Sakariạ 3 - সান্তালী বাইবেল

Maraṅ naeke lạgitʼ sapha kicricʼ

¹ Ona tayom uni serma goḍet do maraṅ naeke Josuạ samaṅre teṅgo akaniń ńelkedea ar dusiye lạgitʼ Soetan do uniyakʼ jojomsa aṛereye teṅgo akana.

² Probhu Isor do Soetane metadea, “E Soetan, Probhu Isor do ame tạkicʼ daram mema. Jerusalem okoeye bachao akawan uni do ame tạkicʼ daram mema. Nui hoṛ do cetʼ seṅgel khon or oḍok akatʼ ṭhuṭkutʼ doe baṅkana?”

³ Unre Josuạ do mạilạ kicricʼ horokʼ akatʼ dosarege Probhu Isorren goḍet samaṅreye teṅgo akan tahẽkana.

⁴ Uni goḍet do acʼ samaṅre teṅgo akan eṭakʼ goḍetkoe metatʼkoa, “Uniyakʼ mạilạ kicricʼko totʼ giḍikataepe.” Ona tayom uni do Josuại metadea, “Ńelme amakʼ kạikoń sạṅgiń giḍi akatʼtama ar iń do mońj kicricʼ iń horokʼama.”

⁵ Unre iń doń menkeda, “Uni do bohokʼre mitʼṭecʼ saphawakʼ dạhṛiye em ocokʼma.” Ona iạte onko goḍetko do uniyakʼ bohokʼre mitʼṭecʼ dạhṛi ar kicricʼ hõko horokʼadea.

⁶ Ona tayom Probhu Isorren goḍet do Josuại metadea,

⁷ “Phạdkoren Probhu Isor do ame metamkana, ‘am do ińakʼ hortem senlen khan arem sapʼsorạń khan tobe do ińakʼ oṛakʼ reakʼ jotowakʼem ạyura ar ińakʼ khạrại ńel todarot reakʼ bharem ńama, ar okoe nonḍeko teṅgo akan onko leka iń samaṅre hijukʼ reakʼ ạidạriń emama.

⁸ E Maraṅ naeke Josuạ, am do ańjomme ar am samaṅre duṛupʼakan amren sãoten naeke hõko ańjomma. Iń okaṭakʼ kahle metakʼme ińren gutiń ạguiye unigeye hoyokʼa naekeko reakʼ cinhạ do.

⁹ E Josuạ, iń do am samaṅre mitʼṭecʼ dhiriń dohoakada. Ona dhiri cetanre do eae goṭecʼ mẽtʼ menakʼa, ar ona cetanre mitʼṭecʼ kathageń rokʼ dohokakʼa ar mitʼ dinrege noa disạm reakʼ kại doń sạṅgiń giḍikakʼa.

¹⁰ Enhilokʼ ape mimitʼko do apeakʼ darkha nạ̃ṛĩ ar loa dare buṭạre duṛubokʼ lạgitʼ ape ạḍepaseren hoṛkoń neotakoa. Iń phạdkoren Probhu Isorge noa katha doń meneda.’ ”