Sereńko 104 - সান্তালী বাইবেল

Sisirjạuicʼ sarhaoe

¹ E ińakʼ jiwi, Probhu Isor sarhao sereńaeme; E Probhu, ińren Isor, am dom dayawạnicʼ kana! Am do ṭhonok ar mantem sajao akana.

² Kicricʼ lekage am do marsalem horokʼ akawana; rimilge am do tạmbu lekam ṭaṅgao akada.

³ Amakʼ sermare tahen jaega reakʼ rehetʼ do serma reakʼ dakʼ cetanrem bạisạu akada; ar rimil do amakʼ gạḍim benao akada; ar am do hoe reakʼ phạ̃kṛạkʼtem calakʼ kana.

⁴ Hoe do amren goḍetem benao akadea; ar jolokʼkan seṅgel do amren golamem hoyocoakadea;

⁵ dhạrti do acʼakʼ rehetʼ cetanrem bạisạu akada; ona do tishõ baṅ ḍikạḍakekʼa.

⁶ Dhạrti do kicricʼtem esetʼakatʼ leka jalapuri reakʼ dakʼtem esetʼleda; buru ar boṭkocʼ hõ ona dakʼte unum cabalena.

⁷ Menkhan onako dakʼ do amakʼ hukumte calaoena; ona do amakʼ huḍur reakʼ aṛaṅte ńir calaoena.

⁸ Buru boṭkocʼko do arhõ usulena, ar joto lodamko do arhõ copotʼena; okaṭakʼ jaegam ṭhik dohoakatʼ tahẽkan onako do onḍe hạbicʼ seṭerena.

⁹ Nonkage am do dakʼ reakʼ simạkom ṭhik dohokada, jemon dakʼ do artis hõ simạko paromkate dhạrtire aloe chạplạu daṛeakʼ

¹⁰ Buru lodamkore amge dakʼ jharnakom kolkeda; ar ona dakʼ do buru talate ạtu calakʼ kana.

¹¹ Ona do jiwiyanko lạgitʼ dakʼe jogaoeda; onate birren gadhakoakʼ tetaṅ maraokʼ kana.

¹² Dakʼ aṛerege coṭren cẽṛẽ doko tukạyeda, onko do dare reakʼ ḍạrkoreko cero beroyeda.

¹³ Amakʼ serma reakʼ tahen jaega khon am do buru boṭkocʼko cetanre dakʼem emokʼkana; amakʼ ona kạmi iạte dhạrti doe tirpitokʼ kana.

¹⁴ Am do ạsul janwarko lạgitʼ ghãs ar manwakoakʼ cas lạgitʼ phosolem janam ocoyeda, jemon uni do ona hasa khon acʼlạgitʼ jomakʼe ńam daṛeakʼ.

¹⁵ Darkha rasa do manwakoakʼ mone rạskạ ocoyeda, sunum do uniyakʼ mẽtʼãhãe malkao ocoyeda, ar piṭhạ do uniyakʼ jiwire daṛeye ạguiyeda.

¹⁶ Probhu Isorakʼ sirjạuakʼ sanam dare nạ̃ṛĩko do ḍher dakʼe ńameda; ar uniye rohoe akatʼ Lebanon reakʼ debdạru dareko hõ dakʼe ńameda.

¹⁷ Ona darekore cẽṛẽkoko tukạyeda; kisni cẽṛẽko hõ saro darereko tukạ joṅkana.

¹⁸ Usul burukore do bir meromko ḍerakʼkana; ar saphon kulại hõ buru reakʼ dhasnare asrayko ńameda.

¹⁹ Okteko niṭ lạgitʼ am do ńindạ candom benao akadea; amakʼ okte lekage siń cando hõe hạsurokʼa.

²⁰ Ńutem ạgu lekhan do ńindạ hoyokʼkana, ar unre bir janwarko doko jạpitʼjoṅ kana.

²¹ Juạn dhạcri kul do sendra jel lạgitʼko hạnḍrạukʼa, ar Isor ṭhen khon jomakʼko khoja.

²² Siń candoe rakapʼlen khan onko doko calakʼa ar akoakʼ bhugạkʼreko giticʼjokʼa.

²³ Unre manwa do acʼakʼ kạmi lạgitʼe oḍokʼ calakʼa, ar ạyupʼ hạbicʼe khaṭaokʼa.

²⁴ E Probhu Isor, am do ạḍi utạrakʼkom sirjạu akada; ar amakʼ akelte onako dom benao akada; amakʼ sirjạuakʼ jiniskotege dhạrti do perecʼ akana.

²⁵ Hane maraṅ jalapuri, maraṅ ar sanam secʼ phaelaoge onḍe do lạṭu kạṭicʼ alekha laṛaokʼkan jiwiyanko menakʼkoa.

²⁶ Onare do jahajko calakʼ kana, ar onḍe do Libiạthon hõ menaea; uni do onare kheloḍ lạgitʼem benao akadea.

²⁷ Onko do jotoge amakʼ mẽtʼãhã secʼko koyokʼ akada, jemon ṭhik oktere jomakʼkom em daṛeako.

²⁸ Amem emakokanre onko doko halaṅjoṅ kana; Amakʼ tiyem khulạuetʼ khan onko do bhage bhage jinisteko bikʼ kana.

²⁹ Mẽtʼãhãm danaṅetʼtam khan onko doko keklesedokʼ kana; ar onkoakʼ sahetʼem hatao ruạrletako khan onko doko gujukʼa,

³⁰ Ar amren jiuem kol lekhan doko sirjạukʼa; ar nãwã nãwã jiwite dhạrtim sajaoeda.

³¹ Probhu Isorakʼ ṭhonok do jaejug hạbicʼ tahenma; uni do acʼakʼ kạmireye rạskạkʼ kana.

³² Uni do dhạrti secʼe beṅgetʼ lekhan ona do thar tharaokʼa; uniyakʼ joṭetʼte buru boṭkocʼ khon dhũạ oḍokokʼa.

³³ Iń do goṭa jionge Probhu Isor ńutumteń sereńa; tinạkʼ din jiwetʼ iń tahena unạkʼ din ińren Isor ńutumte sarhao sereńiń sereńa.

³⁴ Ińakʼ sanam ganḍonjoṅakʼ do jemon sebele bujhạu; iń do Probhu Isorregeń rạskạkʼ kana.

³⁵ Dhạrti khon kại hoṛ doko ḍahao maraokʼma; ar bedhoromko hõ jotogeko cabakʼma. E ińakʼ jiwi, Probhu Isorakʼ sarhao sereńme; Probhu Isorakʼge sarhao hoyokʼtae ma.