Sakariạ 7 - সান্তালী বাইবেল

Upạs babotre kukli ar roṛ ruạṛ

¹ Darjawese rajokʼ ponakʼ bochor reakʼ Kislew ńutumakʼ areakʼ cando reakʼ ponakʼ dinre Probhu Isorakʼ katha do Sakariạ ṭhen sodorena.

² Ona jokhecʼ Probhu Isorakʼ bhor ataṅ lạgitʼ Bethelren hoṛko do Sareser, Regem-melek ar unkinren hoṛko kolketʼkoa.

³ Onko do phạdkoren Probhu Isorakʼ oṛakʼren naekeko ar nạbiko noa katha kuli lạgitʼko kolketʼkoa, “Unạkʼ bochor okalekale ceka ạguakatʼ onkage cetʼ mõṛẽakʼ candorele homor halaṅa arle upạsa?”

⁴ Unre phạdkoren Probhu Isor do ińe metadińạ,

⁵ “Am do disạmren sanam hoṛ ar naekekom metakoa, ‘ape do eaegel bochor khon mõṛẽ ar eaeakʼ candore okape homor halaṅetʼ tahẽkan arpe upạsetʼ tahẽkan ona do Probhu Isor ńutumte do bape onka akada.

⁶ Ar tinrepe jom ńũiyetʼ tahẽkana unre apnar lạgitʼgepe onkayetʼ tahẽkana.

⁷ Jerusalem ar ona beṛhaeteakʼ nagrahakore tinre hoṛko girobasokʼ kan tahẽkana ar tinre ona reakʼ dosa bhage tahẽkana ar Negeb ar pạchim reakʼ latar buru ṭoṭhakore hoṛko tahẽkana unrehõ Probhu Isorakʼ noako katha do lahaten nạbiko hoteteye roṛlena.’ ”

^8-9 Probhu Isor do arhõe metadińạ, “Iń phạdkoren Probhu Isorge noako katha doń metatʼko tahẽkana, ‘hok reakʼ bicạrpe; ar ape talare pạtiạranko hoyokʼpe ar dayakʼ salakʼ beoharpe.

¹⁰ Ape do rạnḍi maejiuko, ṭuạ̃r amarko, bidisiạko ar reṅgecʼ hoṛko alope santaokoa.’

¹¹ “Menkhan onko do ona ańjom bako rebenlena; onko do hoṭokʼko keṭecʼketʼtakoa ar ruạṛ senkate luturko esetʼketʼtakoa.

¹² Onko do dhiri leka monko keṭecʼketʼtakoa ar ạn-ạri do bako bataoleda. Iń phạdkoren Probhu Isorge ińren Jiu hotete lahaten nạbiko hotete okaṭakʼ kathań kolletʼ ona hõ bako luturada. Ar onatege ińakʼ maraṅ edre do jol rakapʼlentińạ.

¹³ Ińiń hohowatʼkore hõ onko do bako hetawatʼtińạ, ar onkoko hohowạdińre iń phạdkoren Probhu Isor do bạń ańjomletʼtakoa.

¹⁴ Iń do bin oprom jạtrenko talareń pasnaoletʼkoa. Inạ tayom onkoakʼ disạm do nonka khaṅgoṭakʼ hoylena, onḍe do celege bako senokʼkan tahẽkana. Nonkate ona mońj disạm do ujạṛ utạrakʼko hoyocoleda.”