Sereńko 108 - সান্তালী বাইবেল

Bạiriko birudre goṛo ńam lạgitʼ koejoṅ

¹ E Isor, ińakʼ mon do uricʼgea; iń do ińakʼ goṭa ontorteń sereńama ariń õṛhẽmea.

² Ebhenokʼ ben, E binạ banam ar peṛesaṅ; iń do aṅga marsaliń ebhen ocoyea.

³ E Probhu Isor, eṭakʼ eṭakʼ jạtrenko talare iń do amiń sarhaomea, onko talare am ńutumteń sereńa;

⁴ Ente amakʼ asambheṛ dulạṛ do serma khon hõ cetangea, amakʼ pạtiạr do rimil khon hõ cetangea.

⁵ E Isor, amakʼ man do serma hạbicʼ rakabokʼma; ar amakʼ ṭhonok do goṭa dhạrtire ńelokʼma.

⁶ Amakʼ daṛeanakʼ ti tiyạrte ale baṛe bańcaolem; ińiń hohowamre luturakʼme, jemon am okoeyem dulạṛetʼko onko do bańcaoko ńam.

⁷ Isor do acʼakʼ sonot ńutumteye meneda, “Iń do rạskạ salakʼ Sikemiń hạṭińa, ar Sukot tapol hõń soṅ hạṭińa.

⁸ Gilead do ińakʼ kana, ar Manase hõ ińakʼge; Ar Ephrayim do ińakʼ bohokʼ reakʼ ṭupri kana, ar Jihudạ do ińakʼ rajosṭi reakʼ ṭheṅga kana.

⁹ Moab do ińakʼ jaṅga ạbukokʼ bhajan kana; Edomre ińakʼ panahiń capada, ar Philisṭi cetanre do jitạukʼ reakʼ iń hohoea.

¹⁰ Ona gaṛ nagrahate do okoeye idiyińạ one onare bolokʼ kuṭhinge? Ar Edom reakʼ hor hõ okoeye udukʼạńạ?

¹¹ E Isor, am do cetʼ alem bạtil giḍi akatʼlea? Aleren phạdko tulucʼ ma ar bacom calakʼkan.

¹² E Isor, bạiriko upạrte ale baṛe goṛowaleme, ente manwakoakʼ goṛo do jãhãn damge bạnukʼa.

¹³ Isorakʼ goṛote ale dole jitạukʼa; aleren bạiriko do unigeye jaṅga latarkoa.