Sephaniạ 2 - সান্তালী বাইবেল

¹ E bin lajaokʼ jạtrenko, ape do midokʼpe ar mitʼ sãote jarwakʼpe.

² Ona din do peṭecʼ leka uḍạu hijukʼkana; onate niṭ akatʼ okte ạuri hijukʼre, ar Probhu Isorakʼ jolokʼkan edre apere ạuri hijukʼre, uniyakʼ khĩs ạuri hijukʼre ape do mitʼ saote jarwakʼpe.

³ E disạmren sanam mạ̃hir hoṛko, ape okoe do Probhu Isorakʼ hukum lekape kạmikan, ape do uniyakʼ sanaleka dhoromte ar mạ̃hirte calakʼpe; enḍekhan Probhu Isorakʼ edre reakʼ dinre ape do hoedaṛeakʼa asraype ńama.

Jạt jạtrenko upạrte nạbi katha

⁴ Gasa do ujạṛakʼ ar Askelon do dhaṅdhaserakʼ ṭhạ̃ige hoyokʼa. Asdodren hoṛ do siń marsalregeko laga ńir ocokʼa ar Ekron doe totʼ giḍi ocokʼa.

⁵ E Kerithiren hoṛko, okoe do jalapuri aṛerepe tahenkan, hae ape do! E Philisṭikoakʼ Kanan, am upạrte Probhu Isorakʼ katha do nonka, “Am do nonkań jarkharmea, amre celege bako tahena.”

⁶ Jalapuri aṛe reakʼ jaega do ạtiń ṭạnḍikoge hoyokʼa; onḍe do gukʼpikoakʼ kumbạ ar bhiḍikoakʼ khạṛ tahena.

⁷ Onako ṭoṭha do Jihudi bõsren sarecʼkoakʼ ạidạrire tahena; onḍe onko do ạtiń reakʼ ṭhạ̃iko ńama. Ar ạyupʼ jokhecʼ do Askelonakʼ oṛakʼreko giticʼa. Onkoren Probhu Isor do onkoe ńel todarotkoa; ar lahate lekae ruạṛkatakoa.

^8-9 Israelren Isor phạdkoren Probhui meneda, “Moab reakʼ henosta ar Amonrenkoakʼ landa dhutʼ reakʼ katha doń ańjom akatʼgea; unkin do ińren hoṛkin henosta akatʼkoa ar onkoakʼ disạm dokhol lạgitʼte ạḍikin bạḍạiyokʼ kana. Iń ńutumte kiriạkateń meneda, Moab do khạṭige Sodom leka ar Amonrenkoakʼ disạm do Gomora lekań hoeocoya. Ona do rạṅgạini jhạuạko, buluṅ reakʼ khet ar jaejug lạgitʼ potit jumige hoyokʼa. Iń jạtren sarecʼ tahen hoṛko do unkinakʼko luṭtạkina ar disạmko ạidạrijoṅa.”

¹⁰ Unkin do ạkinakʼ bạḍại iạtege noa kuṛạikin ńama, ente phạdkoren Probhu Isorren hoṛkin landa dhutʼatʼko tahẽkana ar onko upạrte apnartetʼ do maraṅkin udugokʼkan tahẽkana.

¹¹ Probhu Isor do unkin ṭhen maraṅ botoranicʼgeye hoyokʼa; uni do dhạrtiren sanam debotakoe nijor ocokoa. Unre sạṅgiń disạmren sanam jạtren hoṛ do apan ạpin disạm khon uniko sewawaea.

¹² Probhu Isore meneda, “E Kusrenko, apehõ ińakʼ tarwaṛetepe gujukʼa.”

¹³ Probhu Isor do utạr secʼ birudre ti tiạrkate Ạsurrenkoe marao giḍikoa ar Niniwi do ujạṛ utạrakʼ ar hahaṅkar leka khaṅgoṭ ṭhạ̃igeye hoeocoya.

¹⁴ Onḍe do ḍaṅgra ar bhiḍi palko ar sanam jạtren jiwiyanko basakʼa. Hahaṅkarren kokor ar dundu do ona reakʼ khunṭi chatnakoreko basakʼa, ar jalna secʼte onkoakʼ rakʼ do ańjomokʼa. Oṛakʼ duạr do marao utạrokʼa ar onako reakʼ debdạru dare reakʼ tokta do luṭ idikʼa.

¹⁵ Noage hulạsokʼkan nagraha do one okare nirại menakʼ. Uni do mone moneteye mena, “Ińge minạńa, iń chaḍa ar celege bạnukʼkoa.” Uni do okalekae maraoena, ar bir janwarkoakʼ asray ṭhạ̃ige hoyena! Ar okoe ona aṛeteko parom calakʼ onko doko landa dhudhutʼa ar buḍhạ kạṭupʼko uduga.