Sereńko 106 - সান্তালী বাইবেল

Isorakʼ bhagetetʼ do acʼren hoṛko secʼ

¹ Probhu Isorakʼge sarhao hoyokʼtae ma. Ape do Probhu Isor gunmanao joharaepe, ente uni doe bhagegea; ar uniyakʼ daya do jaejug hạbicʼ tahenkana.

² Probhu Isorakʼ bhage kạmi reakʼ do okoe haleye lại daṛekea? Uniyakʼ joto sarhao do okoeye ańjom ocoketaea?

³ Bhạgangeako onko do, okoe do hok reakʼko bicạretʼ ar jaoge bhage kạmiko kạmikan.

⁴ E Probhu Isor, amren hoṛko secʼ dayam udugre iń do alom hiṛińińạ; ar onkom bańcaoko oktere iń secʼ hõ ti tiyạr do alom hiṛińa.

⁵ Jemon amem bachao akawan hoṛkoakʼ bhạlạiyiń ńel daṛeakʼ, ar jạtrenkoakʼ rạskạ sãoteń rạskạ daṛeakʼ, ar okoe do amren ạidạrikanko ona reakʼ hĩs lekateń sarhao daṛekokʼ.

⁶ Aleren hapṛamko leka ale hõle kại akada; ale dole behok akada, ar kạirele taṛameda.

⁷ Misorre tahen jokhecʼ aleren hapṛamko do amakʼ hahaṛa kạmi ńelte cetʼge bako bujhạuleda; onko do amakʼ asambheṛ dulạṛ reakʼ katha hõ bako disạ doholeda; onko do jalapuri aṛere, arakʼ jalapuri ṭhenko ṭhokkeda.

⁸ Enhõ uni do acʼakʼ ńutum khạtirte acʼakʼ maraṅ daṛe sodor lạgitʼe bańcaoketʼkoa.

⁹ Uniyakʼ hukumte arakʼ doreão do ańjetʼena; ar hahaṅkar talate calakʼ leka onko do jalapuri talateye parom idiketʼkoa.

¹⁰ Uni do hirkhạkʼ kankoakʼ ti khon onkoe rukhiyạketʼkoa; bạirikoakʼ ti khon onkoe chaḍaoketʼkoa.

¹¹ Onkoren bạiriko do dakʼteko esetʼena, ar mitʼ hoṛhõ jiwetʼ do bako sarecʼlena.

¹² Unre Probhu Isorakʼ kathate onko doko biswạsena ar uniko sarhaokedea.

¹³ Menkhan uniyakʼ kạmi reakʼ katha do ạḍi usạrako hiṛińkeda; onko do uniyakʼ sopolha bako tạṅgileda.

¹⁴ Hahaṅkarre onko do laloc iạte Isorko biḍạukedea.

¹⁵ Onko okaṭakʼko khojletʼ onage uni doe ematʼkoa, menkhan onkore mitʼṭecʼ khoy roge kolkeda.

¹⁶ Tạmbure tahen jokhecʼ Mose ńelte, ar Probhu Isorren sonoticʼ Aron ńelte onko do hiskạ hecʼatʼkoa.

¹⁷ Dhạrti do moca jhicʼkate Datane utʼgotʼkadea. Ar Abiramakʼ dolren doe sikupʼ esetʼketʼkoa.

¹⁸ Onko bhitrire do seṅgel jolena; ar ona seṅgel do bedhoromkoe atar cabaketʼkoa.

¹⁹ Horeb burure onko do mitʼṭen mĩhũko benaokedea ar mitʼṭen dul murhutʼko ḍobokʼadea.

²⁰ Onkoren ṭhonokren Isor bạgikate onko do ghãs jom ḍaṅgrawakʼ murhutʼko ataṅkeda.

²¹ Onkoren babańcaoicʼ Isor doko hiṛińkedea one okoe do Misorre maraṅ ar hahaṛawakʼkoe kạmiletʼ tahẽkan.

²² Ham bõsrenkoakʼ disạmre hahaṛa kạmi reakʼ katha onko doko hiṛińkeda, ar arakʼ doreãore hoylen botoranakʼ kạmi hõko hiṛińkeda.

²³ Onate uniye menkeda onko doe maraokoa; ar onageye kạmikea menkhan bachao akade Mose do uniyakʼ hijukʼ horreye teṅgoyena, jemon ḍahao maraoko reakʼ edre khone ruạṛ daṛeae.

