Sakariạ 12 - সান্তালী বাইবেল

Jerusalemren bạirikoakʼ maraokʼ

¹ Noa kangea Israel babotre Probhu Isorakʼ katha do. Probhu Isor, one okoe do sermae aṭetʼ akatʼ, okoe do dhạrti reakʼ rehetʼe bạisạu akatʼ, okoe do manwa bhitrire Jiue sirjạuakawade, uniye meneda,

² “Jerusalem do nonkan mitʼṭecʼ bubulakʼ bhajaniń benaoa one ona reakʼ ńũkate aḍepaseren sanam jạtren hoṛko konḍa manḍekʼa. Jerusalemrenko sãote Jihudạ reakʼ eṭakʼ nagrahako hõ gherao esetʼ ocokʼa.

³ Enhilokʼ tinre sanam jạtrenko Jerusalem upạrteko jarwakʼa unre uni do sanam jạtrenko lạgitʼ mitʼṭecʼ hamal dhiri lekań hoeocoyea. Ar okoe ona dhiri rakapʼ reakʼko kurumuṭui onko do apnargeko ghạl ocokʼa.

⁴ Enhilokʼ iń do mitʼke mitʼ sadomkoń botor ocokoa ar aswari do lelhań hoyocokoa. Ar Jihudạren hoṛko lạgitʼ do sontorte nońjoriń dohoya, menkhan eṭakʼ jạtren joto sadom doń kãṛã ocokoa.

⁵ Unre Jihudạren mukhiyạko do mon monteko mena, ‘Jerusalemren hoṛkoge aleakʼ daṛe do, ente phạdkoren Probhu Isor do onkoren Isor kanae.’

⁶ “Enhilokʼ Jihudạren mukhiyạko do kaṭ reakʼ bojha talare jolokʼkan aṅgra leka ar phosol reakʼ binḍạ talare jolokʼkan mosal lekań hoyocokoa. Onko do jojomsa ar leṅgasa secʼ aḍepaseren sanam jạtrenko jomkoa, menkhan Jerusalemren hoṛ do arhõ akoakʼ ṭhạ̃iregeko girobasokʼa.

⁷ “Iń Probhu Isorge pạhilre Jihudạ reakʼ tahen ṭhạ̃ikoń bańcaoa jemon Dạudakʼ bõsren ar Jerusalemren hoṛkoakʼ manot do Jihudạren eṭakʼ eṭakʼ hoṛko khon ḍher baṅ hoyokʼ.

⁸ Enhilokʼ iń do Jerusalemren hoṛkoń rukhiyạkoa. Unre onko talaren sanam khon nijor utạran hoṛ hõ Dạud lekako hoyokʼa ar Dạudren bõsko do Isor leka, metakʼme Probhu Isorren goḍetko leka onko laha lahateko calakʼa.

⁹ Enhilokʼ okoe jạtrenko do Jerusalem cetanre jhãp em lạgitʼko hijukʼ iń do onkoń marao giḍikakoa.

¹⁰ “Iń do Dạudakʼ bõs ar Jerusalemren hoṛko cetanre ińren Jiu iń dulea; uni doe dayakʼa ar koejoṅ reakʼ mone emokʼa. Onate onko do iń secʼ, metakʼme okoe do uniko sobokʼ tapʼlede uni secʼ beṅgetʼ akaeko tahena. Ar sadher hopon ńutumte homor halaṅ leka onko do uni lạgitʼko homor halaṅa ar pạhilicʼ hopon lạgitʼ cetʼ lekako homor halaṅ onkageko jare jarekʼa.

¹¹ Enhilokʼ Jerusalemre ạḍitetʼ homor halaṅ hoyokʼa cetʼleka Megido ṭạnḍire Haddad Rimonre hoylen.

^12-14 Disạmren mimitʼ bõsren hoṛ do apan ạpin judạ judạko halaṅ homora. Dạud bõsrenko, Nathon bõsrenko, Liwi bõsrenko, Simại bõsrenko ar sarecʼ sanam bõsren hoṛko homor halaṅa. Herel hoṛko ar onkoren maejiuko hõ apan ạpin judạ judạko rakʼ homora.