Sereńko 105 - সান্তালী বাইবেল

Isor ar uniren hoṛko

¹ Probhu Isorge gun manao joharaepe, ar uniyakʼ ńutum dohaeakʼpe; uniyakʼ kạmi reakʼ katha eṭakʼ jạtrenko baḍae ocokope.

² Uni lạgitʼ sereńpe ar unige sarhaoepe; ar uniyakʼ sanam hahaṛa kạmi reakʼ katha lại jạhirpe.

³ Uniyakʼ ṭhonoktetʼ sarhaotaepe; okoe Probhu Isorakʼ khạndritetʼ baḍae sanayetʼko onkoakʼ ontor do rạskạkʼtakoma.

⁴ Probhu Isor ar uniyakʼ daṛe bujhạu reakʼ kurumuṭuipe; sanam ghạṛicʼ uni sãote helmel dohoy reakʼ ahkaokʼpe.

^5-6 E uniren golam Abrahamren bõsko, uniren bachao akan Jakobren hoponko, ape do uniyakʼ maraṅ kạmi reakʼ kathako baṛe disạ dohoype; uniyakʼ hahaṛa kạmiko reakʼ katha ar bicạrre oka sạjại reakʼ kathae menetʼ ona disạ dohokakʼpe.

⁷ Unige aboren Probhu Isor do; goṭa dhạrti do uniyakʼ ḍanṭaote calakʼkana.

⁸ Okaṭakʼ katha reakʼ hukum uni do hajar hajar bõsrenko lạgitʼe emlen, uniyakʼ ona bondobos reakʼ katha uni do jaejug hạbicʼe disạ dohoya.

⁹ Ona bondobos do Abraham lạgitʼe bandhaoleda ar Isạhak ṭhen hõe gokʼletʼa.

¹⁰ Uni do acʼakʼ bondobos Jakob ṭhen niạm lekate ar Israelko ṭhen do jaejug reakʼ bondobos lekateye lại sodor akada.

¹¹ Uniye metade tahẽkana, “Iń do Kanan disạmiń emama. Ar onage amakʼ bakhra reakʼ sompotti do hoyokʼa.”

¹² Onko do thoṛako tahẽkanre, hẽ ạḍi thoṛako tahẽkana, ar onḍe do porjạtrenko lekako tahẽkana,

¹³ Onko do onḍe eṭakʼ eṭakʼ jạtrenko talare ar eṭakʼ eṭakʼ rajosṭiko talareko ạcur baṛaekan tahẽkana,

¹⁴ Unre uni do okoehõ onko bae santao ocowatʼkoa. Onko iạte uni do rajkoe dhomkaoetʼko tahẽkana,

¹⁵ uni do onkoe metakokan tahẽkana, “Ińren ojokʼ akan hoṛko alope joṭetʼkoa; ar ińren nạbikoakʼ jãhãnakʼge alope loksan takoa.”

¹⁶ Ona tayom uni do onkoakʼ disạmre akale hoyocokeda ar jomakʼteye ṭonṭaketʼkoa;

¹⁷ Unre uni do mitʼṭen hoṛ onko lahateye kolkedea Josephgeye kolkedea; ar uni do golam lekateye ạkhriń ocoyena.

¹⁸ Ḍanḍa biṛi reakʼ sikṛite uniyakʼ jaṅga do kosṭoye ńamkeda, uni do mẽṛhẽtʼ reakʼ sikṛiteye tol ocoyena.

¹⁹ Uni okae menletʼ ona tinạkʼ din sạriyakʼ baṅ hoylen, unạkʼ din uni reaṅ Probhu Isorakʼ gokʼakʼ babotre uni do biḍạureye paṛao ocolena.

²⁰ Rajakʼ hukumte uniyakʼ sikṛiko do raṛa ocoyena; ar bikʼcạricʼ do uniye aṛakʼkedea.

