Sakariạ 9 - সান্তালী বাইবেল

Israelren bạirikoakʼ bicạr

¹ Hadrak ar Damesek upạrte Probhu Isorakʼ oka katha sodorlen ona do purạukʼa. Israel gusṭirenko ar eṭakʼ sanam manwakoakʼ mẽtʼ do Probhu Isorrege menakʼa.

² Hamat, oka do Hadrak simạna ṭhen menakʼ ona upạrte hõ Probhu Isorakʼ katha do purạukʼa. Tur ar Sidonrenko do ạkilan hoṛ kanrehõko, enhõ onko upạrte ona do hoyokʼgea.

³ Tur do apnar lạgitʼ mitʼṭecʼ gaṛe benao akawana ar dhuṛi leka rupại jarwa akada ar hor reakʼ losotʼ leka do sonage.

⁴ Menkhan Probhu Isor do uniyakʼ sanamakʼe sạṅgiń giḍikakʼa; uniyakʼ dhon-durib do jalapurireye khadle giḍikataea ar seṅgel do ona nagrahae jarkhara.

⁵ Askilan do ona ńelteye botorokʼa, Gasa do hasoteye thakaokʼa ar Ekronakʼ dosa hõ onage hoyokʼa, ente uniyakʼ as do baṅ puruạukʼtaea. Gasa do acʼren raje adea ar Askelonre do celege bako tahena.

⁶ Mesal jạtren bõsko do Asdodreko girobasokʼa. Probhu Isore meneda, “Philisṭikoakʼ bạḍại doń maraotakoa.

⁷ Onkoakʼ moca khon mãyãm sudhạ jel ar baronakʼ eṭakʼakʼ jomakʼ iń oḍoktakoa. Onko modre okoe jiwetʼko tahen onko do ińren hoṛko hoyokʼa; onko do Jihudạren mitʼṭen bõsren lekako hoyokʼa ar Ekron do Jebusiko lekae hoyokʼa.

⁸ Jhãpko calaoetʼkan lạṛhại phạdkoakʼ ti khon ińren hoṛkoń rukhiyạkoa. Jãhãn sasantaoko do tishõ ińren hoṛko ṭhen bako hijukʼa, ente ńitokʼ do ińgeń horhoyetʼkana.

Sionren raje hijukʼkan

⁹ “E Sion kuṛi, ma rạskạkʼme. E Jerusalem, hulạsokʼme. Ńelme amren raj do am ṭhene daraekana; uni doe dhoromgea ar uni ṭhen do bańcao menakʼa; uni doe mạ̃hirgea, ar gadha cetanre gadha hopon cetanreye decʼ hijukʼkana.

¹⁰ Iń Ephrayimge rãt gạḍi ar Jerusalemren lạṛhại sadom jotogeń maraokoa ar lạṛhại reakʼ akʼ iń rạputʼ giḍikatakoa. Uni do jạt jạtrenko ṭhen suluke lại sodora. Uniyakʼ ḍanṭao do doreão khon doreão hạbicʼ, Phurạt gaḍa khon dhạrti reakʼ ses simạnako hạbicʼ hoyokʼtaea.

¹¹ E Jerusalem, am lạgitʼ ińakʼ bondobos bạisạu reakʼ mãyãm iạte amren bondi akanko do ona rohoṛ khorloṅ khoniń chaḍaokoa.

¹² E aste perecʼ bondi akanko, ape do apeakʼ gaṛte ruạṛ calakʼpe; teheń iń doń kiriạkʼkana, ape do bar doboṛiń bhorapea.

¹³ Jihudạ do akʼ leka ar Ephrayim do sar lekań beoharea. E Sion, iń do amren hoponko Grecce disạmren hoponko upạrteń uskạukoa ar am do lạṛhại reakʼ tarwaṛe lekań hoyocomea.”

Probhu Isorakʼ hijukʼ reakʼ

¹⁴ Ona tayom Probhu Isor do acʼren hoṛko talareye sodorokʼa; uniyakʼ sar do bijli leka malkaokʼtaea. Probhu Isor do sakwae oroṅa ar dạkhin reakʼ birbão hoe lekae laha calakʼa;

¹⁵ Phạdkoren Probhu Isor do onkoe rukhiyạkoa. Onate onko do bạirikoko maraokoa ar onkoakʼ bạṭul reakʼ dhiriko do jaṅgateko lebetʼ gańjaoa. Onko do darkha rasako ńũiya ar bul hoṛ lekako andoṛa; pinḍ reakʼ konacre mãyãm coḍor leka onko do ḍher mãyãmko joro ocoya.

¹⁶ Enhilokʼ onkoren Probhu Isor do bhiḍi palko leka acʼren hoṛkoe bańcaokoa. Onko do uniyakʼ disạmre mukuṭ reakʼ hirạ-mạnik lekako jhak jhakaokʼa.

¹⁷ Onkoakʼ cehra do ạḍi mońj hoyokʼtakoa. Onkoakʼ phosol do onkoren juạn koṛakoe sahre ocokoa ar nãwã darkha rasate do onkoren juạn kuṛikoge.