Sephaniạ 3 - সান্তালী বাইবেল

Jerusalem babotre nạbi katha

¹ Hae uni sasantaoicʼ, huhulicʼ ar bhonḍicʼ nagraha do!

² Uni do celege bae manaokoa, ar ḍanṭao hõ bae moneyakʼa. Probhu Isor cetanre uni do bae bhorsakʼkana, acʼren Isor ṭhen hõ bae senokʼkana.

³ Uniren rajren kạmiyạko do hạnḍrạukʼkan dhạcri kul leka ar disạm cakʼlaoko do ńindạren hunḍạr leka kanako; one setakʼ lạgitʼ cetʼge bako sarecʼ dohokakʼ kan.

⁴ Uniren nạbiko do ṭhok arko bepạtiạrgea. Uniren naekeko do sonotakʼko besonot ocoakada ar ạn-ạri upạrteko kạmikana.

⁵ Unireye tahenkan Probhu Isor doe dhoromgea; uni do bae behoka; uni do setakʼre acʼakʼ dhorom bicạre udukʼeda; oka hilokʼ hõ bae gạphileda. Menkhan bedhorom kạmikoakʼ lajao do bạnukʼtakoa.

⁶ Probhu Isore meneda, “Iń do jạt jạtrenkoń marao akatʼkoa; onkoakʼ usul pahra oṛakʼ hõ marao akana. Onkoakʼ hor doń ujạṛ akatʼtakoa; celege onare do bako dãṛãnkana. Onkoakʼ sanam nagraha do marao akana; onḍe do celege bạnukʼkoa ar celege bako girobasokʼ kana.

⁷ Iń ar do Jerusalemiń metatʼa, ‘ńitokʼ do khạṭigem botorạńạ ar ińakʼ ḍanṭaoem bataotińạ.’ Enḍekhan uniyakʼ tahen ṭhạ̃i do baṅ nosṭo ocokʼtaea, ińakʼ sanam sạjại hõ uni cetanre baṅ hijukʼa. Menkhan uniren hoṛko do gagoj salakʼ kharapakʼ kạmiko kạmiyeda.

⁸ “E Jerusalem, am do iń lạgitʼ koyokʼ horre tahenme; oka hilokʼ jạt jạtrenko upạrte goha emokʼ iń teṅgona enhilokʼ lạgitʼ koyokʼ hor akae tahenme. Iń doń ṭhik akada, jạt jạtrenkoń jarwakoa, ar rajosṭikoń mitʼ ṭheja ar onko cetanre ińakʼ khĩs, ar ińakʼ jolokʼkan edreń dula. Ińakʼ ontorre jolokʼkan seṅgelte goṭa dhạrti do lo cabakʼa.

⁹ Ar ona tayom do jạt jạtrenko napae alaṅiń emakoa jemon jotokoge ińko sewawạń ar jotoko mitʼ jomokteko dewa sewa daṛeạń.

¹⁰ Kus disạm reakʼ gaḍa hanasa khon iń sewawạńko, ar ińren chirchạtur akan hoṛko do iń ńutumte samaṅokʼakʼ jinisko ạguiya.

¹¹ Ar ińre okako behok reakʼem kạmiakatʼ ona iạte enhilokʼ am dom lajaokʼa, ente niạ nagraha khon iń do sanam hulạsokʼ ar bạḍạiyokʼkan hoṛkoń oḍok giḍikoa. Ińakʼ sonot buru cetanre am do ar tishõ bam gorbokʼa.

¹² Okoe Probhu Isor cetanreko bhorsakʼkan onkan mạ̃hir ar iń botorạńkan hoṛ do amreń sarecʼ dohokoa.

¹³ Israelren onko sarecʼ hoṛ do behokakʼ bako kạmiya; onko do eṛe katha hõ bako roṛa ar onkoakʼ moca khon phạsiaratetʼ hõ baṅ tahena. Onko do jom-ńũkate khạtirjomako jạpitʼjoṅa ar celege bako botor ocokoa.”

¹⁴ E Sion kuṛi, ma sereńme; E Israel, ãṭ aṛaṅte hohoeme; E Jerusalemren kuṛi, am do kusikʼme ar amakʼ goṭa ontorte rạskạkʼme.

¹⁵ Probhu Isor do amakʼ sạjạiye sạṅgiń giḍiakada, uni do amren bạirikoe laga ńir akatʼkoa. Israelren raj Probhu Isor do am talare menaea; am do ar tishõ bin bhạlạiyakʼ do alom botorakʼa.

¹⁶ Enhilokʼ am dom men ocokʼa, “E Sion kuṛi alom botorokʼa, ar alogem as chuṭạukʼa.

¹⁷ Amren Probhu Isor do amrege menaea, ar rurukhiyạme lạgitʼ daṛe menakʼgetaea. Uni do am reaṅ ạḍiye rạskạkʼa ar uniyakʼ khạndri dulạṛ reakʼ tirpitokʼte uni doe thir hapekʼa. Ar am reaṅ rạskạteye sereńa.”

¹⁸ Probhu Isore meneda, “Niṭ akatʼ porob bako palon daṛeatʼte amren okoeko hoṛko dukokʼkan onko doń jarwa mitʼakatʼkoa. Onko do bemanot reakʼ bojhako asen baṛayetʼkana.

¹⁹ Okoe amko santaoetʼme onko sanamkoge ona oktereń sạjạikoa; leḍhakoń bańcaokoa ar okoeko chirchạtur ocolen onko doń jarwakoa. Onkoakʼ lajao bodolte goṭa dhạrtire sarhao ar maniń emakoa.

²⁰ E Jerusalemren hoṛko, ona jokhecʼ iń do apeń ạgu jarwapea. Ar lahate leka tinreń ruạṛkatapea unre dhạrtiren sanam jạtrenko talare ape do manot ar ṭhonokan hoṛiń hoyocopea, ar onape ńela. Iń Probhu Isorge noa katha doń meneda.”