Sakariạ 6 - সান্তালী বাইবেল

Ponea rãt gạḍi

¹ Iń do arhõń beṅgetʼketʼ khan ponea rãt gạḍiń ńelkeda. Onako do barea buru tala khon oḍok hijukʼkan tahẽkana. Ar ona burukin do tama reakʼ tahẽkana.

² Pạhilakʼ rãt gạḍire do jotoge arakʼ sadomko tahẽkana ar dosarakʼ rãt gạḍire do jotoge hende sadomko tahẽkana.

³ Ar tesarakʼ rãt gạḍire do jotoge ponḍ sadomko tahẽkana ar ponakʼ rãt gạḍire do nana parkan roṅan sadomko tahẽkana; ar joto sadomge daṛegeko tahẽkana.

⁴ Iń do uni serma goḍet iń kulikedea, “E ińre kĩsạ̃ṛ, noako do cetʼkana?”

⁵ Uni doe roṛ ruạṛạdińa, “Noako do serma reakʼ ponea hoe kana; goṭa dhạrtirenko Probhu Isor samaṅreko teṅgolen tayom noko doko oḍokʼ hijukʼa.

⁶ Hende sadomkoakʼ rãt gạḍi do utạr disạm secʼ calakʼkana, ar ponḍ sadomkoakʼ rãt gạḍi do pạchim secʼ ar nana parkan roṅan sadomkoakʼ rãt gạḍi do dạkhin secʼ calakʼkan tahẽkana.”

⁷ Daṛe sadomko do oḍok hecʼkate goṭa dhạrti dãṛã ạcurkate ńel lạgitʼko asbasao baṛaekan tahẽkana. Unre uni serma goḍete menkeda, “Dhạrti reakʼ sanam jaegako dãṛãkate ńelpe.” Onate onko do dhạrti reakʼ sanam jaegako dãṛã dãṛãte ńel lạgitʼko oḍok calaoena.

⁸ Ona tayom uni do hohoạdińteye metadińạ, “Ńelme, okoe utạr secʼko calakʼkan onko do ińakʼ edreko dapalketʼtińạ.”

Josuạ lạgitʼ mukuṭ

⁹ Tayomte Probhu Isor do ińe metadińạ,

¹⁰ “Babel reakʼ bondi dosa khonko ruạṛ hecʼakan Heldai, Tobiạ ar Jedae teko ṭhen khon sona ar rupạ hataome. Ar enhilokʼge am do Sephaniạ hopon Josuạ ṭhen calakʼme.

¹¹ Ona tayom do ona sona ar rupạte mitʼṭecʼ mukuṭem benaoa ar Jehosadak hopon maraṅ naeke Josuạ do bohokʼrem horokʼaea.

¹² Arem metaea, phạdkoren Probhu Isore meneda, ‘nuige uni hoṛ do, one uniyakʼ ńutum do dare reakʼ kahle kan; uni do acʼakʼ ṭhạ̃i khone hara rakabokʼa ar Probhu Isorakʼ oṛakʼe benaoa.

¹³ Hẽ, unige Probhu Isorakʼ oṛakʼe benaoa. Uni do rajakʼ manote emocokʼa ar acʼakʼ siṅghạsonre duṛupʼkateye ḍanṭaokoa. Uni do mitʼṭecʼ naeke lekate siṅghạsonreye duṛupʼa ar onate noakin banar hudạ talare begartetʼ do baṅ tahena.’

¹⁴ Helem, metakʼme, Heldai, Tobia, Jedae ar Sephaniạren hopon Hen, metakʼme Josuạ disạye reakʼ cinhạ lekate ona mukuṭ do Probhu Isorakʼ oṛakʼrege tahena.

¹⁵ “Okoe sạṅgińre menakʼko onko do hecʼkate Probhu Isorakʼ oṛakʼ benao lạgitʼ goṛoko emokʼa. Unre ape dope baḍae daṛeakʼa, phạdkoren Probhu Isorge iń doe kol akadińạ. Ape do joton salakʼ aperen Probhu Isorakʼ kathape ańjomtaea enḍe anecʼ noako do purạukʼa.”