Sakariạ 14 - সান্তালী বাইবেল

Probhu Isor do hecʼkateye rajokʼa

¹ Probhu Isorakʼ nonkan din hijukʼ kana oka hilokʼ Jerusalemren hoṛkoakʼ jinisko luṭokʼtakoa ar onko samaṅrege hạṭińokʼa.

² Jerusalem upạrte lạṛhại lạgitʼ Probhu Isor do sanam jạtrenkoe jarwakoa. Nagraha dokholokʼa, oṛakʼ duạr luṭokʼa ar maejiukoakʼ kuạ̃ritetʼko nosṭoetakoa. Nagraharen adha hoṛ do bondikate eṭakʼ disạmteko idi ocokʼa menkhan sarecʼ hoṛ do nagrahareko tahena.

³ Ona tayom Probhu Isor doe oḍokokʼa ar lạṛhại jokhecʼ okae cekae onkage uni do jạtrenko upạrteye lạṛhạiya.

⁴ Enhilokʼ uni do hecʼkate Jerusalem purub secʼ reakʼ jạitun buru cetanreye teṅgona; onate jạitun buru do purub secʼ khon pạchim hạbicʼ paṛagokʼa ar adha do utạr secʼ ar adha do dạkhin secʼ ocogokʼte mitʼṭecʼ maraṅ buru nalage benaokʼa.

⁵ Ape do buru reakʼ ona buru nalatepe dạṛjoṅa, ente ona buru nala do Asel hạbicʼ calakʼa. Jihudạren raj Usiạwakʼ rajokʼ oktere dhạrti laṛaokʼ jokhecʼ cetʼ lekape dạṛletʼ onkagepe dạṛa. Ona tayom ińren Probhu Isor do uniren sanam sonotko soṅgeteye ạgukoa.

⁶ Enhilokʼ jãhãn marsalge baṅ tahena, siń cando ar ńindạ cando dokin ńutokʼa.

⁷ Enhilokʼ do eṭakʼ jãhãn dinko leka baṅ hoyokʼa, siń marsal hõ baṅ hoyokʼa, ńindạ hõ baṅ hoyokʼa; siń marsal reakʼ katha do eken Probhu Isorgeye baḍaea. Ar enhilokʼ ạyupʼ jokhecʼ hõ marsalge tahena.

⁸ Un jokhecʼ niron din ar rabaṅ dinre Jerusalem khon do heṛem dakʼ ạtu oḍokokʼte adha do purub jalapuri secʼ ar adha do pạchim jalapuri secʼ ạtu calakʼa.

⁹ Ar goṭa dhạrtiren raj do Probhu Isorgeye hoyokʼa. Enhilokʼ manwa do Probhuge Isor menteko aṅgocea, eken uniyakʼ ńutumgeko sewawakʼa.

¹⁰ Goṭa dhạrtige Araba reakʼ tapol ot leka hoyokʼa, Geba khon Jerusalem dạkhin secʼre menakʼ Rimon hạbicʼ, menkhan Jerusalem do usulrege tahena. Benjạmin reakʼ phaṭok duạr khon pạhilakʼ phaṭok duạr ar konac reakʼ phaṭok duạr hạbicʼ ar Hannanelakʼ usul pahra oṛakʼ khon rajakʼ darkha lelen ṭhạ̃i hạbicʼ goṭa nagraha do ṭhikge tahena.

¹¹ Onḍe do hoṛko girobasokʼa; ar Jerusalem do tishõ jarkharokʼ leka sarapakʼ do baṅ hoyokʼa. Ona do khạtirjoma akae tahena.

¹² Ar jãhãn jạtrenko Jerusalem upạrteko lạṛhại khan Probhu Isor do onko jạtrenko mahamạriteye ńẽtʼkoa. Onko do teṅgo akaeko tahenrege onkoakʼ hoṛmo reakʼ jel do seakʼtakoa ar onkoakʼ mẽtʼ do mẽtʼ ṭhuyạ̃kʼre tahenrege seakʼa ar alaṅ hõ mocarege seakʼtakoa.

¹³ Enhilokʼ Probhu Isor ṭhen khon maraṅ ḍamaḍolge onkore paṛaokʼa ar onko doko ńẽtʼ ocokʼa. Onko sanamkoge apan ạpin upạrte tiko epela.

¹⁴ Jihudạ hõ Jerusalem upạrteye lạṛhạiya. Aḍepase jạtrenkoakʼ dhon-durib, metakʼme ạḍi utạr sona, rupạ ar kiricʼ khạnḍwạkʼko jarwaea.

¹⁵ Inạ mitʼ lekan mahamarige onko sanam lạṛhại phạdkoakʼ ḍeraren sadomko, khaccorko, ũṭko, gadhako ar eṭakʼ sanam janwarkoe ńẽtʼkoa.

¹⁶ Tayomte onko sanam jạtren sarecʼ tahen hoṛ do uni rajakʼ, metakʼme phạdkoren Probhu Isorakʼ sewae lạgitʼ ar chạuni porob manao lạgitʼ jao bochor Jerusalemteko rakapʼ hijukʼa.

¹⁷ Ar dhạrtiren jạt jạtrenko Jerusalemte phạdkoren Probhu Isorakʼ sewae lạgitʼ bako calakʼ enḍekhan onkoakʼ disạmre do dakʼ hõ bae daga.

¹⁸ Misorrenko hõ bako calakʼ khan ar dewa seware bako seledokʼ khan onkoakʼ disạmre hõ bae daga. Ar okoe jạtrenko chạuni porob manao lạgitʼ bako calakʼ Probhu Isor do onko cetanre oka mahamạriye paṛao ocoy Misorrenko cetanre hõ inạ mahamạrigeye paṛao ocoya.

¹⁹ Misor ar eṭakʼ jạtrenko okoe do ona chạuni porob palon lạgitʼ bako rakapʼ calakʼ onko hõ niạ sạjạigeko ńama.

²⁰ Enhilokʼ “Probhu Isor ńutumte sonotokʼ ” niạ katha do sadomakʼ hoṭokʼ reakʼ ghạnṭi cetanre rokʼ akae tahena ar Probhu Isorakʼ oṛakʼ reakʼ isinakʼ reakʼ bhajanko do pinḍ samaṅ reakʼ bạṭiko leka sonotakʼ hoyokʼa.

²¹ Jerusalem ar Jihudạ reakʼ mimitʼ isinakʼ reakʼ bhajanko do phạdkoren Probhu Isor ńutumte sonotokʼa ar okoe do janwar samaṅokʼakʼ porob palon lạgitʼko rakapʼ hijukʼ onko do onako bhajan reakʼ khon hataokate onareko isina. Ar enhilokʼ phạdkoren Probhu Isorakʼ oṛakʼre do okoe hõ bako bạnij-bepara.