Sakariạ 4 - সান্তালী বাইবেল

Sona reakʼ diuhe dohowakʼ ar barea jạitun dare

¹ Ona tayom okoeṭakʼ serma goḍet do iń sãoteye galmarao kan tahẽkan uniye ruạṛ hecʼena ar jạpitʼ khon ebhenkediń lekae ebhenkedińa.

² Uni doe metadińa, “Am do cetʼem ńeleda?” Ińiń roṛ ruạṛadea, “Iń do mitʼṭecʼ sona reakʼ diuhe dohowakʼ iń ńeletʼkana ar ona reakʼ bohokʼre do mitʼṭecʼ sunum reakʼ cukạkʼge. Ona diuhe dohowakʼ cetanre eae goṭecʼ diuhe ar mimitʼ goṭecʼ diuhere eae goṭecʼkate sultạ dohoy reakʼ jaega menakʼa.

³ Ona diuhe dohowakʼ ṭhen barea jạitun dare menakʼa, jojomti secʼ mitʼṭecʼ ar leṅgati secʼre ar mitʼṭecʼ.”

⁴ Iń do uni serma goḍetiń kulikedea, “E ińren kĩsạ̃ṛ, noako do cetʼkana?”

⁵ Uni do ińe roṛ ruạṛạdińa, “Noako cetʼkan ona do cetʼ bam baḍaekana?” Ińiń menkeda, “E ińren kisạ̃ṛ, iń do bạń baḍaea.”

⁶ Unre uni doe metadińa, “Probhu Isor do Serubabel noa sombate emaekana, ‘daṛe se ektiạri hotete do baṅa, menkhan iń phạdkoren Probhu Isorgeń meneda, ińren Jiu hotete am dom jo bahakʼa.

⁷ E maraṅ utạrakʼ buru, am dom okoekana? Serubabel samaṅre am do ot lekagem hoyokʼa. Koejoṅ oṛakʼ reakʼ mucạtʼ dhiri bạisạu jokhecʼ hoṛ do hohokateko mena, ạḍi mońjge hoyakana.’ ”

⁸ Ona tayom Probhu Isorakʼ noa katha do iń ṭhen sodorena,

⁹ “Serubabelakʼ ti do noa mundil reakʼ rehetʼe bạisạu akada ar uniyakʼ titege noa do sạtokʼa. Unre hoṛko baḍae daṛeakʼa, iń phạdkoren Probhu Isorge onko ṭhen amgeye kol akatʼmea.

¹⁰ Nunạkʼ din oka kạmi hoyakan ona do hoṛko nihạ̃t giḍi akada. Menkhan Serubabelakʼ tire sạhul baber ńelte hoṛ doko rạskạkʼa.” Ona tayom iń ańjomkeda, “Niạ eae goṭecʼ diuhe do hoyokʼkana Probhu Isorakʼ mẽtʼ oka do goṭa dhạrtiye ńeletʼkan.”

¹¹ Unre iń do uni serma goḍet iń kulikedea, “Ona diuhe dohowakʼ reakʼ jojomsa aṛere ar leṅgasa aṛere oka barea jạitun dare menakʼ onakin do cetʼkana?”

¹² Iń do arhõń kulikedea, “Ona banar jạitun dare reakʼ ḍạr khon sona roṅ sunum oḍok hecʼente sona diuhe dohowakʼ reakʼ banar sultạ dohowakʼ ṭhạ̃ire ńurena. Ona ḍạr reakʼ mane do cetʼkana?”

¹³ Uni doe roṛ ruạṛadińa, “Am do cetʼ bam baḍaea ona banar reakʼ mane do cetʼkana mente?” Ińiń meneda, “E ińren kĩsạ̃ṛ, iń do bạń baḍaea.

¹⁴ Unre uniye menkeda, “Onakin do hoyokʼkana unkin bar hoṛ okoe do goṭa pirthimiren Probhu Isor sapʼsorae lạgitʼ kin ojokʼ bahal ocoakan.”