²¹ Uni do acʼakʼ raj dolan ar ona reakʼ sanam sompotti cetanreye dohokedea,

²² Acʼakʼ sanaleka uni do rajren kạmiyạko ḍanṭaoreye dohoketʼkoa ar murubbiko do sopolhae ematʼkoa.

²³ Ona tayom Israel do Misorteye calaoena; ar Ham bõsrenkoakʼ disạmre Jakob do thoṛa dine tahẽyena.

²⁴ Probhu Isor do acʼren hoṛkoakʼ bõskoe baḍhao ocoketʼkoa; ar bạiriko khon hõ onkoakʼ daṛeye ḍher ocoketʼtakoa.

²⁵ Acʼren hoṛko upạrte uni do bạirikoakʼ ontorre hirkhại janam ocokeda, onate onko do uniren golamko sãote budkate calakʼko ehopʼena.

²⁶ Uni do acʼren guti Mose ar uniye bachaolede Arone kolketʼkinạ;

²⁷ Onkin hotete Probhu Isor do Ham bõsrenkoakʼ disạmre sanamko samaṅre ạḍi lekan cinhạ ar hahaṛa kạmikoe kạmikeda.

²⁸ Uni do ńute kolkeda, ar onate ńutena; uniyakʼ katha upạrte onko do bako teṅgolena.

²⁹ Onkoakʼ dakʼko do mãyãme hoyocoketʼtakoa, onate sanam hakoko gocʼena.

³⁰ Disạmre roṭe do kilbilạukʼ ko ehopʼena; ar rajakʼ oṛakʼ hạbicʼ don bolokʼko ehopʼena.

³¹ Uniyakʼ kathate jhãke jhãk tejoko hecʼena onkoakʼ disạm do kãṛã loṭocʼte perecʼena.

³² Uni do dakʼ lekage onko cetanre arele ńur ocokeda, ar goṭa disạmre bijli malkaokʼ ehopʼena.

³³ Onkoakʼ darkha nạ̃ṛĩ ar loa dare doe maraoketʼtakoa ar disạm reakʼ sanam darekoe rạputʼ giḍikada.

³⁴ Uniyakʼ kathate pohoko ar sosrocʼkoko hecʼena;

³⁵ onko do disạm reakʼ dare nạ̃ṛĩ ar phosolko jom cabakeda.

³⁶ Ona tayom uni do Misorrenkoakʼ pạhil jo, metatʼme pạhil janam hoponkoe maraoketʼkotakoa.

³⁷ Uni do sona rupạ salakʼ Israelkoe oḍokʼ ạguketʼkoa; ar onko gusṭiko modren okoe hõ bako laṅgalena.

³⁸ Onkoakʼ calakʼ iạte Misorrenko doko kusilena, ente Israelko do ạḍiko botorakokan tahẽkana.

³⁹ Onko aḍko lạgitʼ uni do acʼakʼ rimile doholeda, ar ńindạ marsal emokʼ lạgitʼ seṅgele emena.

⁴⁰ Onko do jomakʼko khojletʼte uni do gunḍri cẽṛẽkoe kolketʼkoa; ar serma khon piṭhại ematʼkoteye bi ocoketʼkoa.

⁴¹ Uni do dhiriye jhicʼ ocoketʼte, ona khon dakʼe emena; rohoṛ jaega talate ona do gaḍa dakʼ leka ạtu oḍokena.

⁴² Acʼren golam Abraham ṭhen oka sonot gokʼakʼe doholetʼ onae disạkeda.

⁴³ Rạskạ ar rạskạ sereń sãote acʼren bachao akan hoṛko uni doe oḍok ạguketʼkoa.

⁴⁴ Uni do eṭakʼ jạtrenkoakʼ disạm do Israelkoe ematʼkoa ar onko jạtrenkoakʼ khaṭao reakʼ jo do acʼren hoṛkoe ematʼkoa,

⁴⁵ Jemon onko do uniyakʼ niạmko manao ar uniyakʼ ạn lekako calao daṛeakʼ. Probhu Isorakʼge sarhao hoyokʼtae ma.