Sakariạ 11 - সান্তালী বাইবেল

¹ E Lebanon, amakʼ duạrko jhicʼ dohokam, jemon seṅgel do amakʼ debdạru darekoe jom daṛeakʼ.

² E saro dare, homor halaṅme, ente debdạru dare do bhinḍạṛena. Ar soros dareko hõ maraoena. E Bason reakʼ Elon dare, ape hõ homor halaṅpe, ente raṭen bir reakʼ sanam dareko do makʼ giḍi ocoakana.

³ Bhiḍi gukʼpikoakʼ homor halaṅ ańjompe; onkoakʼ bhage bhage ạtiń ṭạnḍiko do nosṭo caba akana. Dhạcri kulkoakʼ hạnḍrạu ańjompe; jordan reakʼ bir do ujạṛena.

Barea gukʼpi kin reakʼ

⁴ Ińren Probhu Isore meneda, “Gur ocokʼ lạgitʼ okoe bheḍa palrenko ṭhik doho akan am do onkoren gupiyicʼge baṛe hoyokʼme.

⁵ Okoe onkoko kirińetʼko onko doko guretʼkogea menkhan apnar do bin dusạn mente bako hudisokʼkana. Ar okoe onkoko ạkhrińetʼko onko doko mena, ‘Probhu Isorakʼge sarhao baṛe hoyokʼtaema, iń doń kisạ̃ṛ akana.’ Onkoren gukʼpiko do onko cetanre bako dayakʼ kana.

⁶ Disạmren hoṛko cetanre iń do ar bạń dayakʼa; iń do mimitʼko ako aḍepaseren hoṛko ṭhen ar rajawakʼ tireń jimạkoa. Onko do disạmko jarkhara ar onkoakʼ ti khon okoege bạń bańcaokoa.”

⁷ Gurko lạgitʼ okoe bhedạ palko ṭhik doho ocoakan, biseskaete iń do onko palren dukhạliạko ạtińkoń ehopʼena. Ona tayom do barea ṭheṅgań hataokeda ar ona reakʼ mitʼṭecʼ do Daya ar eṭakʼakʼ reakʼ ńutum do Tonol iń dohokeda; ar iń do ona palrenko gupiyiń ehopʼena.

⁸ Mitʼ cando bhitrite iń do pea gukʼpikoń laga ńirketʼkoa. Ar palrenko do iń kurudạńko ehopʼena ar ińhõ onko iạteń laṅga cabayena.

⁹ Ińiń menkeda, “Aperen gukʼpiko do bạń hoyokʼa. Okoeyakʼ gujukʼ reakʼ katha menakʼ uni doe gujukʼma ar okoeyakʼ pharakokʼ reakʼ katha menakʼ uni doe sạṅgińokʼma. Ar sarecʼko do ako akoakʼ jelko jomma.”

¹⁰ Ona tayom iń do Daya ńutumakʼ ona ṭheṅga hataokateń rạputʼkeda ar sanam jạtrenko sãote okaṭakʼ bondobos tahẽkan onań bạtilkeda.

¹¹ Ar enhilokʼge ona do bạtilena, onatege palren dukhiko okoe do ińko tuṅkhi arko talas baṛayediń tahẽkan onkoko baḍaekeda, noako talatege Probhu Isor do kathae roṛetʼkana.

¹² Iń do onkoń metatʼkoa, “Bhagepe hudisetʼ khan ińakʼ kuṛại em kạtińpe; ar bhage bape hudisetʼ khan do doho oṭokakʼpe.” Unre onko do pegel rupạ ṭakako emadińạ.

¹³ Unre Probhu Isor do ińe metadińạ, “Kuṅkạl baṛe ona do capatʼ giḍi oṭowaeme- ona bhạri damge, okaṭakʼ onkoko dam ạdiń.” Ona tayom iń do ona pegel rupạ ṭaka hataokate Probhu Isorakʼ oṛakʼre kuṅkạliń lebda gotʼadea.

¹⁴ Ona tayom iń do Tonol ńutumanakʼ ona ṭheṅgań rạputʼketʼte Jihudạ ar Israel talare boeha reakʼ oka helmel tahẽkan onań nosṭokeda.

¹⁵ Unre Probhu Isor do ińe metadińạ, “Niạ dhao do arhõ mitʼṭen kharap gukʼpiyicʼakʼ jinisko hataome.

¹⁶ Iń do disạm cetanre nonkan mitʼṭen gukʼpiyicʼ iń rakabea one uni do muhinre paṛao akan hoṛko bae beṅgetʼako, pasnao akan hoṛko bae sendrako, ghạl akan hoṛko bae bogeko, moṭasoṭa hoṛko bae jom ocoko; menkhan uni do bachao akatʼko bheḍakoakʼ jele joma ar onkoakʼ khurạ khon hõ jel or chaḍaokateye hạmbuṛa.

¹⁷ “Hae, uni lelha gupiyicʼ do, one okoe do palrenko bạgikateye calakʼ kan! Tarwaṛe do uniyakʼ ti ar jojomsa reakʼ mẽtʼgeye ghạltaea. Onate uniyakʼ ti do borojokʼtaea ar uniyakʼ jojomsa reakʼ mẽtʼ do kãṛãkʼtaea.”