Sereńko 107 - সান্তালী বাইবেল

Mõṛẽakʼ puthi (Sereńko 107-150) Isorakʼ bhagetetʼ iạte sarhao

¹ “Probhu Isor sarhaoepe, ente uni doe bhagegea; ar uniyakʼ daya do jaejug hạbicʼ tahenkana.”

² Probhu Isorren chaḍao akan hoṛko do noa kathako roṛma, ente uni do upạrtenkoakʼ ti khon onkoe chaḍao ạguakatʼkoa;

³ Uni do eṭakʼ eṭakʼ disạm khon mitʼ jaegateye ạgu akatʼkoa, onko do purub, pạchim ar utạr dạkhin khone ạguakatʼkoa.

⁴ Onko do hahaṅkar jaegareko ạcur baṛayena; ar girạbasokʼ lạgitʼ oka nagraha hõ bako sendra ńamleda.

⁵ Onko do reṅgecʼ ar tetaṅteko kosṭoyena, ar onate onkoakʼ jiwi do jale thaleyena.

⁶ Muhinre paṛaoente onko do Isor ṭhenko rakʼkeda, ar nonkate uni do onkoe bańcaoketʼkoa.

⁷ Uni do sojhe horteye idiketʼkoa jemon nagrahare senkate aloko girobas daṛeakʼ.

⁸ Manwako lạgitʼ Probhu Isorakʼ hahaṛa kạmiko iạte ar uniyakʼ asambheṛ dulạṛ iạte onko do uniko sarhaokedea.

⁹ Okoeyakʼ ontorre tetaṅ menakʼ uni doe ṭanḍha ocokedea, ar okoeyakʼ ontorre reṅgecʼ menakʼ onko do bhage bhage jiniskoteye tirpit ocoketʼkoa.

¹⁰ Onko do ńutre, kaṛaṅ ńutreko duṛupʼ akan tahẽkana, ar bondi akanko do dukte ar mẽṛhẽtʼ reakʼ sikṛiteko kosṭokʼkan tahẽkana;

¹¹ ente onko do Isorakʼ katha upạrteko huletʼkan tahẽkana, ar maraṅ Isorakʼ hukumko nindạuetʼ tahẽkana.

¹² Onate uni do kajak khaṭao hotete onkoakʼ goroboe rạputʼketʼtakoa; onko doko tohotʼena, ar onkoren goṛoyicʼ do celege bako tahẽkana.

¹³ Muhinre paṛaoente onko do Probhu Isor ṭhenko rakʼkeda, ar nonkate uni do onkoe rukhiyạketʼkoa.

¹⁴ Ńut, ar kaṛaṅ ńut khon uni doe oḍokketʼkoa; uni do onkoakʼ sikṛiye rạputʼgiḍikatʼtakoa.

¹⁵ Manwako lạgitʼ Probhu Isorakʼ hahaṛa kạmiko iạte ar uniyakʼ asambheṛ dulạṛ iạte onko do uniko sarhaoema.

¹⁶ Uni do pitạl reakʼ silpińkoe rạputʼ akada ar mẽṛhẽtʼ reakʼ huṛkạṛkoe kaṭra kuṭrạ akada.

¹⁷ Lelha hoṛ do akoakʼ pap reakʼ hor iạte, ar akoakʼ ghạṭ iạteko sasetokʼkana.

¹⁸ Onkoakʼ jiwi do sanam lekan jomakʼko hirkhạwada ar gujukʼ duạr ṭhenko seṭerlena.

¹⁹ Muhinre paṛaokate onko do Probhu Isor ṭhenko rakʼkeda, ar onate uni onkoe rukhiyạketʼkoa.

²⁰ Acʼakʼ katha kolkate onkoe bogeketʼkoa; uni do ghaḍlakʼ khone owarketʼkoa.

²¹ Manwako lạgitʼ Isorakʼ hahaṛa kạmiko iạte ar uniyakʼ asambheṛ dulạṛ iạte onko do uniko sarhaoema.

²² Onko do gun manaoren dãṛẽkoko dãṛẽkoma, ar rạskạ sereńte uniyakʼ sanam kạmi reakʼ kathako lại jạhirma.

²³ Okoe jahajte jalapurireko dãṛãnkan maraṅ jalapurireko kamkaj joṅkan,

²⁴ onkoge Probhu Isorakʼ kạmiko ńelakada, ar khạndri dakʼre uniyakʼ hahaṛa kạmi hõko ńelakada.

²⁵ Mitʼ dhao uniyakʼ kathate maraṅ birbão hecʼena, onate maraṅ maraṅ ḍheoko rakapʼena.

²⁶ Ar jahaj cakʼlaoko do serma hạbicʼ rakabokʼkan ar athan khạndri hạbicʼ pheḍokʼko ehopʼena; muhinre paṛaoente botorte onkoakʼ jiwi do oṭaṅentakoa.

²⁷ Ar bul hoṛ leka onko do kinḍạ manḍekʼko ehopʼena; arko bud harayena.

²⁸ Muhinre paṛaokate Probhu Isor ṭhenko rakʼkeda, ar onate uni do onkoe oḍok ạguketʼkoa.

²⁹ Uni do birbãoe thir ocokeda, ar jalapuri reakʼ ḍheoko do ḍelḍel thirena.

³⁰ Jalapuri ḍelḍelen khan onko doko kusiyena; ar okaṭakʼ bondorte calakʼko menletʼ onḍegeye idiketʼkoa.

³¹ Manwako lạgitʼ Probhu Isorakʼ hahaṛa kạmiko iạte ar uniyakʼ asambheṛ dulạṛ iạte onko do uniko sarhaoema.

³² Somaj talare onko do uniko gun manao joharaema, ar murubbikoakʼ bạisire uniko sarhaoema.

³³ Uni do gaḍakoe hahaṅkar ocoyeda, ar jharnako doe rohoṛ jaega ocoyeda,

³⁴ Ar phosol hoyokʼkan jumi do buluṅ ṭạnḍigeye hoyocoyeda. Okoe onḍeko girobasokʼ kan onkoakʼ bedhorom iạtege uni do noakoe hoyocoyeda.

³⁵ Hahaṅkar do jolae hoyocoyeda ar khaṅgoṭ jaegako do jharnae hoyocoyeda.

³⁶ Onḍe do reṅgecʼ orecʼ hoṛe berel ocoyetʼkoa; onko do onḍe nagrahako beretʼeda.

³⁷ Onko do khetre itạko ereda, ar darkha nạ̃ṛĩko rohoe joṅkana, ar bạ̃ṛti phosolko hoyocoyeda.

³⁸ Uni do onkoe bhorako kana ar onate onko do ạḍiko saṅgekʼkana; uni do onkoren ạtiń janwarko bae komao ocoyetʼkoa.

³⁹ Santao, muhin ar dukte arhõ onko doko komao idiyena onkoakʼ dosa do arho bạṛicʼ hoyena.

⁴⁰ Uni do cetan hudạren hoṛko cetanre bemanote upʼatʼkoa,

⁴¹ Menkhan uni do reṅgecʼ orecʼko bhabna khone owarketʼkoa, ar bhiḍi palrenko leka onkoren hoponkoe saṅge ocoketʼkoa.

⁴² Isor botoraekan hoṛ do ona ńelteko rạskạyena, menkhan behoketʼko do mocae tubetʼketʼtakoa.

⁴³ Okoeye ạkilan hoṛkan uni do ona reaṅe moneyakʼma ar Probhu Isorakʼ asambheṛ dulạṛ reaṅ hõ mońjteye hetawakʼma.