Sereńko 103 - সান্তালী বাইবেল

Isorakʼ dulạṛ

¹ E ińakʼ jiwi, Probhu Isor sarhaoeme; E ińakʼ ontor, uniyakʼ ṭhonokʼ baṛe sarhaotaeme.

² E ińakʼ jiwi, Probhu Isor sarhaoeme; uniyakʼ jãhãn bhạlại reakʼ katha alom hiṛińa.

³ Amakʼ sanam kại uni doe ikạitama; uni do amakʼ sanam rog bighinkoe bogeytama.

⁴ Uni do patal puri khon amakʼ jiwiye owaretʼtama; uni do asambheṛ dulạṛ ar dayateye esetʼ ạcuretʼmea.

⁵ Ar bhạlạiyanakʼ jiniskote uni doe tirpit ocoyetʼmea; uni do pajhaṛ cẽṛẽ leka nãwã juạn umere danama.

⁶ Probhu Isor do lek lekageye kạmikana; uni do julum ocokʼkanko hokʼ reakʼe bicạretʼtakoa.

⁷ Cetʼ monsubạte cetʼe cekaea ona do Moseye baḍae ocoakadea; acʼakʼ kạmi do Israelkoe ńel ocoakatʼkoa.

⁸ Probhu Isor do daya are mãyãwạnicʼ kana; uni do usạrate bae edre hodokʼa, uniyakʼ daya do asambheṛgetaea.

⁹ Uni do dusiko upạrte dinke dine ạnḍuṅa, uni do jaejug hạbicʼ edre do bae disạ dohokakʼa.

¹⁰ Aboakʼ kạiko lek do bae sạjại bona; ar aboakʼ ghạṭko lek do bae hala ruạṛ abona.

¹¹ Dhạrti khon serma tinạkʼ usul, unạkʼge uni do acʼ botoraekanko cetanre dulạṛ hõ ḍhergetaea.

¹² Pạchim khon purub tinạkʼ sạńgińakʼkan, onkage aboakʼ kại hõ sạṅgińteye ocokʼ giḍikakʼa.

¹³ Gidrạko lạgitʼ baba do cetʼ leka mãyã menakʼtae onkage acʼ botoraekanko cetanre uniyakʼ hõ mãyã menakʼtaea.

¹⁴ Abo cetʼ leka bon benao akan ona doe baḍaegea; dhuṛi chaḍa ar cetʼ hõ bon baṅkan ona hõe disạ akatʼgea.

¹⁵ Ghãs lekage aboakʼ bahaokʼ dinko do, ṭạnḍi reakʼ bahako lekage uni doe bahakʼ kana.

¹⁶ Baha cetanteye hoe lekhan baha do baṅ tahena; ar okareye bahalen onḍe hõ uni do bako disạyea.

^17-18 Menkhan okoe do Probhu Isorko sewawae kan ar uniyakʼ bondobosko manaoetʼkan ar ona reakʼ niạm leka calakʼko menetʼkan onko cetanre uniyakʼ dulạṛ ar pạtiạr do jaejug hạbicʼ piṛhike piṛhi tahena.

¹⁹ Probhu Isor do sermare uniyakʼ siṅghạsone tear akada; uni do jotowakʼ cetanregeye rajokʼa.

²⁰ E Probhu Isorren daṛean goḍetko, okoe do uniyakʼpe bataoetʼtae ar uniyakʼ hukumpe manaoetʼkan, ape do uni sarhaoepe.

²¹ E Probhu Isor sewawaekan daṛean dolko okoe do uniyakʼ sana lekape calakʼkan, ape do uni sarhaoepe.

²² E Probhu Isorakʼ rajosṭi reakʼ sanam ṭhạ̃ire uniyakʼ sanam sirjonko, ape do uni sarhaoepe; E ińakʼ jiwi, Probhu Isor sarhao sereńae me.