma.

¹² Onko cetanreko dayakʼ nonkan okoe hõ aloko tahenma; onkoren ṭũạr gidrạko cetanre okoe hõ mãyã alo baṛee hecʼakoma.

¹³ Onkoren bõsko doko gocʼ ocokʼma; ar onkoren gidrạkoakʼ ńutum do mohor meṭaokʼma.

¹⁴ Onkoren hapṛamkoakʼ bedhorom reakʼ katha do Probhu Isorakʼ monre tahenma; onkoren eṅgatkoakʼ kại do alo mohor meṭaokʼma.

¹⁵ Onako do jao okte Probhu Isor samaṅre tahenma, jemon uni do dhạrti khon onkoakʼ disạ hõe maraotako.

¹⁶ Onko do dayakʼ reakʼ katha tisge bako disạleda, bickom nacar reṅgecʼ hoṛ gocʼko lạgitʼko santaoetʼko tahẽkana.

¹⁷ Onko do sarap emokʼko kusiyakʼa, Onate ona ạsis do ako cetanrege paṛaoena; ar bhorako lạgitʼ do mońj bako ạikạua, onate bhor do onko khon sạṅgińte calaoena.

¹⁸ Kicricʼ horokʼ lekage hoṛ sarapako do heowa leka hoyentakoa; ona do dakʼ ńũ lekage ar hoṛmore do sunum ojokʼakawatʼ leka.

¹⁹ Sarap akawatʼ oyonakʼ leka onko doe oyokoma ar ḍanḍa reakʼ totolakʼ leka jao ghuṛiye tolkakoma.

²⁰ Okoe iń secʼrenko baṅkante, iń reaṅ bạṛicʼko roṛ, onko do Probhu Isor ṭhen khon jemon noa jo geko ńam.

²¹ Menkhan am do, E Probhu ińren Isor, amakʼ ńutum khạtirte iń baṛe dayawạńme; ar amakʼ dulạṛ do bhagege iạte iń bańcaoińme.

²² Iń doń nacar ariń reṅgecʼgea; iń do ontore dukiń ńam akada.

²³ Tarasiń bela reakʼ umul lekage iń doń caba hijukʼkana; ar pohoko lekage iń doń oṭaṅ ocoakana.

²⁴ Begor jomte ińakʼ gunṭhi kin do laṅga caba akantińạ; ar ińakʼ hoṛmo do roga akana, ariń rohoṛokʼ kana.

²⁵ Iń do onko ṭhen mitʼṭen landa dhutʼan hoṛ lekań hoyakana; onko do ińko ńelliń khange bohokʼko rukuitakoa.

²⁶ E ińren Probhu Isor, dayawạńme baṛe; amakʼ khạndri dulạṛ khạtirte rukhiyạyińme.

²⁷ Onkoko baḍaema noa kạmi do amakʼ kangea; ar amge, E Probhu Isor, noa dom kạmi akada.

²⁸ Onko doko sarapạńma, menkhan am do bhorạńme; onko do iń upạrteko teṅgolen khan lajaoreko paṛaokʼma, menkhan amren golam doe rạskạkʼa.

²⁹ Iń upạrtenko do opomanko horokʼjoṅ ma, ar lajao do aṅgrop lekako oyokokʼma.

³⁰ Iń do sanamko samaṅre Probhu Isoriń sarhaoea, ar ḍher hoṛko talare uniń gun manao joharaea;

³¹ ente uni do reṅgecʼ orecʼko aṛereye tahena, jemon behok reakʼ bicạr khon onkoakʼ jiwiye rukhiyạitako.