²⁴ Tayomte onko do ona mońj disạmko nihạ̃tkeda; onko do Probhu Isorakʼ katha bako pạtiạuada.

²⁵ Onko do tạmbukore bokbokaokʼko ehopʼena; ar Probhu Isorakʼ katha hõ bako luturada.

²⁶ Onate uni do noae kiriạyena onko do hahaṅkarreye cabakoa,

²⁷ ar onkoren bõsko do eṭakʼ eṭakʼ jạtrenko talareye gur ocokoa, ar eṭakʼ eṭakʼ disạmteye chirchạturkoa.

²⁸ Onko do Peor burure Bakʼal debotako pujạwadea ar gocʼ hoṛko ńutumte dãṛẽ akatʼ jelko jomkeda.

²⁹ Noa bạṛicʼ kạmiko hotete onko do Probhu Isorko edre ocokedea, onate onkore duk do boloyena.

³⁰ Unre naeke Phinehas doe teṅgoyente noa reakʼe sạjạiketʼkoa, ar duk hõ cabayena.

³¹ Phinehasakʼ noa kạmi iạte uni do jaejug hạbicʼ dhorom menteye lekhayena.

³² Meriba reakʼ dakʼ ṭhen onko do Probhu Isorko edre ocokeda; ar Mose do muskilreye paṛaoena.

³³ Onko do Isorakʼ Jiu birudre ṭhokko ehopʼena, onate Moseyakʼ moca khon nonkan kathako oḍokena, one ona katha roroṛ do lek baṅ tahẽkan.

³⁴ Isorakʼ hukum bebataokate onko do eṭakʼ jạtrenko bako maraoletʼkoa,

³⁵ bickom onko jạtrenko sãoteko mesalena ar onkoakʼ ạri cạliko hataoana.

³⁶ Onkoren murtikoko sewawatʼkoa ar onko do akoren jhampako hoyena.

³⁷ Onko do bạṛicʼ jiuko ńutumte akoren gidrạkoko dãṛẽketʼkoa.

³⁸ Onko do bedhoromko, metatʼme akoren gidrạkoakʼ mãyãmko joro ocokeda. Onko do Kananren murhutʼko ńutumteko dãṛẽketʼkoa, onate goṭa disạmge mãyãmte bhoṅḍena.

³⁹ Ar nonkate onko doko bhoṅḍena; akoakʼ kạmiko iạte Probhu Isor ṭhen bepạtiạrkoko hoyena.

⁴⁰ Onate Probhu Isorakʼ edre do onko hoṛ cetanre caṛhaoena; ar okoe acʼakʼ ạidạrireko tahẽkan onko doe hirkhạwatʼkoa.

⁴¹ Uni do eṭakʼ jạtrenkoakʼ tireye soprotkatʼkoa; ar onkoko kurudakokan hoṛ do onko cetanreko mạlikena.

⁴² Onkoren bạiriko do ako cetanre santaoko ehopʼkeda; ar onko gobolreko tahẽyena.

⁴³ Aema dhao uni do onkoe rukhiyạketʼkoa, menkhan onko do akoakʼ kusiteko hulkeda; ar kại gunạkʼteko ḍiṅgrạyena.

⁴⁴ Enhõ uni do onkoakʼ rakʼjoṅ iạteye beṅgetʼatʼkoa.

⁴⁵ Onko lạgitʼ acʼe dohoakatʼ bondobos reakʼ kathae disạkeda; ar acʼakʼ asambheṛ dulạṛ lekate onkoreye mãyãyena.

⁴⁶ Aleren hapṛamko leka ale hõle kại akada; ale dole kại akada, ar bedhoromtele calakʼkana.

⁴⁷ E Probhu, aleren Isor, ale rukhiyạleme baṛe; ar eṭakʼ jạtrenko tala khon mitʼ ṭhạ̃ire ạguleme, jemon amakʼ sonot ńutumle gun manao johar daṛeakʼ ar amle sarhao daṛeamtele sabasi daṛeakʼ.

⁴⁸ Sirjạu reakʼ etohopʼ khon jaejug hạbicʼ Israelkoren Probhu Isorakʼ sarhao baṛe hoyokʼtaema. Sanam hoṛko menma, “Amen.” Probhu Isorakʼge sarhao hoyokʼtae ma.