Rut reakʼ kạhini 4 - সান্তালী বাইবেল

Boas ar Rutakʼ bapla

¹ Boas do phaṭok-duạr ṭhen senkateye duṛupʼena. Ar Boas okoe sor peṛa reakʼ kathae menletʼ unre uni do onkateye parom calakʼkan tahẽkana. Boas do uni hohoadeteye metadea, “E boeha, nonḍe hecʼkate duṛupʼlen me.” Unre uni hoṛ do onḍe senkateye duṛupʼena.

² Ona tayom Boas do atoren gel goṭen murubbiko hohoatʼkoteye metatʼkoa, “Dela, nonḍe duṛupʼlenpe.” Unre onko do onḍeko duṛupʼena.

³ Boas do uni sor peṛae metadea, “Naomi do Moab disạm khon ruạṛ hecʼkate aboren boeha Elimelekakʼ jumi ạkhrińe meneda.

⁴ Onateń hudiskeda ona reaṅ baḍae ocome jạruṛtińạ. Nonḍe menakʼko hoṛko ar iń jạtren murubbiko samaṅre amge ona do kirińme. Ar amge jumi chaḍao hataoem menetʼ khan ona do amge hataome. Menkhan ona bam khojkan khan lạiyạńme, ente ona chaḍao hatao reakʼ pạhil ạidạri do amakʼ kangea ar ona tayom do ińakʼ kana.” Unre uni sor peṛa doe menkeda, “Ṭhikgea, iń do onań chaḍao hatao joṅa.”

⁵ Onate Boase menkeda, “Oka hilokʼ ona jumi Naomi ṭhen khonem kiriń hataoa enhilokʼ uni gocʼicʼakʼ sompotti sãote uniyakʼ ńutum rukhiyại lạgitʼ Moabi rạnḍi maejiu Rut hõ ataṅe hoyokʼtama.”

⁶ Niạ katha ańjomkate uni sor peṛa doe menkeda, “Ona do bạń daṛeakʼa, ente iń apnarakʼ sompotti iạte unre muskilreń paṛaokʼa. Ar bạń chaḍao hatao daṛeakʼ kante amge ona do hataome.”

⁷ Israelkoakʼ disạmre sompotti kiriń ạkhriń ar chaḍao babotre ạn-tạrire ạgui lạgitʼ niạ ạnge tahẽkana: mitʼ hoṛ do acʼakʼ panahi totʼkate eṭakʼ hoṛe emaekan tahẽkana, ar nonkate onkoakʼ kạmi do ạn-tạrire hijukʼkan tahẽkana.

⁸ Onatege uni sor peṛa do Boase metadea, “Amge ona do kiriń hataome.” Ar noa menkate uni do acʼakʼ panaheye totʼketʼtaea.

⁹ Unre Boas do murubbiko ar onḍenko sanam hoṛkoe metatʼkoa, “Iń do teheń Elimelek, Kilion ar Mahlon tekoakʼ sanam sompotti do Naomi ṭhen khoniń kirińketʼ onaren gohako do apegepe tahẽyena.

¹⁰ Ar gocʼ akanicʼakʼ sompotti ar ńutum jemon rukhiyạkʼtae onate Mahlonren rạnḍi bạhu Rut hõ ińren bạhu menteń ataṅede kana. Ar onate bõsko tala khon ar atorenko tala khon gocʼ akanicʼakʼ ńutum do baṅ meṭaokʼtaea. Ape do teheń noa sanamakʼren gohakope hoyena.”

¹¹ Unre okoe do phaṭok duạr ṭhenko duṛupʼ akan tahẽkan murubbiko menkeda, “Hẽ, ale do gohale hoyena. Ar okoeṭakʼ maejiu do amakʼ oṛakʼteye calakʼkan Probhu Isor do jemon Rahel ar Lea lekae hoeocoye, one okoe do Israel jạtrenkoe benao rakapʼletʼko. Ephratare am do dhon durib hameṭjoṅ me ar Bethlehem ren sanamko do amakʼ ńutumko ńumtama.

¹² Probhu Isor do nui maejiuakʼ kukhire okoeṭakʼ hopone emam uni hotete amakʼ bõs do Tamorakʼ kukhiren Jihudạren hopon Peresakʼ bõs leka baṛe hoyokʼma.”

¹³ Inạ tayom Boas do Rute baplakedea ar uniren bạhui hoyena. Ar Boas do uni ṭhene boloyen khan Probhu Isor do Rutakʼ kukhire gidrại emadea ar uniren do mitʼṭen koṛa hopone hoyena.

¹⁴ Onate eṭakʼ maejiuko do Naomiko metadea, “Probhu Isorakʼge sarhao hoyokʼtae ma, ente uni do teheń mitʼṭecʼ dạyik gogokʼicʼ peṛae ematʼmea. Israelkoakʼ disạm talare sanamkoge uniko sarhaoema.

¹⁵ Nui gidrạ do amakʼ buḍhi pạṛiạre jemon jiwiye raṛejtam are ńelme, ente amren kiminme, one amren eae goṭen hoponko khon hõ ḍhere dulạṛetʼme, uniyakʼ kukhire gidrạwakʼ janam do hoyakana.”

¹⁶ Unre Naomi do gidrại hoborkedea ar uniren hehewicʼe hoyena.

¹⁷ Ar aḍepaseren maejiukoko menkeda, “Naomiren do mitʼṭen koṛa gidrại hoyakana.” Onko do uni gidrạwakʼ ńutum Obedko dohoketʼtaea. Obed do Jisạiren apate tahẽkana ar Jisại do Dạudren apate tahẽkana.

¹⁸ Peresakʼ bõs tạlika do nonka leka: Peresren hopon do Hesron;

¹⁹ Ar Hesronren hopon do Ram; Ramren hopon do Aminadab;

²⁰ Aminadabren hopon do Nahason; Nahasonren hopon do Solomon;

²¹ Solomonren hopon do Boas; Boasren hopon do Obed;

²² Obedren hopon do Jisại ar Jisạiren hopon do Dạud.