Sereńko 102 - সান্তালী বাইবেল

Dukre paṛao akan mitʼṭen hoṛakʼ koejoṅ

¹ E Probhu Isor, am do ińakʼ koejoṅ ańjomtińme; ińem goṛowạń khon ińakʼ noa rakʼjoṅakʼge am ṭhen baṛe seṭerokʼma.

² Ińakʼ muhinre alom dea giḍikạńạ. Ińakʼ katha luturakʼme; ińiń hohowamre alom biloma.

³ Ińakʼ dinko do dhũạ leka cabayena; ińakʼ jaṅko do culhạ seṅgelre lo roṅgokʼ kantińạ.

⁴ Setoṅ reakʼ tạpiste rohoṛ akan ghãs leka ińakʼ ontor do rohoṛ akana; iń do jom hõń hiṛińeda.

⁵ Bạ̃ṛti kuhrạu iạte ińakʼ hoṛmo reakʼ jaṅ ar harta chaḍa ar cetʼge bạnukʼa.

⁶ Iń do hahaṅkar ren bon bayar lekań hoyakana, ar ujạṛakʼ oṛakʼren dundu lekageń hoyakana.

⁷ Iń do bạń jạpitʼ daṛeakʼ kana; iń do sạṛim cetanre eskar akan cẽṛẽ leka minạńa.

⁸ Bạiriko do siń sạṭupʼ ińko henostawạń kana; ar iń cetanre okoeko edrekʼkan onko do ińakʼ ńutumko sarapakʼ kana.

^9-10 Am do ińem giḍi akadińạ; amakʼ ạṛis ar edre iạte iń do bhabnate torocʼ jomte diniń ṭalaoeda; ińakʼ mẽtʼ dakʼ do ńũi dakʼ sãote mitʼ akana.

¹¹ Ińakʼ dinko do ạyupʼ bela reakʼ umul leka hoyakana; ar ghãs lekageń rohoṛokʼ kana.

¹² Men khan E Probhu Isor, am do jaejug amakʼ siṅghạsonre menama; amakʼ ńutum do piṛhike piṛhi hạbicʼ tahena.

¹³ Am do Sion baṛe mãyãwakʼme ente uni dayawae reakʼ okte hoyakana, ar niṭ akatʼ somoe hõ seṭerakana.

¹⁴ Amren golamko do uniyakʼ dhiriko hạ̃sakʼ kana; ar ona reakʼ dhuṛi hõko mãyãwakʼ kana.

¹⁵ Unre Probhu Isorakʼ ńutum ańjomkate eṭakʼ jạtrenko do botor hecʼakoa; ar amakʼ ṭhonok ńelte dhạrtiren sanam rajko hõ botor caṛhaoakoa.

¹⁶ Probhu Isor do arhõ Sione teṅgo aroeya, ar uni do acʼakʼ ṭhonokteye ńel ocokʼa.

¹⁷ Uni do nandankoakʼ koejoṅ reakʼ roṛ ruạṛe emokʼa; onkoakʼ koejoṅ do bae nihạ̃t gidikatakoa.

¹⁸ Darakan bõsko lạgitʼ noako katha do ol tahena, jemon okoe ńit hõ bako janam akan onko do Probhu Isorko sarhao daṛeae.

^19-20 Bondikoakʼ hae hae ańjom lạgitʼ ar okoe gujukʼ reakʼ sạjạiko ńamakatʼ onko chaḍaoko lạgitʼ Probhu Isor do acʼakʼ sonot ṭhạ̃i khon latar secʼe oyoṅa, ar serma khon do dhạrti secʼe beṅgetʼ akada.

^21-22 Onate eṭakʼ jạtren ar rajosṭiko tinre Probhu Isor sewawae lạgitʼ mitʼ ṭhenko jarwakʼa, unre Probhu Isorakʼ ńutum do Sionre porcarokʼa.

²³ Ińakʼ jion reakʼ horre ińakʼ daṛeye komao akatʼtińạ, ińakʼ bahaokʼ dinkoe khaṭo akatʼtińạ.

²⁴ Onateń meneda, “E ińren Isor, amakʼ emakʼ bahaokʼ atra horre alo baṛem idiyińạ; ente am do jaejug hạbicʼ menama.

²⁵ Sedae jugre am do dhạrti reakʼ rehetʼem bạisạu akada; ar serma hõ amakʼ titegem benao akada.

²⁶ Onako do marao cabakʼa, menkhan am do jaejug hạbicʼem tahena. Onako do kicricʼ lekage mare cabakʼa; ar oyonakʼ lekam bodola, ar onako do kicricʼ leka pherao ocokʼa.

²⁷ Menkhan am do enkagem tahena; amakʼ bahaokʼ dinko do tishõ baṅ mucạdokʼa.

²⁸ Amren golamren gidrạko do jiwetʼgeko tahena; onkoren bõsko do am samaṅre ṭarhao akanko tahena.