Sakariạ 8 - সান্তালী বাইবেল

Jerusalem pạhil dosate ruạṛ reakʼ Probhu Isorakʼ gokʼakʼ katha

^1-2 Ar phạdkoren Probhu Isorakʼ katha do sodorena. Uni doe menkeda, “Sion lạgitʼ ińakʼ ontor do lokʼ kantińạ; iń do ona lạgitʼ ạḍitetʼ iń ãṭokʼkana.

³ Iń do Sionte ruạṛ hecʼkate Jerusalemreń tahena. Unre Jerusalem do ‘sạriyakʼ reakʼ nagraha’ ar phạdkoren Probhu Isorakʼ buru do ‘sonot buru’ mente ńumogokʼa.

⁴ Umerte laha akan herel hoṛ ar maejiuko do arhõ Jerusalem reakʼ ṭhạ̃ire duṛupʼkate okteko khemaoa ar ḍher umer iạte onko mimitʼkoakʼ tire do ṭheṅga tahena.

⁵ Nagraha reakʼ maedanre aema koṛa hopon ar kuṛi hoponko enecʼ baṛaea.

⁶ Ar okako hoyokʼ ona do noko jạtren sarecʼ jiwetʼ tahen hoṛko ṭhen do oho hoedaṛelena mente hudiskokʼa, menkhan iń ṭhen baṅ hoyokʼakʼ do bạnukʼa. Iń phạdkoren Probhu Isorge noa katha doń meneda.

⁷ Iń do arhõń meneda, purub disạmrenko ar pạchim disạmrenko khon ińren hoṛkoń rukhiyạkoa.

⁸ Jerusalemre girobasokʼ lạgitʼge onko doń ruạṛ ạgukoa. Onko do ińren hoṛko hoyokʼa ar iń do onkoren Isoriń hoyokʼa; ar onkore pạtiạr ar dhoromgeń tahena.

⁹ “Iń phạdkoren Probhu Isorgeń meneda, ińakʼ oṛakʼ benao lạgitʼ rehetʼ bạisạu jokhecʼ nạbiko do ona kathageko roṛleda, ar ńitokʼ ape do inạ kathagepe ańjomeda; onate ape do daṛeanko hoyokʼpe.

¹⁰ Ona kạmi ạuri ehopʼre manwako reakʼ kuṛạige baṅ tahẽkana ar janwarakʼ hõ bhaṛa bako em daṛeakʼkan tahẽkana. Bạiri iạte celege khạtirjoma bako dãṛãnkan tahẽkana ente ińge mimitʼko do ako aḍepaseren hoṛko upạrteń uskurletʼkoa.

¹¹ Menkhan ńitokʼ do noko jạtren jiwetʼ sarecʼ hoṛko sãote lahate leka do bạń beohara.

¹² Ńitokʼ do itạ khon dare do mońjtege harakʼa, ar darkha nạ̃ṛĩre jo sabokʼa, khetre phosol janamokʼa ar noko jạtren jiwetʼ tahen hoṛko do iń emakʼ ạidạri lekate jotowakʼko ńama.

¹³ E Jihudạ ar Israel gharońjrenko, lahate jạt jạtren hoṛko do sarap lekate apeakʼ ńutumko ńumetʼ tahẽkana, menkhan ńitokʼ iń do apeń bańcaopea ar onko do apeakʼ ńutum bhor lekateko ńuma. Alope botorokʼa, bickom daṛeanko hoyokʼpe.

¹⁴ “Iń phạdkoren Probhu Isorgeń meneda, aperen hapṛamko tinre ińko khĩs ocoledińa unre onko cetanre muhiniń ạguiya menteń ṭhik doholeda ar ona hõń hoyocoletʼa.

¹⁵ Menkhan ńitokʼ do arhõ Jerusalem ar Jihudạ lạgitʼ bhạlạiyiń ạguiya menteń ṭhik doho akada. Ape do alope botorokʼa.

¹⁶ Niạko hukum do manao hoyokʼtapea. Ape do eṭakʼko ṭhen sạriyakʼ kathape roṛa ar apeakʼ adalotre hok reakʼpe bicạra jemon hoṛko talare suluk hoyokʼ;

¹⁷ ar okoe upạrte hõ bạṛicʼakʼ do alope phundiya ar eṛe goha hõ alope ema. Iń Probhu Isor do noakoń hirkhạwakʼ kana.

¹⁸ Phạdkoren Probhu Isor do arhõ ińe metadińạ,

¹⁹ “Ponakʼ, mõṛẽakʼ, eaeakʼ ar gelakʼ cando reakʼ upạs do Jihudiko lạgitʼ rạskạteakʼ, kusiyakʼ ar bhạlạiyanakʼ porobge hoyokʼa. Onate ape do sạriyakʼ ar sulukge dulạṛpe.

²⁰ “Nonkan okte hijukʼa tinre ḍher jạtrenko ar ḍher nagraharen hoṛko do Jerusalemteko hijukʼa;

²¹ ar mitʼ nagraharen hoṛko do eṭakʼ nagrahare senkateko mena, ‘sanam phạdkoren Probhu Isorakʼ bhor ataṅ lạgitʼ ar uniyakʼ sewae lạgitʼ, ńitge bon calakʼma.’ Unre ḍher hoṛgeko mena, ‘iń hõń calakʼa.’

²² Iń sewawạń lạgitʼ ar ińakʼ bhor hatao lạgitʼ ḍher hoṛko ar daṛean jạtrenkoge Jerusalemteko hijukʼa.

²³ Ona jokhecʼ aema pạrsi ar jạtkoren gel goṭen hoṛ do mitʼṭen Jihudi hoṛakʼ kicricʼ ańcar sapʼkateko mena, ‘ale hõ ape sãotele calakʼa, ente alele ańjom akada, Isor do ape sãorege menaea.’ Iń phạdkoren Probhu Isorge noa katha doń meneda.”