Sereńko 10 - সান্তালী বাইবেল

Hok reakʼ bicạr ńam lạgitʼ koejoṅ

¹ E Probhu Isor, sạṅgińre do cedakʼem teṅgo akana? Ar gạr jokhecʼ do cedakʼem cokokokʼ kana?

² Bedhorom hoṛko do dhomokʼte nacarkoko santaoetʼkoa, menkhan onko do akoakʼ phorphundigeye sapʼ ocoyetʼkoa.

³ Bedhorom hoṛ do acʼakʼ ontor reakʼ bạṛicʼ monsubạteye gorbokʼ kana; ar lalocicʼ do Probhu Isore sarapae kana ar uniye neṅghao edekana.

⁴ Bedhorom hoṛ do ṭheṭamute Probhu Isore neṅghao edeya; uniyakʼ bạṛicʼ monsubạre noa hudisge menakʼa Isor mente ar okoe hõ bạnukʼkoa.

⁵ Uni do jitạu reakʼ horte jaogeye laha idikʼkana; uniyakʼ mẽtʼ do amakʼ ḍanṭao bae ńel ńama, ente ona do ạḍi coṭgea; ar acʼren sanam bạiriko doe neṅghaoetʼkoa.

⁶ Uni do mone moneteye meneda, “Nonkanakʼ cetʼge bạnukʼa one onate ińe dalhao daṛeạń; ar ińakʼ muskil do tishõ baṅ hoyokʼa.”

⁷ Uniyakʼ moca do sarap, ṭhok ar jorjulumte perecʼgea; uniyakʼ alaṅre do behok ar bạṛicʼakʼ reakʼ katha menakʼa.

⁸ Uni do atokore danaṅreye tãṛãkʼ baṛaea, ar nisun jaegare miridos hoṛe khũneya ar nindhạnicʼ do danaṅ danaṅteye tạṅkhi edekana.

⁹ Uni do danaṅre tahẽkate dhạcri kul lekae tãṛãkʼ akana; nacaricʼ sabe lạgitʼgeye onkayeda, ar jhạli oḍaokateye sabe kana.

¹⁰ Ona tayom do onkoe lebetʼ gańjaokoa; onko dukhạliạko do uniyakʼ jaṅga latarreko paṛaokʼ kana.

¹¹ Uni do mone moneteye meneda, “Isor doe hiṛiń akada; uni doe dea giḍiakada, ar tishõ bae ńeńela.”

¹² E Probhu Isor, ma teṅgonme; E Isor, amakʼ ti tiạrme, ar nacarko do alom hiṛińkoa.

¹³ Bedhorom hoṛ do Isor cedakʼe nihạ̃t giḍikaea? Ar mone monete cedakʼe meneda, “Uni do iń ṭhen jãhãn hisạb bae hataoa mente?”

¹⁴ Menkhan E Isor, amakʼ mẽtʼ do haron ar kosṭo bae beṅgetʼ paroma; am do amakʼ tirege ona dohoy me. Nandanicʼ do amakʼ tiregeye alaeyokʼkana; ar ṭũạr amaricʼ do amgem goṛowae kana.

¹⁵ Bedhorom ar bạṛicʼ hoṛakʼ ektiạri do caba utạrme baṛe; ar uniyakʼ sanam behok reakʼ hisạb hataome.

¹⁶ Probhu Isorge jaejugren raj kanae; uniyakʼ disạm khon eṭakʼ jạtren doko maraokʼa.

¹⁷ E Probhu Isor, am do mạ̃hirkoakʼ ontor reakʼ katham ańjomeda; ar amge dilem emakokana, ar onkoakʼ rakʼem ańjometʼtakoa.

¹⁸ Am dom onka akada, jemon ṭũạr amar ar santaokʼkan hoṛko secʼem teṅgo daṛeakʼ. Jemon niạ dhạrtirenko bako botor ocodaṛeako.