Sakariạ 5 - সান্তালী বাইবেল

Uḍạukʼkan puthi

¹ Iń do arhõ beṅgetʼkateń ńelkeda oṭakʼ akan guṛhạ puthi do uḍạukʼkana.

² Uni doe metadińa, “Am do cetʼem ńeleda?” Iń doń roṛ ruạṛkeda, “Iń do bargel moka jeleń ar gel moka osar mitʼṭecʼ uḍạukʼkan puthiń ńeleda.”

³ Uni doe metadińạ, “Noa do hoyokʼkana ona sarap oka do goṭa dhạrtire sodorokʼ. Ona reakʼ olakʼ lekate joto kombṛo doko laga ńir ocokʼa ar eṭakʼ secʼakʼ katha lekate eṛe eṛe kiriạkʼko hõko sạṅgiń ocokʼa.

⁴ Phạdkoren Probhu Isore meneda, ‘iń do ona sarapiń kola ar ona do kombṛokoakʼ oṛakʼre ar okoe iń ńutumte eṛe eṛeko kiriạkʼkan onkoakʼ oṛakʼte senkateye bolokʼa ar onkoakʼ oṛakʼ reakʼ kaṭ ar dhiri sudhại jarkhartakoa.”

Bhajan talaren maejiu

⁵ Ona tayom uni serma goḍet do laha nõkʼ hecʼkateye metadińạ, “Am do coṭ secʼ beṅgedme cetʼ hijukʼkana?”

⁶ Iń doń kulikedea, “Ona do cetʼkana?” Uni doe roṛ ruạṛạdińa, “Ona do mitʼṭecʼ sosoṅakʼ bhajan kana.” Uni do arhõe menkeda, “Ona do okoe goṭa dhạrtiko behoketʼkan onkoakʼ rup kana.”

⁷ Ona tayom ona bhajan reakʼ sisạ ḍhakna oṭakʼen khan onare mitʼṭen maejiu do duṛupʼ akane ńelena.

⁸ Uni serma goḍet doe metadińa, “Nui doe hoyokʼkana dusṭạmi.” Ar noa menkate uni maejiu do ona bhajanreye ṭhelao bhoraokedea ar ona reakʼ moca do sisạ ḍhaknateye hạrupʼkada.

⁹ Ona tayom iń doń beṅgetʼ rakapʼketʼ khan barea maejiu do hoe sãote oṭaṅ hijukʼkaniń ńelketʼkinạ. Unkinakʼ phạ̃kṛạ̃kʼ do kisni cẽṛẽakʼ phạ̃kṛạ̃kʼ leka ar unkin do ona bhajan coṭtekin rakapʼ idikeda.

¹⁰ Unre iń do uni serma goḍetiń kulikedea, “Ona bhajan do okatekin idiyeda?”

¹¹ Uni doe roṛ ruạṛadińa, “Unkin do Sinạr disạmtekin idiyeda. Onḍe do uni maejiu lạgitʼ mitʼṭecʼ oṛakʼ benaokʼa. Ar oṛakʼ benao sạtlen khan uni do acʼakʼ ṭhạ̃ire kin duṛubea.”